香港新浪網 MySinaBlog
魚皇 | 29th Jul 2010, 14:44 | 創作 | (233 Reads)

我想和你說個小故事

有一天,一個小偷犯案時失手被捕;法官審案,問﹕你為甚麼要偷東西?

小偷神情驕傲的說﹕因為我以後要做警務署長。

法官驚奇﹕甚麼?你今天偷東西,是為明天做署長作準備?

小偷﹕不錯﹗因為我要培養對法紀的興趣,所以我才破壞法紀。我相信我日後定能勝任維護法紀的任務。

法官搖頭。警察又捉來一個強姦犯。

法官又問﹕你為甚麼要強姦?

強姦犯﹕因為我以後要做保護婦女委員會的工作。

法官大驚﹕甚麼?你今天強姦婦女,是為明天保護婦女做準備?

強姦﹕對啊,我今天強姦婦女,便會培養出對婦女的興趣,我相信我日後定能勝任保護婦女的重任。相信我吧。 

各位,虛構的故事有夠荒謬了吧。

但更荒謬的是,這個故事成為了真實。

下周開始,便有新的私隱專員登場了。

這幾天標尾會發威的私隱專員吳斌要退場了。

只能說這個球員發力太遲,完場進入補時階段才走動射門。

我不能會讚他戰至一刻,我只會怪他﹕怎麼去到最後一刻才戰?

好了,吳斌走了,誰人上任?一個叫做蔣任宏的前高官登場。

他做過郵政署長,任內發生在長沙灣郵政局裝設針孔攝錄機,關愛關心關注員工的一舉一動。又試過擅自將求職者資料披露給兩間外判的人力資源顧問公司,做法和今天被批判的八達通公司幾無兩樣。

你侵犯過別人私隱,為何突然會變成保護私隱的要員?

他說﹕侵犯私隱事件引起自己對私隱的興趣。

各位,就是這個理由,小偷應該做警務署長,強姦犯可以做保護婦女會主席。

犯事之後,不是得到了教訓,反而培養了興趣,天下間的興趣班都要犯法才能開下去。 

或許你會說,曾志豪,你歧視曾經犯過事的人;蔣生就算曾經行差踏錯,難道就一世不能改過嗎?很多吸過毒的朋友都勸人戒毒,又有何問題了?

問題在於﹕吸過毒的人,他努力讓世人都看到,他戒毒了,他健康了,他改過了。他們用行動讓大家都知道他們真的得到教訓了。

然而,我們實在不知道,蔣任宏他如何改過自新,如何由一個侵犯私隱的人變成一個私隱鬥士。

大哥,你做場戲都要參加一些甚麼全港私隱標語創作大賽,好歹也拿個第一第二,「私隱好重要,保護不可少」。洗底都要拿些誠意拿些肥皂水係咁意也要拿塊海棉擦擦個身,不是自己說吸取左教訓就可以的。

還有,政府的機關職位,幾時變成,你有興趣就可以參加的「興趣班」?蔣生對私隱發生左興趣,我就要讓你和私隱專員發生關係了嗎?

你有心,我唔知;你有無力? 你自己都唔知。

最少,你無講俾我地知你有無力?

有心無力,要來何用?

我們的私隱,總不會成為你的訓練試驗白老鼠吧?

我想了很久都想不通,為何要找一個犯過侵犯私隱的人來做私隱專員,雖然蠢係可以解釋一切,正如打假波可以解釋一切不合理賽果;但我不願意如此偷懶。

我想通了。

蔣生零三至零六年出任郵政署長,成功改革香港郵政,帶領部門由蝕錢變成賺錢。

他的賺錢的能力,有目共睹。

但私隱專員公署又不是做生意,如何賺錢?

大家都忘記了,私隱才是最值錢的資料。MENPOWER MENPOWER,八達通事件令我們知道,私隱有價。

不過卻只是賤價。二百萬客戶的私隱,只賣了四千萬。

每人值廿蚊。

天﹗張廿蚊﹗﹗市民私隱,低過最低工資﹗﹗

這完全是一種浪費﹗﹗私隱喎﹗﹗買本八卦雜誌爆咁多陰私都唔止啦……唔係喎﹗個D乜周物周每期賣咁多私隱,都係講緊廿蚊本咋喎。個D仲要分埋BOOK A BOOK B,有明星名人東南西北都有,都係只售廿蚊﹗﹗難怪普通市民的私隱價都係廿蚊。

有見及此,特意找來一個曾令部門賺錢的人來做私隱專員,別的不要說了,與其讓你八達通九達通自己賣資料,倒不如自己賺埋,肥水不流別人田,私隱專員開個靚價,公開拍賣,你乜野保險公司唔駛向其他扮好心俾市民著數實情係攞緊市民著數既機構買資料啦,直接搵私隱專員公署,分門別類,應有盡有。

即係話,日後我地私隱有價,直接落埋庫房,我地行出街更有自信,因為我地已經為呢個城市貢獻左好多。下次八達通無錢,去增值,你同職員講,我一個人既私隱起碼值廿蚊,唔該增值。

五十蚊按金都可以唔駛交啦,我最多話你知我結左婚未啦,好多明星都係靠呢D消息黎賣錢架﹗點啊,按金唔駛交啦。

如果蔣生可以幫我地爭取將私隱變賣換錢增值扣數,咁我都會對蔣生發生興趣,話唔定仲有少少鐘意佢添。蔣生,唔知你有無申請個人八達通呢?


魚皇 | 29th Jul 2010, 14:42 | 創作 | (68 Reads)

各位親愛的同志﹕

《大國勃起》鐵定於下星期,隆重勃起,昂首向天。

各大書局,屏息靜氣,迎接大國來臨﹗

多謝

 曾志豪


魚皇 | 28th Jul 2010, 01:36 | 創作 | (167 Reads)

呢個星期,多謝八達通,佢教識我地好多野,好似一個通識科老師咁樣。

 例如我地終於知道,點解八達通過機既時候會「嘟」一聲,因為當你諗起自己既私隱已經係自己唔知情但又同意左既情況底下,運左去唔知邊個國家地區唔知既人手裏面既時候,真係怒從心中氣,好想即時炒蝦拆蟹。 

但你要記住,第一,港鐵附例,唔准係港鐵範圍煮食炒野同拆野。

 

第二,港鐵講明,唔准講粗口。

 所以,八達通公司好有預謀好有遠見好有理想咁幫我地用一個「嘟」聲代替左「媽媽聲」。 

每次過機,八達通都自己鬧左自己一次,嘟嘟嘟,我自己鬧左自己,你滿意啦? 

其實我地真係多謝八達通,係佢令我,呢d咁平凡既小市民,拾回人生既價值。

其實我地一向知道,私隱有價,如果唔係外國邊有咁多咩tiger女郎、c朗拿度女郎、戈爾按摩女出黎爆料話對方既性能力有幾強先得架。

私隱從來有價,視乎你身份地位名氣,好多明星博哂老命都係想你登佢下d私隱,陳年舊相隨時發放。

 我等平民真係想俾人侵犯都侵犯唔到,好囉,全靠八達通,二百萬客戶私隱,賣左四千幾萬,除開每人私隱值大概廿元。

 Shit﹗張廿蚊﹗平民私隱,低過最低工資﹗

Okok,我明,起碼我地都有身價,我地有價值,原來有人願意俾錢去知道我有無結婚同我既電話號碼。

好多宅男心諗,我等左好耐,都無人肯問我攞電話,家陣唔止有人想知,仲想俾錢黎攞,嘩﹗我覺得自己好似升左lv囉﹗我唔係籮底橙,原來個個都想知我既私隱﹗自信心返翻黎﹗ 

仲有,經過導遊阿珍事件,我地明白,世上無免費午餐架。幾百蚊點解可以黎到香港玩?你梗係要聽下阿珍既訓話啦、促進主要係紅磡一帶商戶既經濟繁榮啦。

 

咁你話啦,無端端點解要俾你日日賞啦?同你有親咩?咁多商戶爭住無私奉獻俾你?你梗係要付出代價啦﹗

人地就強逼你買野,我地就強逼你賣野;

你想買珠寶,定係賣私隱呢? 

諗落導遊阿珍同八達通陳碧鏵處境真係一模一樣,大家都係分佣之嘛,阿珍sell得一件產品就收一份佣;八達通每促成一宗保險交易,又分到一份佣。

所以兩個女人都可以大聲講「我沒有欠你們,是你欠我的﹗﹗今個月仲爭一個私隱客人未買保單﹗﹗你唔好累到我地公司蝕錢啊?」

 

兩相比較,我又同情阿珍多d。起碼佢出黎誠實,唔會話自己無鬧過遊客,唔會好似八達通ceo陳碧鏵咁,「我對於何謂出售客人私隱」有唔同理解囉」。

阿珍未學識呢招中環人既無賴技倆,「我諗大家對何謂鬧遊客有唔同理解囉﹗」 阿珍仲誠實,起碼佢話客人知道自己要簽一份同意購物既協議書,唔似八達通日日賞既用戶,申請完都唔知自己原來同意私隱四通八達。

八達通仲幫左我地一個忙,下次想驗眼check視力,唔得閒搵視光師,攞返日日賞既申請表格,你望下呢個咩字?同意啊﹗咁都望唔到?配鏡啦﹗配番付「哈勃望遠鏡」啦﹗

咁都望到? 哦﹗你仲唔係陳碧鏵??全港我諗得佢一個睇到同埋會睇呢d文字囉。

八月一日建軍節,廣州既朋友呼籲我地一齊打廣東話保衛戰﹗我有個提議,不如將八達通既嘟一聲,改改佢,變成袁崇煥既名句啦,「掉那媽﹗頂硬上﹗」

 反正袁崇煥呢句都已經無容身之所,慘遭永久嘟走,我地幫廣州同胞發聲又何妨?最重要係,你可以唔用呢個獨大壟斷既八達通咩?如果唔得,你仲唔係要講個句「頂硬上」?

魚皇 | 27th Jul 2010, 17:55 | 創作 | (294 Reads)
「中女宅男惡補訓練——搭訕開場白訓練」

第一課﹕「小姐,我朋友想認識你。」

用法﹕裝模作樣虛構一個存在或不存在的第三者,以介紹這個第三者作為話題,講壞話講笑話幫這個第三者出主意,以達到和目標溝通增進了解的目的。

好處﹕失敗的話,有替死鬼。自我安慰解圍,不關我事,是她對我朋友無興趣矣。

壞處﹕對方真的對那個「朋友第三者」有興趣,你就真是為她人作嫁衣。


模擬訓練

男﹕小姐,你可唔可以放過我朋友?
女﹕咩話?你講乜?
男﹕你可唔可以唔好坐響度?
女﹕痴線,間鋪頭你開架?我點解唔坐得響度?
男﹕我朋友淨係掛住望住你,完全集中唔到精神,我地唔駛傾計啦。
女﹕吓?咁即係點?
男﹕一就你坐埋黎,同我個friend傾計
女﹕我拒絕。
男﹕咁我只能送你離開呢度,唔好再搞到我個fr,我架車係出面。

魚皇 | 27th Jul 2010, 00:47 | 無火日記 | (100 Reads)

邱騰華親自登上無開冷氣的的士、小巴、巴士,親身體驗「有幾熱」。

反智年代﹕堂堂局長要親身體驗才能得知在一個密閉車廂無空調是怎樣的一種感覺。就好像有人告訴你,我要親自用刀割自己一下感受究竟是不是會痛﹗﹗他媽的這個社會怎麼了?有沒有人跳出來﹕我要試一下才知道屎是不是臭的……要親身體驗才明白的話,不代表你有心,是你無腦罷了。


魚皇 | 26th Jul 2010, 23:45 | 無火日記 | (823 Reads)

騙人的半杯水故事

 

不是所有場合都要勸人接受﹕「你還有半杯水啊」。

有時也要警告自己﹕「喂﹗你只剩半杯水了」。

騙人來源﹕

n年前老土得掉牙土得掉渣土得掉哪媽的心靈雞湯故事「半杯水」。

一個人面前有半杯水,他悲觀的說﹕我只剩半杯水。

有個聖人智者偉大的導師君臨天下對他說﹕「愚蠢的人啊﹗你為甚麼便不想想,自己還有足足半杯水呢?」

仙樂齊奏、鮮花滿途、黑暗前途從此光亮,凡人拿著半杯水,快快樂樂的生活去了……(全文完)

停﹗﹗這個故事未完,這個故事,是一個大騙局﹗

 

如果你在一個水源充足、綠樹成蔭的山林清泉神仙福地,你的確可以大條道理向那個對著半杯水垂頭喪氣的傢伙說一句﹕「別哭了﹗你不是還有半杯水嗎?」

反正,你就算不小心打瀉這半杯水,你還是有喝不完的水等待你。

但如果你身處大漠穹蒼、乾枯瘦瘪的赤地千里,你對著半杯水,你難道不應該警告自己﹕「別亂喝﹗只剩下半杯水了﹗」

 

如果你聽信了那些見鬼的心靈雞湯故事,凡事都要想得樂觀、積极、正面、大愛、和諧……明明身處險情還要安慰自己﹕「我不是還有半杯水嗎?我不是可以安心呆在原地不用動身找水源、不用傷腦筋省水儉喝嗎?」

 

喝那見鬼的心靈雞湯吧﹗暢快地高興地把那僅有的半杯水視作「我還有半杯水」愉快義無反顧的喝掉吧﹗﹗下一分鐘,你便是一個死人。

對了,你 對著空無一點水的杯,你還是能安慰自己﹕「太好了﹗杯子要是滿了,如何能盛更多的水?做人千萬不要自滿,虛心的人才能學習新事物啊﹗」

 

做人有時便要殘酷一點,理智一點,居安思危,時時警惕自己「只剩半杯水了」。

 生於憂患,死於安逸,信矣﹗

魚皇 | 26th Jul 2010, 17:11 | 無火日記 | (61 Reads)
2764773-20100726427.jpg

魚皇 | 23rd Jul 2010, 16:27 | 創作 | (1125 Reads)

《大國勃起》簽名會 七月二十四日 下午兩點

地點﹕簽名區B區 博覽道入口大堂4 號簽名台

 

PicturePicture


魚皇 | 23rd Jul 2010, 08:46 | 無火日記 | (49 Reads)
2757274-20100722380.jpg

魚皇 | 23rd Jul 2010, 08:46 | 無火日記 | (19 Reads)
2757273-20100722381.jpg

Next