豪語錄二﹕波係圓既

 呢句豪言大家都知係伍晃榮講既。

波係圓既，波亦係會完既，如果話人生好似一場波，咁伍晃榮尋日就完結左，佢多姿多采既人生賽事。

人生好似一場波，有朝氣勃勃既開場儀式，有抖氣既半場休息時間，當然亦會有，全場踢完的哨子聲。

完場哨子係我最欣賞既結束方式，完場哨子係兩短，一長。呢個節奏似足我地所講既「三長兩短」，但最重要就係，佢俾到我地足夠既心理準備。

第一下短既時候，爭左大半場波既球員，都會慢慢停低；

聽到第二下短既時候，本來仲係禁區捕住、等待最後一擊既，亦會放棄。

第三下，長長既哨子響起，剛才鬥到你死我活既，會拉拉手，相逢一笑泯恩仇。

不過，唔係每一場波，都係由完場哨子黎結束。

細個落波地踢波，柴娃娃，無人同你吹哨子，你會遇到好多突發情況﹕

包括街燈突然熄左、租場既阿嬋黎趕你走，又或者有人腳抽筋將最後一個波踢左落九十幾樓落唔番黎，個陣我已經明白，咩叫世事無常，每一場賽事，都會有唔同既完結方法。

足球比起籃球更接近人生，因為足球更殘酷。

足球同籃球一樣可以換人，分別就係，籃球員換離場後，仲有機會可以換返入場；足球員一被換出，你無機會再入返黎。

如果你一生只能夠踢一場波，咁你就等於game over。

於是我成日諗，我幾時會被人換走？如果被人換走，咁你可唔可以話俾我知，我係打緊籃球，定踢緊足球？

波係圓既，波，亦係會完既。