係，我知，未夠三十學人講女人經，根據調查顯示，將會有逾一成既十幾歲靚仔叉哂腰排定隊同我講﹕阿叔﹗講女人經？係都我地講啦﹗咩啊﹗我地呢d有成十個性伴侶，仲要唔介意群交喎﹗你有無啊？」佩服佩服，再次證明人類果然係群居動物。

 我認為d 父母唔夠胆同仔女講性教育，其中一個原因，係，跟唔到。 即係你仲準備緊「我係邊度黎生出黎架」既標準答案點樣可以避開「做愛」同男女性器官名稱既時候，個仔已經打哂呵露同你講﹕「老豆你仲係用緊傳教士式體位？out唔out d 啊？」跟手可能佢已經將一系列成語動畫廊裏面既四字成語，咩老漢啊觀音啊，如數家珍咁樣係你面前演練一次……家長唯有講一句﹕「阿仔﹗係時候教你老豆做人既道理啦」。 

唔好意思，一講女人就講埋左一邊，話說經典電影《秋天的童話》周潤發第一次形容女人係茶煲，令世人捧腹讚嘆形容精妙，點知廿年後無記有套電視劇再炒一次冷飯，又話d女人係茶煲……唔好笑佢老土，你應該咁諗﹕廿幾年，女人都無進步過，仲係咁老土，仲係咁茶煲。對唔住，講完呢句茶煲，我自己都覺得，真係好老土。莫非d編劇唔知道，呢個年代有個詞語，叫「港女」？ 

有人話呢個世界第一場戰爭，就係由男人同女人進行。我信。唔係吹水，有歷史考據。打開古今中外好多既創世神話，即係個d天地點樣初開、萬物點樣誕生、男女點樣結合個d 神話呢，我研究過，洪水災禍係鐵胆背景，無論係諾亞方舟定女媧煉石補天，都有呢堂景。但最震憾既，就係洪水之後，只係淨番一對男女，而呢對男女，唔知點解，係各地神話裏面，都定左佢地既角色，係兄妹關係﹗

即係話，呢d兄妹，要係洪荒時代，被逼亂倫﹗ 劇情發展亦是如此，上天叫兄妹結合，而吊詭就係，男人一口就答應左，諗起都噁心，個個你阿妹黎架，莫非男人真係咁咸濕？ 相反，阿妹就好有原則，死都唔肯，最後唯有上天下旨意，如果男既做到以下幾樣項目，就證明天意要安排你地結合啦。個d項目簡直就同現代人追女仔要過五關一樣﹕ 係山既一面拋一枝針，係山既另一面拋一條線，如果針穿得過條線，就可以係埋一齊。

你終於明白，咩叫做「男追女隔重山」，原來係神話時代已經有伏線。 仲有啊，女人最鐘意考驗男士去完成高難度動作，你以為「我的野蠻女友」叫男人高踭鞋已經係好可怕？錯啦，創世神話仲有以下呢一段﹕ 

不如先用面前这盘磨来试试。你背着上边那片从对面山上滚下来。我背着下边那片从这边山上滚下来。如果磨心插在磨眼上就成亲。” 

各位，只有女人先會諗得出咁絕核既測試﹕呢兩個測試說明左，女人既不安全感覺，係與生俱來，要用好多唔同既方法，天意啦奇跡啦去說服自己，好啦，眼前呢位雄性動物可以同我結合啦。

 你會問啦，照計，男女原來經過左咁多苦難先可以係埋一齊，雖然亂倫真係令人倒哂胃口，但都算係久經考驗既戰士，點解呢個年頭，會咁易離離合合？

  首先，你要睇清楚，神話裏面，阿哥要求既，唔係同阿妹相愛，而係做愛，即係話，個男人又穿針又係個山度碌落黎，其實目的只有一個﹕就係要結合。

 由兄妺之愛一跳就變成夫妻之愛，你睇下，男既係一d難度都無，一d猶疑都無，咁你就明白，點解男人咁容易接受一次性交易啦。 而女既，其實都已經係戴眼識人架啦，都唔信男人既甜言蜜語，係要逼佢做一場大龍鳯先得，不過，各位姐妹，呢d任務，其實證明唔到乜野，因為，係神話裏面，天生一對既係條線同枝針，係個磨盤同磨心，男女係咪匹配相襯，神話無講到。 

性教育都唔駛外求，睇返老祖宗既創世神話，已經有好多教訓。仲有啊，下次個仔再係你面前耀武揚威佢既性經驗，你可以同佢講﹕阿仔﹗你d小兒科﹗幾千年前，我地祖先啊，啍啍﹗試過咁啊﹗

話說自從余秋雨大師人出左一篇《含淚勸告災民》，大家都一時文氣煥發，好想一抒文采，有一位山東省作協副主席 王兆山，寫左兩首古詞，為四川地震人民打打氣。

第一首，詞牌就係江城子，小標題係「廢墟下的自述」，用一個好新穎既角度，以死者立場講述對官員落力救災的感想。內容如下﹕

犀利﹗﹗犀利﹗﹗封建年代都只係識講「謝主龍恩」，只係皇恩浩蕩，都只係恩啫，都未去到「黨疼國愛」，呢d咁人性化、好似同情人講既對話，直追當年文革時期「爹親娘親不及毛主席親」的境界。當年文革時期，要用以下呢串長句黎形容黨國既恩情「"天大地大不如党的恩情大，河深海深不如阶级友爱深。爹亲娘亲不如毛主席亲，千好万好不如社会主义好。」

家陣，簡單四個字足以形容「黨疼國愛」，對於送黑心棉的人士黎講，所謂黨疼國愛，可能變成「姥姥不疼舅舅不愛」。

當然，更絕既就係「十三億人共一哭，縱做鬼，也幸福」，我地平時係殯儀館，成日唔知點樣安慰個d喪親家屬，只識一句「節哀順變」、「佢一路走好」「佢死都會眼閉」，今日，我地黎王大詩人送我地一句「縱做鬼，也幸福」，如果做鬼都可以幸福，咁今日在生既中國人，真係唔知應該用咩更高級既字眼黎形容我地既快樂。

 接住個句「左軍叔、右警姑」亦係真係軍民魚水情既進一步演繹。　　民族大爱，亲历死也足。　　只盼坟前有屏幕，　看奥运，同欢呼。」畫龍點晴當然就係呢兩句，詩人真係慌你唔死，慌你死得唔抵，繼從做鬼也幸福之後，再黎一句「民族大愛，死也足」，做乜係要我地死呢？

死左既人，有乜願望呢？係咪想生者寬慰？唔係？係咪想沉冤得雪？唔係？只想大家盼坟前有螢幕，看奧運，同歡呼。」真係深深感動人既詩句﹗﹗完全明白到所謂死者既心裏狀態，強烈建議王大詩人應該主動搵個d死去學童的家長，唔駛余秋雨大詩人再含淚相勸啦，由王大詩人親自出面送個薄屏幕俾d家屬，同佢地講，你地d 仔女要既都只係個lcd mon啫，唔識講咩識大體啦，俾佢地睇奧運已經得啦﹗

唉﹗我地詩既國度，仲能誕生咁偉大既詩句，大家真係要多多練習、勤加背誦，

隱約感覺到友人有點驚訝，唔係啩？無反應？？就像球隊落後緊零比三、但教練仍然坐在包廂嚼香口膠一樣，教人不可思議。但實情卻是﹕大佬﹗個教練已經換哂三個人﹗你想佢點啊﹗你想我可以點啊？

或許我應該拉隊衝出球場，令球賽腰斬？我無這個勇氣。

我就是如此，如果我擔心完那件事能令事情改變，我才去擔心。

結果被人投訴「太消極」。

或許真的懶了很久，想了很多完美自以為個隻的借口。

就像以前，總愛和豬朋狗友發夢﹕可以係soho租樓就發達﹗晚晚去浦都仲得﹗後來又改為﹕如果住係尖咀就好，劈完五分鐘行到返屋企。但實情是，我搬到油麻地之後，未試過因地利而劈酒未試過因方便而蒲通宵，根本一切都是自找的借口﹕根本只是一個電車男，根本就不是一個愛蒲的人。不過以前可以賴住得遠，現在住近了，所有借口見光死。

或許很快，我以往替自開脫的借口，都會見光死。

哎喲，咁點算呢？

 個晚，同fr去尖沙咀落 bar飲野，我到依家都懷疑係佢係酒意上湧，借醉行兇，因為佢突然同我講左句好唔負責任既說話，嚴重d講，我簡直可以告佢誹謗添啊。佢無端端望住話，曾志豪，我覺得你，好佬啊。

咩話？我差d酒杯都拎唔穩，忍左好耐先無噴到佢一面都係酒；我望住佢，你講多次，佢望番我，仲要整個好firm既眼神話，你好佬啊﹗你做乜佬左咁多啊？

Omg﹗我聽得好清楚，佢唔係話我老，而係話我，佬，老字隔籬有個企人邊，佬﹗﹗

唔係下話？小弟三十未出頭，酒吧d拳手同我sell 酒既時候都無叫過我叔叔啊，一樣係拳來腳往打成一片，你唔能夠因為我永遠都飲剩半杯酒養金魚所以叫我金魚佬架﹗﹗

佢話，你駛唔駛咁激動啊？飲大左啊？我話我唔諗咁多都唔得，因為真係好大既打擊﹗﹗你明唔明，你話一個男人老，男人係無所謂，因為男人愈老愈有吸引力，夏里遜福啊、辛康納利、李察基爾、甚至我地香港代表，謝老四，最近仲可以對住鏡頭話「男人可以風流，不過唔可以下流」，幾有自信，我地d做細既只能流哂口水問﹕幾時肥水流過別人田，益下我地啦四哥。

簡單一句﹕女人就好驚人話佢老，但男人一d都唔怕老，踢波個d老波骨，成日都有老來嬌既表現，你睇法國，幾懷念老將施丹先得架。

但，男人唔驚老，最驚，佬﹗

因為老，只係客觀上一個年歲增長既形容，但佬，就係一個帶有價值判斷、品味高低既形容詞，而呢個品味，通常係，bad taste。例如，麻甩佬﹗

俾人話你佬，其實等於話你有以下特質﹕猥瑣、cheap、咸濕，係呢度咸濕呢句說話一定要解一解。

係街邊對住行過既超短裙妹妹吹口哨甚至搭訕，唔算係咸濕，亦唔算係佬既表現，呢d只係當街撩女仔啫；但如果個d，齋睇齌昅淨係夠胆同伙伴話「嘩條女正到…」0下刪三百個字典查唔到字，我就介定呢d係麻甩佬既行為。

因為作為一個佬，一個麻甩佬，佢已經自覺失去左吸引異性既信心，而只敢停留係佔口頭上既便宜，最重要係，口頭上的便宜，已經可以滿足到麻甩佬既慾望﹗﹗呢d咪就係典型既佬既行為囉。

話你佬，就等於自動將你標籤為得閒鐘意揹住個腰包、注意係腰包，仲要打斜孭個隻，個頭電到鬈鬈地，住哂緊身衣，但中央肥胖既部份一樣咁礙眼，戴住金鏈，或者係陀住個大到無倫既龍形裝飾物，仲要隻手戴住大到成粒葡萄子既蜜蠟珠鏈仲要係行孖咇既，去邊啊？唉，唔係北上，就係過大海。唔係玩兩手，就係搞兩手，如果能夠係個後褲袋度再攝一本薄裝本地漫畫或者專業既馬經報，我敢胆講係毫無破綻﹗

你千祈唔好以為作為一個佬，佢就樣樣都好老土，錯啦，d 佬一樣可以戴住最新款既藍芽耳塞，不過望落唔似g4，淨係似砵蘭街既馬夫；d 佬一樣會有最新既手機鈴聲，但更加刺耳既就係佢緊接住個把「喂﹗」既雄壯聲線﹗佬一樣會同女人去貴價餐廳食自助餐，不過你會聽到佢成日講「梗係攞生蠔啦﹗」

佬最可怕既地方，就係佢明明做緊一般人會做既野，但唔知點解，出黎既效果硬係cheap d、差d、樣衰d，一旦你俾人歸類你係一個佬，恭喜你，萬劫不復，人地踢拖係瀟灑不羈悠閒既表現、你就落得一個「方便捽腳趾」既罪名。

女人怕老，男人怕佬，不如咁啦，我唔嫌你老，你都唔好笑我佬啊？

上次就問大家幾時係母親節，今次我又要問大家啦，幾時先係父親節呢？今次，我個答案就無咁感人肺腑，好簡單﹕記得個日咪係父親節囉。因為，我地成日都唔記得父親節，通常都係去到正日，先知突然記起﹕係喎﹗父親節喎﹗阿，老豆﹗恭喜哂喎﹗完左，慶祝完畢﹗

我陰謀論咁推測，父親節所以炒唔起，其實係，男人特登既。其實作為父親，我認為，應該係最唔介意父親節。點解？你諗下，d 女人成日都投訴，話d 男人成日都話節日既野，無意思既，隨心得啦，結婚周年有咩好慶祝，情人節擺明就係商人呃我地錢既節日黎架，屋企煮飯仔就得啦，好多被男人冷落既女士都聽唔少呢d無本心既說話啦，好啦。

咁風水輪流轉，輪到你地男士節目，父親節啦，咁照計，作為男人既父親，應該更加瀟灑﹕forget it，I don’t care，節日既野，形式黎既啫，只要有心，日日都係父親節啦老豆。慳番算啦。所以，點炒得起呢？慶祝得父親節，就要一次還返哂過去咁多形式主義既節日囉。老豆計過數，除笨有精。

父親節最應該送既禮物，可能係要還父親一個公道。成日話「嚴父慈母」，但我見過好多，包括自己本人老豆在內，母或者一樣咁慈，但父就一d都唔嚴，雖未至於係縱啊，但都幾好相處，何嚴之有？

我眼見好多家長，特別係個d陪仔女去叩名校門啊、轉地址搬屋入名校網啊、一個月用四萬銀培訓小學生個d呢，通常都係個阿媽出手既喎，佢地對仔女既嚴謹嚴格，比起大部份懶懶閒既老豆，你話啦，邊個先係嚴？古時候既孟母三遷更加說明左阿媽，先天都係嚴過阿爸架。

仲有啊，我地成日話「子不教，父之過」，正正說明左，大部分既父親，都係不教子架﹗你諗下，岳母刺字﹗幾嚴厲啊﹗教仔教到出哂血﹗我地最出名教人既男人，一定係孔子啦，佢最叻就係「循循善誘」，其實即係吟吟沉沉，男人點會嚴格先得架。最緊要係，男人對自己都一d 唔嚴格，女人最鐘意話，男人成日優柔寡斷，唔得爽快‧  

所謂嚴既意思，唔應該係話邊個惡死、邊個大聲，鬥粗口鬥暴力可能係男人win 哂，但講到決心、決斷同埋永不放棄，男人輸俾女人一條街。你睇下政治助理，伍洁璇，話唔放棄新加坡藉，一句到尾，我係唔放棄，無咁需要，幾tough；蘇錦樑就吞吞吐吐，一大堆說詞之後先話，好啦，我唔要啦。你話邊個似係嚴呢？希拉莉同克林頓，你估邊個嚴多d啦？爹哋要食雪茄，你自溫書先啦﹗

今個父親節，還父親一個公道，佢地一d都唔嚴，相反好得仔女鐘意，因為個個都話，男人大個，都係一個大細路，最鐘意都係玩。同仔女玩既任務，教俾男人啦﹗

今天我和青木部落回憶這個廣告歌，我相當堅決認為這個廣告就是「維他菊花茶」，但好一個青木部落，居然不肯相信，還認為「維他菊花茶」這五個字完全唔啱音，不相信廣告歌有這麼一句歌詞。

結果，我們啟動了google、yahoo、youtube全部無功而還，向所有前輩打探，包括淑梅姐，一樣無人能作權威解答﹗我們只能向廣大網友求救﹗有無人聽過這個廣告歌呢？有無人保留相關片段或歌詞呢？重重無賞﹗﹗

提供線索﹕利用了梅姐當年金曲「冰山大火」作廣告歌的旋律，歌詞大概如是﹕「快快快快快快快，xxxxx，火速即到步。他他他解救我， i am on fire i am on fire﹗」 

 ====================================================

下雨天，一起晾乾。

嘻嘻，大狗小狗落玉盤，唏唏唏。

每年六四，我都對會個d數字，有無窮既聯想。六四十周年，齊頭數，當然係值得紀念，個時我成日唱住「仲有幾個十年？」希望唔駛等太多十年就可以平反，不過，呢首歌睇怕都有排唱。家陣我仲keep住一件「六四十周年」既t-shirt，當係一個見證。

六四十六年，我諗起楊過同小龍女，個時我係咁諗架﹕負面d講，人地楊過同小龍女都見番面啦，六四都仲未平反，好灰。但正面d呢﹕十六年既時間一d都唔長，你睇下，姑姑個陣夠以為十六年既光陰可以磨蝕到過兒既思念啦，點知十六年後，楊過一樣跳崖。所以，大家千祈唔好氣餒，我地要用楊過愛小龍女既熱情，堅持下去﹗

六四十七年，我又諗，嘩﹗就黎成年啦，六四後既新一代，仲有一年就攞身份證，挺天立地，反而，六四既個一代，就已經人到中壯年，你好難要求佢地再有咩突破，唯有交俾十七歲既後生仔，不過，問題係，你想交，佢地想唔想接先？

我有時見到九一八事變啊、七七盧溝橋事變既紀念日，有d公公伯伯幾個老兵，數埋唔夠三十人，行兩個圈嗌口號，得到電視兩三秒既shot，報紙手指尾咁多既一張相位，連一行說明文字，係咁多，乜都無。

我就會心寒，因為，對呢d老兵黎講，九一八七七呢d 日子，等於我地呢一代對六四既記憶，有同樣既重量。但，支持佢地關注佢地既人愈黎愈少，最後變成小圈子，無人談論，佢地所受既冤屈，無人再給予同情，佢地要求日本政府道歉，無人再去支持。好驚，會唔會，有一日，六四集會，都會變成咁樣？三十年既時候，會唔會，六四已經唔再起眼？

我再出席燭光晚會，會唔會已經由「可以幫手搬鐵馬」既年青人，變成「可以優先離場既老伯伯」？我好擔心自己無咁大既毅力同堅持，周圍人群漸散。我更加害怕，六四，最後變成九一八、同七七。

人地話成名要趁早，其實平反，更加要趁早。要平反既人都死哂，你先話平反，呢d 叫做攞景贈慶。最差既平反時機，就係已經無人介意、無人在意，等如你話「史學界為秦檜平反」「為潘金蓮平反」「為曹操平反」，有鬼用咩？都付笑談中，平反，係要令受冤枉既人，可以得到公正評價，可以係生前，攞番佢曾經失去既尊嚴。

要知道地震後中國是否真的會不一樣，就要看如何處理豆腐渣了。 

 =================================

都 江 堰 家 長 擬 就 豆 腐 渣 校 舍 入 稟 　 報 道 稱 遭 阻 撓

唔係嘩？你講咩話？人就梗係得一個阿媽啦，唔係，有d人，有兩個阿媽。點解？因為一個係生母，另一個係養母，而通常，個生母對你唔好、或者無能力對你好；而養母，就通常環境好d、俾你多d著數，所以你先會有一個生母都唔滿足，仲要搵多個養母。

 唔信？你睇下，話自己有雙重國籍既，通常都係攞美國加拿大英國澳洲呢d先進國家，有幾多個會話攞左個婆羅奶國籍？我係津巴布韋有國籍？新畿內亞有居留權。 

所以，有奶便是娘係啱既，無奶飲，同我生母差唔多，我做乜要認多一個阿媽先？問題就黎啦﹕阿媽的角色係乜？阿媽對一個人，其實有乜意義？愛國？點解要愛國呢？ 

呢個年代，我係邊個國家既人，其實好含糊，我今日係中國人，但聽日，只要我投資錢夠多、或者貢獻夠大，我眨下眼就可以做第二個國家既子民，咁點解我仲要死心塌地愛一個國家呢？拍下散拖、玩下ONE NIGHT STAND就算啦，你要接受我係好博愛架，見一國愛一個，如果個個都玩認真，點夠分啊？

 我建議唔好再唱龍的傳人，中國人，「一樣的血一樣的種」，根本係錯既，唔通你歧視個d 白皮膚藍眼睛歸化做中國既外國中國人咩？佢地同我地流既係唔同既血、唔同既種喎，我地可以做外國人，外國人一樣可以做中國人，中國人的定義根本就無定義。

 我覺個呢個年代，國民身份已經變成一件好功利一d都唔嚴肅既事。 攞外國護照，做外國公民，但轉頭話你知，其實只係放便旅行出入境，我想話，對個個外國國家黎講，算唔算一種唔尊重？算唔算一種欺騙？特別係當初申請信誓旦旦，真係精誠所至金石為開，點知一話要放棄﹕喂嗱嗱聲唔好拖我時間我趕住開船啊﹗

 足球場上，好多球員，會考慮自己，代表法國踢波有前途，定係奧地利踢波多機會發揮，黎決定，自己做邊個國家既公民。你話啦，係呢d球員揀國家既時候，諗既係乜？考慮既係乜？我係國家，我都會諗﹕兄弟，你唔好話你愛國，你其實都係愛自己既前途啫。 

傑斯係最經典既例子，當初問佢揀英國定威爾斯，個個都叫佢揀英國，有前途好多，但佢竟然揀左國際排名低好多既威爾斯。點解呢？有一個說法好鬼浪漫，佢唔滿意英格蘭籍的父親拋棄威爾斯籍的母親，憤而放棄代表英格蘭的資格，轉為代表威爾斯，連個名都由由賴恩•威爾遜改為賴恩•傑斯。 呢一刻傑斯考慮既唔係個人前途，而係阿媽既感受。不過，唔好意思，佢愛既係威爾斯既阿媽，而唔係威爾斯呢個國家。

 更加唔好講小山智麗呢個經典例子。對佢地黎講，愛國既定義就係﹕國家愛我，我就愛國。愛國唔俾機會我，我就去第二處好人家。 

所以我真係好懷疑，係呢個咁容易就話入籍、又咁容易又話放棄既年代，愛國其實有乜意思？仲有咩人會死心塌地咁愛國呢？答案就係﹕走唔甩既人咪愛國囉。

不可能的，敬愛的丁子霖女士，如果國家願意為六四死難者下半旗，便代表官方認同了六四事件，等於肯定了六四是愛國行動。所以，下半旗的前提，就是先為六四定性……這就像一個圓圈，怎麼可能廻避？

任何為六四而做的行為，都是一種爭議之下的結果，官方今年不可能這麼做，你的「暫時擱置爭議」是毫無用處的。

不過，更令人難過的，卻是天安門母親成立的網站，被大批網民攻擊。明報引述了幾段網民留言，看了令人憤恨和痛心。這些網民的留言，其中一項意思是說，你丁子霖要求像四川地震同胞一樣，向六四死難者下半旗致哀，是侮辱了四川同胞。

我看了愕然﹗發生甚麼事？六四的死難者，和四川的遇害人士，難道不是同樣的中國人？兩者難道不同樣是無辜的老百姓？甚至簡單一句﹕佢地都係有阿媽生的﹗為甚麼？中國的網民，居然會說﹕六四死難者侮辱了四川死難者？

今天到災區四處安慰的溫家寶總理，十九年前，正正就陪著前總理趙紫陽探望六四的學生啊﹗今天你們如此誇讚的溫爺爺，十九年前，你問問他吧，是帶著甚麼樣的心情下去天安門廣場的？那句「同學們，我來晚啦﹗」你們問問溫爺爺，聽到趙總理這句話，對他以後的人生有著甚麼影響？我相信，溫總一定不會答應一定不會同意你們這些網民的無恥言論。

都是我們受苦難的同胞啊。

新一代的中國人，難道就這麼善忘？對這批你們的學長、 前輩的付出，你們完全忘得一乾二淨？原來六四被遺忘不是最可悲，最可悲的，卻是六四被歪曲了、事非被顛倒了、黑白分不清了。

我深信，六四不會再發生，各位中國同胞實在可以放一百二十萬個心，不是因為政府的進步，而是人民的退步。在這個中國裏，在這種網絡的言論氣氛之中，我相信，不會再有這麼多「傻子」大學生會再為了社會的不公而走上街頭、不會再出現「媽媽，我餓，但我吃不下」的堅持，我們的中國新一代，對政府愈來愈多的包容和愛護，對曾經付出血淚的同胞，愈來愈多的厭惡。

丁子霖被攻擊，你能想像，四川大地震失去孩子的母親，有朝一日，當這個「紀念四川」的哀痛氣氛消減之後，也可能會被人攻擊「別再搞破壞」嗎？

可悲的，卻是被洗腦的所謂新一代啊﹗

本來台上正熱鬧，出現一批藝人準備唱歌，但畫面突然由台上轉到台下，突然要我們放棄台上的演出而轉去關心台下不知名人士的訪問，原因？很簡單，因為那時，台上演出者，是「atv」的藝人，而那個播放中的電視台，就是親愛的香港第一大台，tvb。然後，當台上的atv藝人表演完畢，tvb的台下訪問也神奇、夾都無咁準，同時完結，「即刻睇番台上情況」﹗問你死未﹗於是，這個甚麼「不分你我」的表演，在這一刻，分你我分得清清楚楚。

以為這是一次「純粹巧合」，可惜錯了。緊接著，是有線的藝員站台打氣，報導最新的捐款情況，tvb第一時間，又來一個台下訪問，我看得怒從中來，馬上轉台看atv，看看atv會否如此小家，沒有﹗atv的畫面出現了有線的藝人打氣情況，我的老天，ATV繼上次捐出三日廣告後，再一次令我對它肅然起敬。別忘記，今次的轉播，ATV是「無間斷播放不播廣告」，世界盃後再創無廣告的壯舉。你可以笑ATV廣告一向都少，但起碼ATV願意擺出這份姿態。

相比起第一大台，我感到噁心，為何要小家至此？如果你咁介意被ATV或有線的成員在你寶貴的頻道亮相，那麼你便不要參加這個「中港台三地藝人不分你我」的大匯演啦﹗說明是聯播，所有台的演員都會出現，那一刻大家想的應該是如何同心賑款，似乎只有你們的高層，還在介意「有無蝕底左」。

你再捐多一億，我都係咁話﹕好假﹗

話說打到其中一位議員，道明來意，對方助理竟然話﹕其實你地搵到黎阿xx議員，都知你之前咩事啦。

吓？？我完全唔明佢講乜？打得俾佢即係…即係咩事呢？

助手繼續一副看破世情、洞悉先機咁款懶形咁話﹕你搵得阿xx，即係之前都好多人推左你地啦？係咪？

嘩﹗﹗天地良心，絕無此意，我解釋到口水都乾，但對方一副「俾我踢爆左死唔肯認」的姿態，相當「諒解地」說﹕算啦，明啦，留低電話明天答你。

哈哈﹗天下奇聞。我思前想後，得出一個結論﹕這個xx議員自我感覺相當…相當不良好。自我形象甚低，覺得好人好姐首選都唔會搵佢，所以搵得佢，因為係水尾搵人攝場。佢可能都真係遇唔少呢d場景，所以搞到佢都心灰意冷，唔相信世間。呵，陰功，從政者壓力都真係好大。

不過，呢種諗法，我都有試過。自己無信心，自己都唔信自己有賣點去吸引人，所以偶然發市有人搵自己做呢做路，我都會諗﹕點解搵我？係咪搵唔到人？

最後我練成左絕招﹕或者我係第二或第十二選擇，但無論如何，我都係一個選擇，都有人要。得左﹗呵呵。

你諗下，舒夫真高，佢連次選既機會都無啊，出卡勞都無佢份，你就知道，唔係諗住退而求其次，人地就一定搵你的。有得出，就要出啦。

問題黎啦﹕已經係月尾，糧餉短缺、又一個月儲唔到錢、有咩資格去shopping。仲有，男人老狗一枝弓原來無可能好似女人咁，可以自得其樂去血拼。

有一次，青木部落同我講，佢話最驚一個人買衫，一定買唔到，仲屈我兩條麻甩仔一齊買。我好記得個次既shopping，係佢揀衫既時候，我儘量行得遠d、儘量顯得我唔係好care佢買黑色定白色，我唔想有人拍我膊頭﹕先生，放心，我地唔會歧視你地。

咁我一條友，可以shop甚麼呢？旺角二樓書店。買書最大的樂趣，就是無目的買書。你完全不知道推開門，書堆裏放有甚麼書， 然後你就像咸濕皇帝，看看滿園書本如何在你面前擠眉弄眼、騷首弄姿﹕求你臨幸我啦。呵呵。

第一本心思思的是《都江堰﹕兩個世紀的變遷》，大量圖片記錄這個偉大水利工程周遭景物的變遷。當然，地震災後，你會特別關注這個地方。書店老細很懂得應節入貨。這才發現，都江堰原來在1920年代已經受過一次地震，水利工程也受到破壞。看來，天府之國一直都是飽受劫難。

第二本要買的，是石康的《北京姑娘》。這是一本封了膠的書冊，硬皮精裝但薄薄的，索價廿五，我認為是貴。不過，作者是石康，是一個近來我很喜歡的作家。這位人兄的作品，我認為充滿頹廢和陰暗，他筆下的城市很專一，就是北京。我就愛這種陰沉的格調，每一頁都充滿了香煙、酒精、女人、文藝、喃喃、不滿、愛情、理想，他的文字看多了覺得有點造作，但我就愛這份氣氛。他筆下的北京，沒有了政治的嚴肅、文化的深沉，更多的是一種燥動和…浪漫。我愛死這種感覺。一幫搞文藝的人，終日在女人和創作和生活之間，吐著一個個煙圈、過一個個北京日與夜。這種小說沒有甚麼情節，更多時候是聽作者的夢囈，你會喜歡這作感覺，如果你也喜歡這個作者，喜歡這個城市。

第三本是卓韻芝的《蘋果中文是甚麼》。也是最快看完的一本。這本書給我很多啟示，包括「知唔知自己有咩願望」這一章。我發覺，自己唔知自己有咩願望，我淨係想好多人識，但原來自己一直無諗過，我想自己以一種點樣既狀態俾人識？就是說，不知自己想點、不知自己方向。睇完發覺﹕佢仲後生過自己，點解你諗到咁多野？

自我安慰﹕女人係早熟過男人。