香港新浪網 MySinaBlog
魚皇 | 30th Sep 2008, 18:14 | 創作 | (289 Reads)

別對號入座,賤骨頭指的就是我,本人,小弟。

新工作前先放假,就像新婚前要去滾一樣。

這個假期放得真好,千不挑萬不選,就在這個世紀金融海嘯、神七上天出艙漫步、以後武俠小說都把三花聚頂改為三聚氰胺的日子……

這幾天的生活只能用「頽癈」形容

睡到自然醒…惦記著尋日的遊戲未過關…刷牙…煮茶…是煮茶,都有詩意…任由電視喧嘩…躲到房間再踏上劍與魔法的旅程……電視傳來神七返航的新聞……我的戰士又升級……嘩﹗找到魔法配件……唔…美國否決七千億救市方案……yeah﹗﹗阿仙奴輸在升班馬候城腳下﹗﹗媽的﹗我的魔法師被劈死了……該死的迷宮這麼大,上google找攻略地圖……狗又叫…知道了,前天的狗糧還未吃完,吃完再給新的你吃……該死,原來是拉了屎……電話響起……2794字頭的……公司來電……時運高,看不到……伸懶腰…天啊﹗日落西山,人約黃昏後遲大到……頭痛欲裂……電腦螢光屏實在不能長期注視……望著能把人壓死的書櫃,卻還是毅然決定到二樓書店補充書源……抱了一大堆圖書的心情,就像垂死的戰士飲了 full heal potion……證明「一日不讀書面目可憎」是有根據的……和女友看20世紀少年……猜測「朋友」的真正身份,順便猜測,身邊誰才是自己的朋友……朋友,我當你一秒朋友……OK ,太刻意…我收番…朋友生了個B,無錯九成九是意外懷孕,更意外的是BB有十一磅……我們思量BB名字一定要叫「巨」或者「祥」……是吉祥的祥啦……又有朋友結婚……大班又再開咪……

天都黑了…又回到同一個家,開同一部電腦打不一樣的怪物……對了,後天便上工,今晚還有歐聯……怎樣才能令騎士升級呢?……狗又吠…報紙登了大學時的朋友全版的訪問……我應該羡慕還是…很羡慕……天快光了……錢也快花光了……


魚皇 | 18th Sep 2008, 13:05 | 創作 | (694 Reads)

好好笑,因為今日做節聲沙似毓民,忍不住和聽眾分享「聲沙」之謎,揭發出昨日和裝修師傅為了一條爆了的屎渠和壞了的抽風扇的世紀大罵戰。

難得思浩諗到條好橋,叫聽眾打上來評理,嘩﹗公審﹗少d勇氣少d預備都接受唔黎,結果電話爆燈,fax不斷。然後好好笑的現象,電話聽眾只有三成撐我,fax的聽眾,有七成係支持我﹗﹗

不過,事過境遷,實在覺得自己一時衝動,脾氣暴燥,踢波黎講,已經領紅出場被罰停賽,今次走運,相信下次再犯的機會難逢了。

描述事件時太激動,多次爆出粗俗用語,哎喲,再扣一分。

好啦,師傅,一人讓一步,大家都有唔著,好無? 


魚皇 | 18th Sep 2008, 13:03 | 創作 | (425 Reads)

唔通真係月到中秋份外明,人到中秋就份外慶?

定係大家以為中秋節即係「中意中舂你就舂你、揪你就揪你」既節日呢?

今年中秋大浪灣就打死人,05年既中秋,就發生柴灣北配水庫的打死人案。

 

我成日都唔明,你無見過聖誕節會打死人架喎,最巴閉都係平安夜失身夜搞出個d人命既啫,萬聖節係發生過踩死人,但個次係意外,而且之後無再發生,更莫講係端午節復活節新年啊,點解偏偏係中秋節,大家就咁鐘意打交呢?做咩啊?

 

莫非朱元璋係月餅攝紙仔叫大家起義既故仔係真既﹗一切開個餅就出現「兄弟做野」﹗個邊一切開張紙就寫「危險速逃」?我相信,其實都係月亮惹的禍,月圓之夜,原形畢露,平時就披著人皮,中秋夜就變成……我都唔知變成乜野,都是月亮惹的禍。

 

三個家長係度傾閒計﹕

 

嘩,我個細路真係好早熟架,十歲就識背唐詩三百首啦。

唓,我個細路仲勁啊,十歲就讀大學啦。真係好成熟啊

係啊,我個個仲勁啊,十歲就搞大左人地個肚啦。真係熟到爛添啊。

碎料啦,我個個超哂班。十個月大咋,就生腎石啦﹗﹗

 

嘩﹗﹗師奶?你個b莫非飲左……飲左三鹿牌毒奶?

師奶﹗你無野係嘛,你冷靜d啦……師奶﹗

 

我好冷靜我真係好冷靜,我地呢d小兒科啫,人地河南愛滋村個度d阿媽仲慘啦,一出世個bb就已經有愛滋病,真係等死。我地呢d,疴唔出尿之嘛,小事啦。我好冷靜喎,我真係好樂觀啦,我個b細細個,個天已經送左粒守護石俾佢啦,係咪?腎石喎,大人都未必有啦,你有無啊,你得粒鑽石咋嘛。

我話你聽,我一d都唔怪人家,人地一早通知左我地,我地唔醒扒之嘛。

 

你睇下,人地叫三鹿啊,三六滾一滾,神仙企唔穩;三鹿出奶粉,疴尿要忍一忍。

 

三鹿即係咩鹿啊?咪就係指鹿為馬個隻鹿囉,將「三聚青胺」指為「蛋白質營養」既鹿啊嘛,鹿死誰手既鹿嘛,飲三鹿睇下鹿死誰手你死定我死嘛,鹿神無主無人肯為我地做主既鹿嘛……

 

係咩?六神無主唔係三鹿個鹿啊?唔好意思,我地農村出黎,唔識咁多啊。見佢係咩太空人指定飲品、「航天乳品唯一生產企業」,我梗係信佢啦。

 

其實諗落,佢話係太空人飲品,我都應該有覺悟先啱。你諗下,太空人喎,上到太空無重狀態,如果成日疴尿d尿咪周圍飄囉,所以佢地梗係唔可以成日去廁所啦,所以人地三鹿先生產左呢批飲完之後疴唔到尿既奶俾佢地飲既啫,方便執行任務嘛。都係我地唔啱,人地俾太空人飲既,我地呢d老百姓就攞黎飲,都係我地唔好。

 

最唔啱就係我盲目相信名牌,諗住三鹿咁鬼大間企業,又話咩龍頭又話咩中國名牌,我就信哂佢囉諗住佢實無事啦,如果我早d睇到美國華爾街既雷曼兄弟執笠事件,我就唔會咁托大啦。你諗下,雷曼夠大啦,點知兄弟多,無個幫拖,咪又要破產。

 

呢個故事教訓我,大又點啊?唔駛死啊﹗﹗歷史悠久又點啊?唔呃得你既?

所以d人成日話唔信個間有成八十年歷史既公營機構會執笠,我就會叫佢睇下雷曼兄弟既故事﹗人地咁大都死啦,你個間豆泥山寨廠,當你尿咁排出去,真係不費吹灰之力。

痛就實有少少既,飲兩杯水,就會暢順d架啦,講到尾,咪又係水既問題?正所謂水到,尿成。


魚皇 | 11th Sep 2008, 14:42 | 創作 | (2789 Reads)

克勤,你好,冒昩寫封信俾你,HOW DO YOU DO?

 

唔駛驚,我唔係考你英文啊,因為我自己英文都唔好,我去親蘭桂芳,無一次可以搓到人地既BREAST既……唔係,我係話搓到自己既breast……

 

呢一句HOW DO YOU DO,我查過字典,小學教既時候,老師話,人地問你HOW DO YOU DO,你就跟番佢講,HOW DO YOU DO?咁就得架啦,唔駛自己作過另一句黎答架,絕對慳水慳力,有稿照跟,我都係講呢句英文既時候信心大D架咋。

 

仲有啊克勤仔,跟稿讀,一向係你地既強項黎架嘛,阿爺話how do you do ,你地例牌都係`how do you do 架啦,唔會錯架。

 

我覺得你讀錯英文呢件事,好可疑。首先,你讀到碩士,點會讀錯英文,係咪?你肯,中大都唔肯過你啦,以後仲有人敢入黎讀既。

 

第二,我最了解港式英文,港式英文既特色就係懶音多嘛,s 音唔讀,r 音唔講,例如吳唱kmy favor,係咪,最緊要快,係咁架啦。

 

S音,係一定唔可以講,如果我讀fans 你實話我扮野架嘛,做乜啊,外國返黎啊,婆羅奶定格鲁吉亞啊?所以一定要將s 變成 屎﹗做主持一定要有fan屎,返工就要載passs屎,然後老細留底成pat蘇州屎俾你,wowsitsit downsit﹗成個屎撈人咁sitoffice

 

對於s 音,我地真係有股莫名既街動唔去讀佢,於是,我成日有fan話想sm我,原來佢係想sms我,懶,讀少個s囉。

 

言歸正傳,克勤仔,港式英文係只會讀少,唔會讀多,你個個best,如果真係港式英文,係唔會讀st個個音,會變成try our bad,試下我地有幾壞,咁先係正路既港式英語嘛。

 

你,偏偏反其道而行,加多個r 音,變成breast。呢個字其實,好深,一般有份恥笑你既年輕網友,我深信佢地本來係唔識既。佢地一向以為,胸既英文,咪就ball囉,b-a-l-l 波﹗想講好波﹗就只係good ball ﹗家陣你教識佢地,好波,應該係話「best of the breast」,一個有r,一個有s 音。下次上網搵av影片,一定更加得心應手。

 

所以,我覺得你係特登讀錯,你係特登想講個breast字,你就係想try下自己個胸。點解?因為,你知道,家陣係入legco,唔係玩lego,唔係「唔駛驚阿媽係大廳」,而係「阿媽好鬼驚,阿仔坐左入議事廳」,立法會新人王呢個名仲唔樹大招風?自己又加入左個咁招搖既政黨,網上面已經有好多人話要及實你未來四年既表現……真係諗落心都寒,星爷話齋,心口鑲鋼板,有備無患。你都要搓定個胸,試試自己胸肌有幾厚,鑲定三寸板,係咪胆生毛,先可以係惡人當道、網民霸道、窮人俾政府當無道既時代都堅持落去……make some good suggestion,有好提議。

 

你要搓自己個胸,就係想活血散瘀,你搓自己個胸,就係要提自己,內心個團火係不能熄滅既﹗無論幾多人笑你﹗我一於,我搓故我在﹗


魚皇 | 10th Sep 2008, 15:33 | 創作 | (740 Reads)

總有兩日就摺檔,好想知道有無人會唔捨得個節目,但更加驚會無人唔捨得……所以最後都係唔提,相見爭如不見,見到得啖笑,破壞美好回憶。

入黎八年,做親既節目都係要收檔結束,無一個超過三年,我既腳頭認真唔好。

我都係叫師傅摸摸骨,睇下我黑,定係節目黑我。


魚皇 | 4th Sep 2008, 18:31 | 政治 | (712 Reads)

深圳一間電視台,衝破禁忌,播出一套本來係大陸禁播的作品,一睇,原來係張藝謀,呢位奧運開幕式的大導演的早期作品,《活著》。呢齣絕對係中國電影的夢幻組合,導演張藝謀,男主角,中國影帝葛優,女主角,鞏俐,電影配樂,趙季平。劇本改編自作家余華同名小說《活著》。

我係睇完新聞先發覺,乜原來,《活著》係禁片黎既咩?或者香港觀眾太幸福,呢套電影係收費台重播到無人睇咁滯,余華本書係圖書館多多都有得借。最緊要係,上網打《活著》,數之不盡既書評影評,好多黎自大陸網友,即係話,呢齣作品,大陸民眾睇過哂啦,要中毒都中左好耐啦,受過文革苦難既人唔駛你提都一早已經係仇深似海啦,大家咪一樣過得幾咁和諧,實在仲有無禁既必要呢?

我係睇活著既小說版,好多情節都糢糢糊糊,即係記得一幕好深刻,葛優既仔,係醫院被醫生抽血救縣長太太。抽下又一升抽下又一升,小朋友開始頭暈體力不支,同醫生大叫「我頭暈」;點知醫生話「抽血都頭暈」,後來,小朋友無再大叫,因為佢被醫生夾生抽乾哂d血,死左。佢死左,縣太太活著。

呢一幕好震撼﹗你好似見住一個生龍活虎的細路,點樣被人夾生抽血抽到佢臉無人色,佢一路嗌頭暈,我一路都想嗌「喂﹗停手啦﹗」我記得事後我仲好天真咁同老豆討論,文革個陣,醫生真係會咁樣既咩?真係會抽血抽死人既咩?我老豆同我講﹕太誇張啦,無可能。我聽完,竟然覺得好安慰。因為,我好怕,係真人真事改編。

另一個我印象深刻既片段,就係《活著》的宣傳文案﹕活著,中國人最卑微最奢侈的願望。卑微,因為你甚麼也不想要,不要富貴不要質素不要幸福不要滿足,只要活著;奢侈,咩世界,你求條全屍好過啦﹗竟然想,有命﹗﹗

十幾年過去,抽血情節,我認為仍然非常有時代氣息。窮人抽乾自己既血去救活富人,榨乾榨淨,你點樣大嗌頭暈,佢照抽可也。窮人想活著?仍然太奢侈。

近排中國既話題人物,唔係體操王子楊威,而係楊佳,呢個北京青年,一人連殺十名上海公安被判死刑。由於盛傳,其實佢係先被公安毒打致身體殘廢,投訴無門,先憤而殺人。所以網民對佢無限同情,甚至尊稱佢係「刀客」「少俠」。不過,呢位楊佳既辯護律師講左意味深長既話﹕楊佳不可能不死。

即係話,楊佳,想活著,仍然太奢侈。

無怪乎,活著,係一套禁片。

魚皇 | 2nd Sep 2008, 11:54 | 政治 | (429 Reads)

法庭宣判,全場肅立,被告木然。

法官﹕本席宣判被告故意殺人罪名成立,判處死刑……

被告繼續木口木面。

法官﹕……剝奪政治權利……

被告神情激動﹕我反對﹗法官﹗刑罰不公﹗

法官﹕有何不公?殺人償命﹗天公地道﹗

被告﹕法官大人﹗請問甚問是「剥奪政治權利」。

法官﹕無知刁民﹗政治權利乃指公民有集會、遊行、出版、結社、示威、表達意見的政治權利,被告犯了罪,便要被剥奪這項政治權利﹗

被告﹕我自出娘胎便從未擁有這種「政治權利」,集會被人驅趕控以反革命煽動罪,遊行被拘為暴民,出版示威又被指危害國家安全……小人從來無政治權利,何來「剥奪」?好比剛出世嬰兒,牙都未有,如何剝牙?小人爛命有一條,政治權利無半點,你如何行刑?


魚皇 | 1st Sep 2008, 17:34 | 政治 | (489 Reads)

很多時候,同一句說話,同一句批評,由不同身份的人表達,效果完全相反。

32A既人如果論述「大胸對身體有不良影響」,便會被人嘲笑「妒忌自卑」;但若一個36C的人慨嘆「胸大的煩惱」,又會落得「曬命扮疇」的批評;一個男人若發表「胸大有罪」的言論,更會被人恥笑「虛偽」。

對不起,話題扯遠了……

嘻嘻。話說,京奧閉幕,倫敦接手做了一個八分鐘的閉幕儀式,有巴士,有跳舞者,有小女孩,小雨傘。我看到不少本地論者借題發揮,高度讚揚倫敦的一絲一毫一分一寸,幾乎連汁都撈埋,總之就係「正」,如何顯示出大國風度,如何突現人文表現,如何反襯出我國的庸俗堆砌……如果你反駁,如果你質疑倫敦的簡單,便會落得一個「天朝大國民族主義狂熱心態」的大帽子。

然後,我看到大陸報章引述,原來英國多份報章,都大力批評閉幕式的接力演出,是恥辱,是失禮,是不專業,就那個香港個個都 讚的甚麼外國金牌搖滾結他手,都被英國報章肆意嘲笑佢髮型老土……

我看得好心涼。我並非討厭倫敦閉幕式。我只是,討厭只可以稱讚倫敦的氣氛。我討厭生在香港,只能批評中國,只能讚美外國,我討厭若稱讚中國便是「民族主義狂熱份子」,若批評外國便是「未與世界接軌小農眼光」……那八分鐘,我們只能讚嘆,甚至不斷為其說項,憑甚麼我們要自設圈圈?

現在好了,原來外國傳媒,英國本土的人都看不過眼,他們是英國人,按道理,他們的批評,應該不會被指罵成「中國民族狂熱」了吧?

陳水扁如何做,大家都覺得他不會出賣台灣,因為他是台灣之子;馬英九怎麼說,大家還是覺得他是幫大陸講說話,因為他是「香港腳」。你看,大家都不是聽其言,而是觀其背景。

原罪。

中國人,只能讚美倫敦;罵倫敦的,只能留給倫敦人。


魚皇 | 1st Sep 2008, 00:21 | 創作 | (391 Reads)

我深信我的屁股是尖的,坐不住。

假日,我呆在屋內,坐困愁城。壞掉好久的鐘修好了,秒針慢慢嗒嗒向前走,我身體的鐘卻好像停頓了,窗外汽車飛馳,屋內卻一切活動都停頓了。

浴室的花灑仍然漏水,滴下一點、兩點、三點、四點……水桶滿了。

終於忍不住,奪門而逃,腳踏大街,人聲喧嘩,臭汗四濺,我感覺卻美妙极了。

逼入旺角鬧市,最好看的不是減價櫥窗,不是林狗最新的楝篤笑試睇片段,而是,人。

金毛樣衰版博穎、連續五個超短迷你裙,但只有一個能令你想入非非,其他不是梅林牌豬肉,便是火柴人實況版…那位人兄仍然穿著當年很流行的body glove、呢個櫻木花道頭是否落後了十年呢?嘩﹗那位姐姐何苦穿這麼誘惑的黑絲襪長腿裝束買雪糕呢,難道你還怕自己這身打扮,不夠我們的眼睛吃冰淇淋?

走入大街,我感覺 就像浸泡在溫泉,全身發熱,卻充滿力量,人流如水流,把我沉悶的老泥沖走……旺角街頭好大的好處是忘憂,這裏到處都是消費的力量,消費的聲音,我不理是真是假,反正在一片手機埋便睇睇、反正在打蛇餅的戲院人龍、反正在夜晚十點仍然要排五六個鐘的壽司人潮,令我覺得生機無限,我不會相信香港通脹害人,我不會相信有一群師奶正為慳五蚊而集齊印花到藥房搶購、我忘記了恒指只得兩萬一……真的,來到旺角,我感到人生充滿希望。人生在旺角最大的煩惱就是﹕買唔到九點半,被好戲量騷擾、被扮死屍的法輪功學員嚇親……人生充滿希望。


魚皇 | 1st Sep 2008, 00:11 | 政治 | (373 Reads)

看到「830嗆馬大遊行」的報導,共有四萬名台灣群眾上街向馬英九說不,不禁慨嘆﹕台灣老百姓就是這麼好騙﹗

真的,連白痴都知道嗆馬就是為阿扁造聲勢,卻還是有四萬個群眾相信主辦單位的說法,「與挺扁無關」而出來參與,其實個個都成為「人頭」了。

還有,你們這群綠營的傢伙,好意思出來向馬英九說不?你們怪責馬英九百日維新不成功,經濟未轉好,怎麼就沒有看見你們在過去八年裏,向那位把台灣經濟搞得爛泥扶不壁的陳水扁說不呢?怎麼你們就這麼呆呆笨笨聽話的一路八年支持 下去呢?好了,現在你們拉下了一坨八年的臭屎,然後便怪責馬英九,怎麼都給了你三個月的時間,你竟然抹不走這坨八年臭屎?這種指控公道嗎?

那些叫馬英九下台的民進黨支持者,除了一股政治熱昏了頭,還知道甚麼呢?當他們聽到陳水扁的公主大喊「民進黨」個個都有拿錢的「爆料」,為甚麼還能如此死忠的上街、還能厚顏的要求馬英九下台?

我們以前常取笑迷明星偶像的粉絲追車瘋狂,其實,政治上的粉絲,才真是貨真價實的,全部都是從精神病院出來的瘋子。

嗯,笨笨的支持者,有無漂亮水水的笨笨台灣女孩子呢?