香港新浪網 MySinaBlog
魚皇 | 7th Sep 2012, 00:06 | 創作 | (196 Reads)

真係有個不幸既消息要宣布,

 

就係《頭條新聞》鐵定十月回歸……but……but……

 

我地會係,收左一萬宗投訴既個個焦點電視台播出﹗﹗shit﹗﹗﹗呢鋪真

 

係…唔知佢地不幸,定我地陰功啦。


魚皇 | 6th Sep 2012, 23:55 | 創作 | (146 Reads)
豪語錄﹕國民教育

如果你從未認識過反國民教育呢個行動,你唔明白發生乜野事,咁你真係要聽下我解釋啦。

你係一個顧客,入到一間餐廳,你想嗌常餐,侍應話無,然後推介一個特別菜式俾你,但菜式內容,餐牌係無寫既,總之就話係好野黎既

你猶疑,唔係好敢食,因為唔知食D乜,又唔知要幾多錢,究竟啱唔啱自己味道呢,你全部唔知。

你不斷推辭,同侍應拉拉扯扯過程中,跌左張菜譜出黎,你一睇,唔係話,呢個特別菜式,竟然係用地溝油頭髮豉油黎煮既,真係會食死人架喎。

你攞左呢張菜譜同侍應抗議,侍應笑笑口話,呢張菜譜純粹參考,唔代表本餐廳立場,如果你真係唔滿意呢張菜譜,我地可以收番。

不過無論如何,個侍應都係要求你,一定要食呢個特別菜式。

各位,黎到呢一刻,你係個食客,你會點反應?你會唔會食呢?

係,道菜的確未煮出黎,你的確唔可以話道菜一定好難食,但大佬﹗之前已經見過你個張「地溝油加頭髪豉油」既菜譜,真係珠玉在前,點知你之後會唔會煮d仲過份既野過黎呢?同埋我完全唔知呢道菜有咩內容,我點可以啃得落呢?正常你都會叫廚房撤回呢道菜啦。

今日國民教育就好似呢道特別菜式,我地本來係有中國歷史科呢個常餐,點知前幾年被取消做必修科,然後生左呢個「國民教育」特別菜式,仲要整左本「中國模式」的參考課本,將共產黨形容為「進步無私團結」,完全係地溝油頭髪豉油既烹飪方法啦。

你見到點會唔驚?後來多方要求,政府先話收番本野,但跟住仍然要你接受國民教育科。各位家長老師同學,你問下自己,你點可以呃自己照食呢?

有人話,學生好獨立,邊有咁易洗到腦呢?

呢個比喻好簡單,學生意志咁堅強,邊有咁易上毒癮呢?邊有咁易上煙癮呢?

有人話,我地有良心教師,做最後把關,邊有咁易洗到腦呢?

好簡單,第一,如果我個個唔係良心教師,而係拍檯老師,咁點算?

仲有,你可唔可以話,地溝油唔駛驚,我地有良心廚師,佢會幫我地隔左D地溝油架啦。可唔可能呢?

有人話,家陣政府都話未有教材,民間都未有教材,你反乜鬼先得架,撤咩回呢?

其實同樣理由回贈政府就得架啦,家陣教材都未有,老師都話未準備好,你展開乜鬼先得架。就好似酒樓都未BOOK教堂又未有婚妙未買帖又未印最緊係要連個對象都未有啊嘛,偏偏你就一定要我地過左門先……點啊﹗

我們既家長,連邊隻奶粉會令BB有便便暢通都鬼死咁緊張,今次你餵隻唔知乜野成份既奶粉俾細路飲,你話天下父母點樣忍?點會唔企出黎抗議?