咩叫自投羅網？

主動幫襯街邊的收費電視申請計劃，就是自投羅網。

正是天堂有路你不走，地獄無門你創進來，老細，貴姓啊？

其實這些收費電視的營業員，和政客是很相似的。

在旺角西洋菜街，大家都擺檔，大家都吶喊拉客，一個需要你的選票，一個需要你的鈔票。

為了拉票，大家都開出各式期票，呢個話包你玩鋪勁，個個話包你睇鋪勁。

最重要，在拉票競邉期間，你是很容易就找到這些人士，晨早到晚笑臉相迎，唔怕要做幾多，最怕你唔call我。        市民很容易會和這政客握到手享受所謂親民的成果，顧客也能得到這些服務員熱情而快速的回應。

一切都在俾票之前發生

俾票後，你會發覺，好似好少再見到個政客攞黎我地個籠屋區都瞓一覺啦喎，做乜呢排無黎探訪獨居婆婆既。

你亦發現，個申請熱線快如閃電有人聽，查詢其他服務就不斷叫你等等。

終於你諗起啦，當年政界有所謂「政治黑洞」，即係話好多訴求入到去就泥牛入海無人理，而收費電視既客戶服務亦有嚴重既黑洞傾向，電話入到去，消失得無影無踪。

終於，你用愚公移山的耐性、鐵柱磨成針的毅力，等到有客戶服務員同你真人對話，而經過n個部門的互相傳球之後，你亦搵到你既真愛，一個負責既政府部門出現啦。

然後，你會發覺，ao，同cs，即係客戶服務，係做緊同一個工作，就係「厭惡性」工作，基本上係要媽咪陪同返工隨時攞出黎。

而最大最大既問題就係，佢地其實係無姑架。你問佢點解咁耐都申請唔到公屋，佢話規矩係咁；你問點解佢地收多左你費用又唔俾cut，佢話規矩黎架。

佢地唔係唔知自己既答案係幾咁蒼白無力同無令人反感，但佢地都唔想，係個公司係個政策定得差，佢地只係「負責執行order」既人士。佢地只能照本宣科，佢地無奈地接受殘酷既現實，但就要被逼向你推介一個美好既將來。

有個高人講過，個d政治任命既官員其實真正既身份係sell屎，唔係推銷員咁簡單，係真係sell一舊屎既sell 屎。明明接到既order係一pat屎，要你硬銷普選方案係真普選，要你sell菜園村，你都sell，仲要sell到佢最少變成一舊榴槤……

做客戶服務既何嘗唔係咁呢？聽日係世界盃今日申請即刻有得睇，但取消既可能要等到下屆世界盃，客戶服務員佢地都知係不合理，但佢地仲係被逼答你「呢個係公司既程序安排」

前投資推廣署既盧維思出版回憶錄，講維港巨星匯一鑊粥，廚師唔駛罰買材料個個唔駛罰，就罰左呢個負責上菜既執行公務員。

我諗對盧維思黎講，佢有責無權，所以覺得自己陰功。

廣大既客戶服務員都差唔多，你問佢幾時可以裝到個個免費送既高清解碼器，佢只能講夠兩個月內，但講唔到一個切實既日期。

我諗佢一定心諗﹕先生，我可以決定到幾時裝既話我晨早話左你知啦，駛鬼俾你係咁鬧我又答唔到你咩。

無錯，呢d就係有責無權既可憐遭遇。