香港新浪網 MySinaBlog
魚皇 | 30th Oct 2008, 14:40 | 創作 | (740 Reads)
傳說中,鬼買東西時,表面給你一張張花緣緣的銀,當你滿心歡喜收下,第二天卻發現…全部變成陰司紙﹗﹗你見財化水﹗你欲哭無淚﹗你有冤無路訴﹗你撞鬼﹗

今日,香港都有很多人撞鬼,他們手上的一張張既股票,突然變成一張張的牆紙﹗一張張既債券,突然變成一張張贖回價是零的廢紙﹗﹗

 (閱讀全文)

魚皇 | 23rd Oct 2008, 15:27 | 創作 | (1945 Reads)

今集豪語錄的鬼故事,絕對係真人真事改編,無呃你,呢個故事,仲要發生係香港,呢集要講既鬼,你一定聽過,唔止聽過,仲要係見過添。呢隻鬼就係,替死鬼啦。

 (閱讀全文)

魚皇 | 20th Oct 2008, 15:34 | 創作 | (803 Reads)

終於找回文章,這篇《豪語》有那麼一點點「公器私用」,因為講述的是自己在一台工作的溫馨時光,有很多個不捨;看完之後,希望你也能體會到,我們的工作是多麼的美好。

=========================================================

facebook看了一組相片,標題是﹕最美好的時光。

 第一張相,是鬆郁矇的代表作,明顯是手機作品,光影搖動,可以想像拍攝者雙手震抖的模樣?為何要如此激動?依稀只看見兩個男人伏案的背影,其餘資料欠奉。 相片說明文字如下﹕從我的位看出去,就是這麼的一個光景:「青衣黑豹」&「濠涌黎明」。

Picture

兩個可疑的名字,只能判斷這張照片絕非動物照和風景相。 

第二張明顯忍住了笑、平伏了心情,輪廓分明,還是那個男子,但衣著清晰,一個花花裇衫,一個卡其色西裝,這次看清楚了,原來兩個男子在伏案…睡覺。不能不提的是,案發現場明顯是辦公室。

 相片說明如下﹕他們的兩大功能:

: 我搬不動的東西, 他們都願意搬(雖然總要先來一番推讓)
: 午飯時吃不完的東西, 他們都願意吃(雖然總要先來一番包剪揼)
 似乎,這兩個人的職責就是搬運和執手尾。 

Picture

第三張,仍是兩個男子的熟睡背影,不過今次取景明顯進取,直插心腹地帶,連睡覺現場的辦公桌的陳設都拍得毫畢現。

 工作十多小時後不支倒下....In this photo:       一堆已分不清你我的垃圾 , 可憐的CD,天天要唱張如城>.< ,

Picture

第四張,兩個男人終於起身,但樣貎仍然模糊不清,很可能拍攝者被突然睡醒的目標嚇得逃離現場所以又出現手震效果。但唯一可見的,卻是兩頭餓獸甫起身便開懷大嚼。

Picture

 第五張,兩個男人終於以真面目示人,左右對望,眼神堅定,沒有離開過對方手中的薯片,從口形實在無法判斷二人的對話,幸好,相片文字說明一切。

 濠涌黎明:我要暫別香港娛樂圈 , 青衣黑豹:我要去隔離埠登台

Picture

無錯,謎題已經解開,真相已經大白,相中人,其中一個是我同事,葉冠霖,另一個,當然就是小弟。 你可以估下,誰是青衣黑豹,誰又是濠涌黎明?

 收到這組相片我已是嚇得目瞪口呆,怎麼被人偷影了這許多張相片,又是睡覺又是偷食,我完全茫然不知,所以無經驗就是無經驗,唔扮得自己好紅的,行家一出手,就知有沒有。

再看看相片的標題,卻又是一陣莫名的感動﹕最好的時光。 那還真是最好的時光啊,做完節目便和同事吹水鬥嘴,累了便睡,起身肚餓便搶掠同事辛勤儲存的食糧,有時你都忘記了自己身處辦公室,感覺就像回到校園搞SO搞莊一樣的情景。 

我知道這些情景一定好多打工仔羡慕,沒有騙你,入了港台八年,有一個很嚴重的後遺症,我幾乎和外面的朋友,失去共同話題。原因很簡單,舉杯碰頭,吞雲吐霧,第三項指定動作便是篤老細背脊、講同事壞話、玩辦公室政治。人人講得口沬橫飛,簡直係溏心風暴金枝慾孽,輪到我,所有人望住我,我張口結舌,唔知講乜?

你有無遇到吞POP A膊的同事?無……個個做到鬥夜就有。 你有無遇到無良老細咩橋都BAN你?A…好似又無,佢反而咩都讚你做得好……

有無同事出陰招見死不救獨善其身幸災樂禍?好似又無……反而係個個都想捉住我隻手教我點做我懷欵佢地想借故親近我……

 車﹗﹗都唔好玩既﹗﹗你簡直好似活在溫室中的小花,你脫節啦你﹗

 無錯。我覺得我工作的環境真係脫左節,係我身邊遇到所謂再谷氣的事,拿到出面同人比較,簡直係小毛見大毛。 

可是,這亦是工作的動力。

係度做為乜啫?為份糧啊?攞綜援好過啦﹗都係為滿足,為開心啫。無錯,工作表現是一種滿足,同事融洽也是一種開心,起碼你返到公司,唔駛戴另一張面具,唔駛做大龍鳯。

想起以前讀書寫紀念冊的日子,那還是讀小學的年頭,或許老師怕我們這些不識愁滋味的少年表達不了心中應該有的離愁別緒,竟然派了一張寫紀念冊的天書貓紙,附上一百零八例紀念冊金句,我還記得很清楚﹕萬里長城萬里長,我倆友誼比他長。校園門前說紛飛,我倆友誼永不離。紀念冊中留紀念,莫忘紀念冊中人等等等。結果同一時間學校多了幾十條萬里長城……

中學後不彈此調久矣,今天這組照片,就好像收到紀念冊一般,當然,少了倒背如流的金句,或許這一切,就如同事為照片起的標題一樣﹕最好的時光。

 最後,你猜到誰是青衣黑豹嗎?無錯,就是小弟,原因很簡單,老家住青衣,我很喜歡黑豹樂隊,在卡拉OK肆意高唱難聽之极的黑豹,實在是很值得紀念的日子。


魚皇 | 20th Oct 2008, 15:24 | 創作 | (326 Reads)

真係好渣,我睇返自己早兩日呢篇blog,簡直係一個弱者響樹無病呻吟咁樣,搞到各位哥哥姐姐出手安慰,咁大個人,我都有少少面紅……

好多謝各位網友救小弟於水深火熱之中,我會埋怨少d、努力多d。

不過有時,自己都唔知「標準」 在哪裏?

今日做完節目,我覺得笑得好開心,但又好像除了笑,沒有甚他實質內容,內心正自忐忑,卻收到不少朋友正面的稱讚。

怎麼辦?

或許要趕快找回自己的感覺。


魚皇 | 18th Oct 2008, 09:34 | 創作 | (369 Reads)

上集說了搜神記的故事,宋定伯賣鬼;今天跟大家講一個,聊齋誌異。這個故事,沒有畫皮、聶小倩這些故事耳熟能詳,不過,聽著聽著,總覺現實在,這些事情,似曾相識。這個故事,叫「靈官」。

所謂靈官,是道教之中護法神的稱號,庇佑萬民,你去廟觀隨意參觀,都會看見慈眉善目的神像。

話說有個地方,有一個道教廟觀,名為「朝天觀」,有道士喜好吐納之術,就是如何吐出空氣,納入罡氣,透過一呼一吸達致養生煉氣。正所謂長生秘芨,就在呼吸,這句話,是我曾某人隨口up。

不過呢d吐納之術實在沉悶,整天不動一呼一吸,搞不好人家以為你是神經病半天不動,所以道士難有同道中人,苦悶至深。剛好一天,有老翁來到觀中,見道士咁悶,於是陪佢齊齊打坐吐納呼氣,兩個人成為莫逆之交。

不過呢個老翁古古怪怪,兩個住埋一齊幾年,每年都係去到郊祭時節,老翁就會提早離開,要等個郊祭完左之後,先會返來。道士非常奇怪,最後忍不住問佢,你究竟搞乜鬼?你係咪出面有頭家啊?

老友就話﹕朋友,我當你一世朋友,唔怕話你知,我其實係一隻狐妖黎架﹗道士嚇一跳﹕吓?你係狐妖﹗﹗天啊,點解人地遇到既係女狐妖,唔食得都睇得啊,何解偏偏我要遇著一隻男狐妖呢??老翁安慰佢﹕唔好啦道兄,遲d我介紹屋企人你識啦。點解我要郊祭時候離開,因為呢段時間,诸神清秽除污去垢,我无所容身,唯有遠行避難。老道釋然,同呢個男狐妖繼續練吐納,閒時要打探佢仲有咩屋企人。又一年過去左,男狐妖又提早走人避年,今次仲答應會帶埋個妹黎見個道士。點知一去無回頭,錯過哂以往既歸期,道士心急如焚,但係凡人就可以燒香拜神祈求平安,佢道士就唔得啦,你點同個菩薩講呢﹕菩薩,我個狐妖朋友為左驚你追斬就走左去,唔知佢安唔安全呢?

終於,狐妖返到黎啦,成個落哂形,道士問佢做乜,佢話﹕我年年都走難,走到好攰,今次見到附近有條陰溝都幾隱秘下,所以就伏係度以為無事,誰知道,靈官原來將d污穢之物傾倒於此,俾我撞破左,靈官老怒欲鞭我,嚇到我沒命逃跑。

點知靈官追住死咬唔放,去到黃河之上,佢追到黎,我無計,唯有跳入一堆豬熼之中,佢厭堆糞便污糟,先唔再追我。但我成身糞便味,唔可以再留係人世,唯有投水洗乾淨,又係山洞匿埋避世幾百日,污糟味先無哂。我今日黎,係同你告別,你,都快d隱身離開啦,未來大劫將至,此絕非福地。轉身離開。道士亦走,隨後有甲申之變,所謂甲申之變就是指1644年李自成打進北京、吳三桂勾引滿清入關的禍亂……故事講完。 好啦,又係聽鬼故學做人既道理。 

第一,唔理呢隻男狐妖係正係邪,唔理佢會唔會害死人,理論上神妖不兩立,但最好笑係,佢同代表正氣既道士成為好朋友,一齊煉吐納養生之氣,甚至最後出言警告話佢知會有「甲申之變」的,都唔係道士信奉既靈官,而係呢隻狐妖,咁你話,你係道士,你信邊個?

 

第二,呢個靈官,實在相當吞pop。點解呢隻狐妖平時都可以自由自在咁係朝天觀度同道士練吐納咁寫意呢?平時靈官去左邊呢?似乎都係逢時過節先黎顯一顯靈,巡一巡場,平時唔做野,有事先做show,好似金管局同證監咁樣,平時唔見佢地有捉人架喎,個d把口浪個油既銀行推銷員可以自由自在係銀行度縱橫交際,幾時出黎除污去穢?咪就係出事既時候囉。

           呢個靈官個名都無改錯,官喎。

 

第三,逢郊祭既日子靈官就要黎除污趕鬼,係咪好似洗太平地既意味呢?甚至好似,係大時大節,就要粉飾太平,譬如話國慶啊京奧啊,成日都話要將城裏面個d咩外地民工三無人士上訪人士趕走既,個d民工都好精架,同呢個老狐一樣,知道平時都仲可以屈係城道,但一到大時節就要閃人,做二等公民,係咁上下啦。佩服聊齋,幾百年前已經預知今日中國既民情。

 

第四,所謂靈官除污,原來只係掩眼法,將d污穢物倒係溝渠下面就算,表面看不見,聞一聞臭氣衝天。大陸個d咩礦難,死左咁多人,官員都可以黎一招乾坤大挪移,將屍體移去第個地方捂埋就當係天災。老細都好鐘意咁樣處理問題,作為下屬既,你自己醒d,唔覺意撞破踢爆左老細除糞於溝渠既話,你自己執包袱。

 

第五,最大既啟示,點樣先可以避開靈官既窮追猛打?唯一方法,就係作賤自己,跳入一堆豬屎之中,係咪真係要將自己逼到窮途未路、d官先會放你一馬呢?

 第六,當然,最令人不解既就係,點解狐妖經過呢次事件,就會得出「必有大劫」既結論?大劫係源於,佢呢隻千年老狐妖竟然可以逍遙法外?定係,有靈官如此,大劫不遠呢? 唔,切勿對號入座,姑妄言之,姑聽之。

魚皇 | 17th Oct 2008, 22:40 | 創作 | (384 Reads)

最近經常問自己﹕我是誰?

想不到連blog友都問﹕你是誰?你是否真的9394咸濕佬?

看來,所謂的過檔洗底,相當成功。

不過,洗底可能連紫砂茶壺的茶垢都洗掉。

我不知道啊。我只感覺很累。

有人叫你「做回自己便可」,但有時又要你「別太正經嚴肅好嗎」?

但,兩者之間不可能同時出現的。

就像不能「又要做婊子又要立牌坊」。

今日有人和我說,覺得我好像,沒有從前出色,好像淹沒人群之中。

默然。

或許,人群長高了吧?


魚皇 | 10th Oct 2008, 16:22 | 創作 | (834 Reads)

很喜歡這個鬼故事,因為可以發揮和顛覆的空間很大。很多學生都讀過這篇課文,或許我們可以從另一個度看看人鬼之間。

========================================== 

 豪語錄﹕豪言亂語鬼故事

 

十月鬼氣衝天,不妨說說鬼故事。

鬼故事有甚麼好聽的?

聽鬼故,學做人;未知死,焉知生?

 

你現在聽到的背景音樂,就是大陸電視劇《聊齊先生》的主題曲,這齣電視劇由張鐵林,也就是《還珠格格》戲中扮演皇帝的那位演員擔綱。

歌詞有這麼一句「姑妄 言之,姑聽之」。

意思就是說,我姑且隨便講,亦請你姑且隨便聽聽,語出《莊子》。其實蠻適合印在每年施政報告的封面。

 

《聊齊》的故事,怪力亂神狐鬼妖道,當之無愧「姑妄言之,姑妄聽之」。《聊齊》已經成為中國鬼故事的代名詞,說聊齋等於說鬼故。日本奇幻文學作家,夢枕獏的代表作《陰陽師》,亦被冠以「日本聊齋」的美名。

 

今天為大家呈獻的第一個豪語鬼話,並非來自聊齋,而是一本成書比它更早千年的書,《搜神記》。對了,就是好彩妹個套搜神傳。故事叫做《宋定伯賣鬼》。

 話說南陽有人名叫宋定伯,夜行撞鬼,鬼話,我係鬼,你呢?宋定伯就呃鬼「我都係鬼。」鬼話﹕咁啱既呢次真係撞鬼啦。不如一齊行啦,你去邊啊?我去宛市,我都係喎。真鬼假鬼結伴同行。

行行下,鬼話﹕我地行得太慢啦,不如我地互揹,慳番d力啦。

宋定伯話好啊,鬼先揹佢,點知一上膊就重到死,鬼問﹕搞乜鬼你咁重?你唔通唔係鬼?

宋定伯話﹕唔係,我係新鬼,啱啱死,未夠輕,哈哈。係呢,我啱啱死,唔知矩規,其實鬼最驚乜野?鬼話﹕我地最驚人既口水囉。

遇到河,宋定伯叫鬼先過,鬼無重量,入水無痕九點九分,宋定伯一過就水花四濺,鬼又問﹕喂﹗﹗你做乜咁多水花?宋定伯話﹕都係個句,啱啱死,唔慣過水啊。

然後宋定伯揹鬼,好似無重量咁,佢捉住隻鬼係咁向宛市既downtown到狂奔,嚇到隻鬼話喂﹗﹗放開我,唔好咁快﹗掙扎落地,變左隻羊,宋定伯咳吐一聲,成桶口水噴落隻羊到,隻羊咩一聲,軟癱在地。宋定伯就張呢隻鬼羊賣左,賺左一千五百蚊,開開心心咁走左……

 

聽完鬼故,或者你晨咁早已經聽過,但當中,究竟有咩做人既道理呢?

 

第一,你終於明白,點解我地會話「你呃鬼啊」「你呃鬼食豆腐啊」?因為鬼真係好容易呃架,大契金句「你係人係鬼我一眼睇穿」,點解可以睇穿?因為大契係人,人就有精明眼,鬼呢?鬼捂眼囉?鬼係睇唔出架,宋定伯講乜佢都信,身太重係因為新死,過水有聲都係因為唔慣。所以我地成日話「咁鬼死蠢」。

第二,人同鬼,究竟邊樣可怕d呢?係呢個故事裏面,人明顯奸過鬼。好地地,夜晚撞到你,都無話要害你,但人已經要呃佢,仲要第一句已經呃佢,我都係鬼係同類。你睇人既奸,埋左你堆,扮哂自己人,其實笑裏藏刀。咁隻鬼幾時有話想害你呢?一路上推心置腹,就算曾經有懷疑過宋定伯唔係鬼,但都無展現過凶相,無話你唔係鬼,我就要害你。反而,係宋定伯去到市集就出賣朋友,將人賣左千五蚊,你話人幾可怕,利用完你,要鬼揹完你,仲要賣人落火坑。正是「鬼無傷人心,人有害鬼意」。

第三,呢個故事教訓你,話到嘴邊要留半句,教識徒弟無師傅。隻鬼竟然張自己既大忌,最驚人既口水呢個大秘密,自己既死穴話俾一個啱啱認識既唔知係人定係鬼聽,實在係愚不可及既行為。嚴格黎講,同個d遇到祈福黨既阿婆、聽信迷你債券推銷員既散戶一樣,係上哂當。做人要留條後路俾自己,你既弱點,就成為人地攻擊你既支點﹗﹗阿基米德話,給我一個支點,我可以撬起地球;你給人一個支點,人就可以一鑊撬起你﹗﹗

第四,大家要學下咩借口係最完美,就係話自己新黎。新黎,大條道理,咩都唔識,我新黎,係新鬼,所以過水仲有聲,我新黎,唔知頭唔知路,所以搞鑊檔攤。但係呢個故事你睇得出,所謂新黎,其實係講大話,宋定伯過唔到河,唔係因為佢新黎,而係因為,佢根本就唔係鬼,佢根本就唔得﹗﹗大家諗下,自己有無用過新黎做借口黎原諒自己?你身邊又有無人用新黎去推搪?死啦……我成日話自己係新黎添……作法自蔽添。

第五,呢個故事其實都好有科學性,點解鬼會輕d呢?因為,人死左,真係會輕左?有套戲叫做21grams,就係話人死之後,軀體會輕左21克…所以宋定伯同隻鬼,起碼都爭左21克既重量。

第六,咁最後啦,點解,鬼係驚人既口水呢?因為,人言,可畏。


魚皇 | 10th Oct 2008, 01:11 | 創作 | (286 Reads)

如題所問﹕當c朗不插水,朗尼不火爆,摩連奴不牙擦……那是怎樣的情景?你還會喜歡這三個人嗎?你還覺得這個世界和以前不一樣嗎?當個個都是好好先生傑斯,個個都是謙謙君子魯爾,個個都是古板嚴肅的雲尼亞里……放過我吧﹗悶出個鳥來的複製人世界﹗﹗

對c朗而言,插花插水怒射才是他的全部性格,沒有了其中一項插水,那便不是c朗,儘管插水的c朗不能取悅全世界,但不插水的c朗,也不見得便能討好全人類﹗﹗

曹操都有知心友,關公都有對頭人,唔扮野,做自己,雀斑佬﹗﹗


魚皇 | 2nd Oct 2008, 00:53 | 創作 | (332 Reads)

北 京 天 安 門 廣 場 早 上 舉 行 升 旗 儀 式 , 新 華 社 報 道 , 大 約 19 萬 群 眾 到 場 觀 看 。 另 外 , 國 家 主 席 胡 錦 濤 以 及 多 名 領 導 人 , 向 人 民 英 雄 紀 念 碑 獻 花 。

何時可以樹立另一個石碑,專門紀念新中國成立以來,服食各種化學毒食物致死的同胞?他們可是為中國和平崛起、與世界接軌作出了不可磨滅的偉大貢獻?不是說多難興邦?沒有他們大無畏(無知者無畏,無人知一毛錢一個雞蛋也會造假)的獻身,何來震驚民族的危難?民族何以興盛?

樹一個碑不費多少功錢,卻能為千秋萬代留下不朽功業,市民帶著孫兒說﹕孩子,你大叔就是食了蘇丹紅雞蛋加三聚氰胺牛奶加硝酸鹽面條而死的,那事件之後,政府作出的監察力度可大了,百姓從此都吃上安心的雞蛋牛奶和面條,你大叔貢獻良多啊……

或許昔日嚐百草的神農,在新中國活不了一時三刻,沒吃下幾樣食物,已經一命鳴呼,因為他賴以解毒救命的茶葉,他媽的,原來也加添了重金屬……

合什。人民萬歲。