一個發展唔到辦公室戀情既辦公室，

絕對唔係一個好既辦公室﹗ 

我一度以為，係辦公室搞戀情係正常，唔搞先係唔正常。

小學，你會暗戀隔離位既妺妺；中學，你認為隔離位個個暗戀你；大學，你攞哂所有so既申請表，然後以女會員的質素同埋會費既多寡去判斷係咪留低。 

一路以來，我地都係「靠山摘野菓、近水食魚生」，就地取材，無理由捨近就遠架。 

咁你話啦，大個左做野，點可能唔係辦公室一展拳腳？ 

不過，抱住呢個心態，通常你第一日返工就已經想轉工。

你會發覺，點解呢間公司會請埋咁多清潔阿嬸既？莫非真係咁污糟？而呢間公司點解對d清潔阿嬸咁好既？俾佢地著哂suit仲可以著高踭鞋黎拖地既……然後你發覺，sorry，原來佢地全部都係，你既同事。 

原來OL後面唔一定係跟住「誘惑」兩個字，OL同清潔阿嬸唯一分別，原來就係套製服。 

你開始發覺，過往十幾年睇既日劇，都係呃你既，你做左成年都見唔到木村，你等左十年都見唔到松隆子。

甚至我有期待過，有無d好似求婚的惡魔咁，有個Sandra Bullock既女上司都好啊…中女我唔介意，我願意以肉體和權力作交換……可惜，連穿prada的惡魔裏面既熟女梅惡斯翠普都無。 

有，都有既，齋惡魔一隻，你要唔要？ 

於是，大部分既上司好似甘仔咁既樣，而所謂既女同事，可能就係所謂既電視之花咁樣。 

我好認真講，公司如果男女質素太過惡劣，做呢份工就屬於厭惡性行業。

 員工工作態度會好散漫，無人會願意OT，因為無足夠靚既OL 去支持我去OT、無足夠多既幻想去支持我做到黑夜降臨；同事關係一定唔會好囉因為有代溝啊你明唔明？唔會有激發同事小宇宙既機會、我邊有動力用我成份糧去買套c.k.著先得架著﹗俾邊個睇？你只會令我更想早d收工去老蘭浦完全無心戀戰……公司肯定倒閉﹗ 

所以，一個發展唔到辦公室戀情既辦公室，絕對唔係一個好既辦公室﹗我話既﹗