香港新浪網 MySinaBlog
魚皇 | 28th Jul 2008, 11:01 | 創作 | (541 Reads)

睇電視廣告,介紹左好多外國精選片段,乜野產品都有,啤酒避孕套保險公司,共通點都係「估你唔到笑死你」個種,又或者咁講﹕全部都係香港廣告未見過既橋。

 

你可能已經係youtube度睇過笑過,但唔知點解,呢d電視雜錦好笑廣告,邊度山卡拉都有,印度啦泰國啦,但,你有無係youtube度睇過香港既代表啊?好似無乜印象。

 

再睇個d好笑廣告,你會發覺,香港人唔係無呢d創意唔係無呢d諗頭,但係,無呢個胆量。咩意思?我一路睇外國廣告,我一路就諗﹕嘩﹗呢個廣告實俾人投訴﹗嘩﹗呢個實出唔到街﹗嘩﹗﹗呢個肯定死梗﹗﹗無錯,我覺,香港呢個城市好鬼保守,一定包容唔到呢d創意。

 

例如有個廣告,賣啤酒既,成班麻甩佬係酒吧睇波,有個金髪身材惹火既靚女飲緊啤酒,但你唔好以為係個d老土怪,飲啤酒送靚女咁鬼cheap,首先佢係入左波,個靚女高聲尖叫,成班麻甩佬即刻衝過去抱實個靚女,甚至壓埋上去添,然後酒吧角落仲有另一個女仔,無咁靚,無咁正,佢見到個個靚女咁受歡迎唔抵得,於是佢又趁入波既時候,舉起啤酒杯大嗌,點知成班人望左佢一眼,無人理佢,繼續包圍個個靚女……全廣告完。好啦,你估呢個廣告,如果係香港,會被人點樣投訴?

 

嘩﹗離譜﹗﹗個個女人係咁俾d男人圍住抱,擺明俾人抽水﹗佢竟然無反應﹗仲笑呵呵,呢d簡直係大男人主義心態、從男性角度視女人如玩物﹗係侮辱女性取悅男人﹗而另一個女人竟然不以為然、仲想得到俾男人簇擁既待遇,簡直係離譜。投訴投訴﹗

 

好啦,另一個廣告,超市,阿爸拖住個仔行超市,個仔拖計,喊住要買糖,阿爸唔俾,個仔發哂脾四,喊喊叫叫嘈到你瘨,結果阿爸就諗﹕如果當日有用到xx牌避孕套既話……係咪超正先,但sorry,政治不正確。廣告上出現既小朋友形象,你諗下香港個d,無論係紙尿片定係奶粉定係快餐店定係汽水都好,全部都係活潑開朗可愛父母鍚到燶,呢個廣告一出,肯定俾人話妖魔化細路﹗﹗咁點算?唯有繼續賣「為你既伴侶著想,請使用安全套」囉。

 

外國廣告有個特點,唔知係咪因為玩到無野好玩,特別鐘意攞sex黎做文章,但呢個性,係香港簡直係大忌大忌大大忌﹗﹗有個外國廣告,先話個男人同女人一張床,女人想要做愛,男既唔行,而且仲起身落左樓添。個女唔服氣,死跟落黎,結果見到個男人,踎係梳化度,隻手郁郁下chok chok下,好似係做緊「自我追逐」既行為,女既慶到一個枕頭飛過去,然後個男既一臉無姑,鏡頭一轉,原來佢既手chok chok下,係踎係度pump緊個足球……係賣足球廣告。

成件事都好無謂,夜媽媽邊有人走去 pump波,純粹綽頭。不過呢種廣告,肯定唔駛旨意係香港問世,俾人投訴咩意識不良、教壞細路,一定禁之而後快。

 

我覺得扼殺創意既方法就係無爭議,凡係創作一樣野,如果諗既時候係以「咁樣寫就包無人鬧啦」「咁寫就肯定安全啦」,我好肯定呢樣野一定會好無創意﹗﹗因為創意就係諗d人地諗唔到既野,既然人地諗唔到,一定係唔正路,唔可能個個同意,爭議就一定會出黎。

 

你諗下,你整個廣告出黎,或者做個節目出黎,聲都唔聲,無人有反應,無人知你既存在,你的確好正確,樣樣都啱,呢樣唔得罪、個樣無踩界、你既意見同九成九既人諗既野都係一樣,無人話你,但亦無人會理你。所以有時難怪d人會筆走偏鋒駁鬧,例如有個話劇既海報,俾人投訴話剝光豬意識不雅喎,地鐵禁貼,要換個有著番衫既;據講,個個話劇既人話,yesbingo﹗幾驚你唔禁﹗你唔禁就無人報﹗多謝哂,老細。

 

同樣道理,做時事評論節目,最驚唔係被人投訴唔係被人鬧,最驚無人理你咋。所以如果有人投訴你,有人圍剿你,有人話要打壓你,嘩﹗﹗恭喜你﹗你紅啦﹗﹗呢個真係最佳廣告、最佳代言人啊﹗﹗


魚皇 | 27th Jul 2008, 23:06 | 創作 | (273 Reads)

北京公安襲擊記者,讓人發現一個可怕的事實﹕天子腳下、眾目睽睽,公安照樣膽敢對「筆杆子」的傳媒記者動手動腳,那麼在山高皇帝遠的偏遠地區、手無寸鐵的人民群眾,平時過的是怎麼樣的非人生活?

所以奧組委會說想不出辦法去改善執法人員和傳媒的關係,這是對的。因為魚肉百姓是深入骨髓的劣根性,那能一時三刻便改得了?這是基因改造工程﹗﹗找諾貝爾得主,看看有無方法在奧運開幕前改得了dna排序吧﹗

也難怪公安殺紅了眼,國內傳媒搶新聞,不會如此明刀明槍的和你對著幹,表面合作、背地裏再另找線索。香港的不同,背地裏固然要搵料,但當著面也絕不能和你妥協退讓。你劃了所謂的封鎖區,香港的記者根本不加理會,因為我們講究的是最大限度的新聞自由,當日居港權事件,警方在遮打花園突然要劃禁區清場,不讓現場記者採訪清場的情況,也是群情洶湧,當時都有不少記者和香港警察產生摩擦衝突。香港記者面對清場封鎖,輕易不肯妥協退讓,會和你據理力爭。內地公安那裏想得到你區區記者,平時國內稱之為「喉舌」的傢伙,會這麼大胆反抗??媽的﹗你看老子不把你斃了就算給你臉了﹗﹗

你一個大胆的羅暉翔,打你便打你,你居然夠胆抄老子的警員編號﹗﹗媽的﹗其他大陸百姓見到,有樣學樣﹗老子以後怎麼執法﹗﹗

我最想問北京市民,你們遇到被公安無理對待,你們會否索取他的公安編號?你們有無這個習慣、有無這個胆量?

我想,我又多了一個,以香港人自豪的地方了。


魚皇 | 21st Jul 2008, 18:47 | 創作 | (502 Reads)

你記唔記得呢句對白﹕

「我係潘志文,我老婆唔係度。駛唔講,有無野搞?」

呢套係電影七年很痒的對白,劉青雲扮演既潘致文終於等到一個老婆唔係身邊既機會,身痕周圍打電話搵豬朋狗友有咩玩。呢句對白最搞鬼既地方就係,「駛乜講」三個字,點解潘致文會講「駛乜講」?究竟對面條友聽到潘致文話「我老婆唔係度」既時候,俾左咩反應佢呢?

你可以考考自己既想像力,

A﹕「你老婆唔係度?咁慘啊?」呢句說話女人好想聽到,但男人唔多似會諗到。b﹕「你老婆唔係度?咁點啊?」點會仲問點啊,你唔係點我係嘛,入正題啦。

C﹕「你老婆唔係度?咁正?」yes﹗bingo﹗呢句先似人話,呢句先似係潘致文應該俾既回應「駛乜講」﹗

哈哈,作為女人既,係咪要檢討一下,自己點解會咁失敗呢?不過,上天係公平既,我相信「今晚唔駛陪仔,駛乜講」既對白,一樣係咁出現。

豬朋狗友神神秘秘打黎「喂﹗今晚女友要開夜,我free啊。」

我直覺就俾反應佢「咁正﹗好野喎﹗」

「駛乜講,有咩搞?」

「你想搞咩啊?」

「無野搞,就係睇下你有無野搞囉?」

「無喎,今晚出黎囉。搵d野搞。」

「係囉,搵d野搞啊,好x悶啊﹗」

「你搵地佢地囉,收工call你。」

「係咁。」

全段說話中心思想﹕「搞野」。但直到收線個一刻,其實都唔知究竟有咩搞,嚴格黎講連今晚有咩節目都唔知,除左知道又係呢幾條友出黎之外。但係心就當堂安定左,起碼今晚有著落,唔駛on 居居等天光,有人陪你吹下水。無錯,以下落黎,就係男人另一重要環節,「吹水」。

各位女士留意,男人其實無野叻,最叻就係得把口,唔係話佢口才好,就算一個口才幾咁笨拙既男人,佢最叻既部位,都仍然係,把口。講,唔駛死既,吹,又唔係真既。up完,咪無咁心up囉。

幾條友出到黎,漫無目的,有時會入去二樓咖啡度吹水,坐低你眼望我眼,食煙既食煙,sms既sms,報到既報到、打咭既打咭,然後就會出現以下對白﹕

「嘩﹗你睇下個邊條女?幾勁﹗」

「唔駛諗野,做野啦,過去啦﹗問佢電話。」

「痴線﹗你唔過去﹗做乜要我過?」

「超﹗有幾勁﹗我個日係街見到個個,痴鬼線﹗離哂譜﹗誇到呢…」

「假架啦﹗香港邊有咁誇啊痴線﹗」

「嘩﹗你夠jolin勁,無改錯名,勁到呢…個次倒吊…」

注意,對白講到呢度,已經忘記左剛才「問佢拿電話」這個神聖任務,大家充份發揮無限的聯想力,馳騁於幻想世界之中,由咖啡室跳到個條街再跳到真貨假貨再跳到台灣女神……呵呵,就在口水與煙圈之中,無無謂謂過了一晚。

當然,差不多每隔十五分鐘,就會有人說﹕「好x悶﹗有咩搞啊?」

「唔知啊,有咩搞啊?」「搵d野搞下啊。」「搞?搞咩先得架。」「不如落老蘭啊?」「唔得啊,聽朝返早啊。」「唔駛預我,我一陣仲要報到啊。」「唔係啊,好耐無落bar啦。」「算吧啦,落去飲咩啊?汽水啊?飲酒?你飲到幾多枝啊?三條友嗌半打?今日星期五啊﹗你嗌半打你估會唔會有拳手坐低黎招呼你呢個大客呢?嗌夠一打?你咪玩啦,同佢講打包拎返屋企再飲好無﹗」

唉,一個千辛萬苦先叫做撇甩老婆女友既純男人麻甩之夜,竟然出現咁既局面?何苦呢?

唯一可以做的,就是吹水。吹水吹來吹去,不過幾樣﹕工作、金錢、女人,無啦,人生此至,濃縮三個基本原則。會不會談理想?會,但不會用「理想」這麼「娘爆」的形容詞,我們會統稱為「有咩搞作」,注意,比起有咩搞,係多了一個字,「作」字,這是「作為」的「作」,所以有咩「搞作」合起來便成為﹕想搞d乜野作為?點解都仲係要用個「搞」字,因為話明吹水,通常講下講下又一年,個樣「作為」仍停留係「盞搞」階段,「作為」亦變成了「老作」,真係唔好意思用了「理想」的字眼,還是「有咩搞作」順耳。

大家的搞作,其實都很認真,因為十年來都係講緊同一樣搞作,無變過,亦無成功過,呵呵。當然,令人高興的是,十幾年來一直見證這些「搞作」的,仍是這幾條友。電話響起,十年如一日的對白仍然繼續﹕「有咩搞啊?」


魚皇 | 11th Jul 2008, 15:50 | 創作 | (514 Reads)

停電一日,呢個題材好多人都寫過,十篇有九篇都講到停電係千載難逢的一個反思機會,點樣度過寧靜既一個不受外間干擾的晚上,點樣難得地同愛人卿卿我我專注談情,有d仲會反思科技究竟令人類進步定依賴……okstop﹗夠哂﹗點解我既停電一夜,無咁多浪漫野發生既?

 

話說發現屋中停電,一望保險掣,燒fuse,大件事,我諗起一個傳說。傳說中一個男人唔知點解,就算佢明明係讀文科出身、呢世人接觸最多同電有關既只係電腦都好,都會被人假設你係應該識整水電煤,天生就係流住做三行既血液。所以點解架車死火,d 男人都要侷住打開個車頭蓋裝下裝下……然後得出結論﹕唔,我諗,應該壞左囉。嘻嘻。唔係我地想扮野,係男人天生被錯誤期望咋。

 

問題就係,以前傳說中女人都被假設先天個個都係方太李太yan can cook啦,但自從美女廚房之後,大家終於醒覺,嘩﹗原來,女人先天可能係地獄廚神先啱。於是,各位姐姐妹妹身上少左個枷鎖,得到徹底既解放。咩啊﹗煮燶飯唔得既咩?

 

唉,女人就解放,男人仲要做三行。於是我望住個個跳左既fuse,嘆左口氣,啪啪劈劈,拉上又拉下,佢都係無反應。我宣布﹕certify,然後死死氣就去樓下搵看更。

 

看更一副定過枱油的神情,咁咋吓嘛,成隻功夫熊猫既身形展開,攞住串鎖匙慢慢行去電錶房,我心下暗暗安慰﹕原來,傳說中男人識整水電煤都係真既,起碼面前呢隻熊猫……唔係…呢位看更阿叔就識……

 

佢慢慢推開度門,慢慢啪住電錶房既燈,慢慢fling條鎖匙,啪一聲,串鎖匙慢慢跌落地,看更仍然一副淡定有錢淨既表情,慢慢彎腰執,一寸一寸咁彎,彎到底,突然好快伸直條腰,然後慢慢同我講﹕大大…大大枝檸樂啦﹗點解,地下會有個洞既?

 

吓?地下有個洞??咁啱得咁橋我屋企停電黎搵你幫手你個串電錶房鎖匙竟然咁啱得咁橋跌左落地下而地下咁啱有個洞??佢嘻嘻一笑,真係,咁啱既,不如,我幫你打電話俾水電師傳啊?

 

好,梗係好啦,心下閃過一絲不祥﹕會唔會……搵唔到呢?

哎喲﹗﹗再大大大枝,檸樂啦﹗﹗個師傳,閂左手機喎﹗﹗哎喲,都咁夜啦…嘻嘻

 

ok﹗﹗傳說中的戰士,真正的三行師傳,竟然,閂左手機﹗﹗我死死氣返上樓,唔想見證功夫熊貓點樣伸隻手入個洞度勾條鎖匙出黎。

 

屋企兩隻狗搖哂尾等我解救,我突然諗起,打俾電力公司﹗﹗yes﹗電費單上有個24小時緊急服務電話,我諗都唔諗就打去。通左﹗bingo﹗又係一把男聲﹗睇黎,傳說係真既,同水電有關既,始終都係男人﹗﹗呢個男人,又有禮貎,又有熱誠,最緊要係,電話又打得通,佢應該可靠﹗﹗我好快將我難題話俾聽,佢好有禮貎問我地址,我老懷安慰,因為佢問我地址,下一步就好能係派個師父個黎救我啦﹗如果唔係點會攞我地址,我呢個諗法係咪好合理好正確?

 

佢聽完,唔,唔好意思,先生,你呢個係私人住宅,我地公司唔會幫手架喎,你要搵出面既水電師傅??吓?等等﹗咩意思?私人住宅唔包?但我都有交電費俾你喎?仲有啊?你幫唔到我,咁你印個24小時緊急服務電話黎做乜呢?

我真係諗唔通,對一間電力公司黎講,你覺得市民有咩緊急既服務需求係緊急到要24小時都要搵得到你呢?查帳單?夜半三點諗起個幾度電唔服氣黎call你?定係打黎讚你d 電供應得好穩定?定係查詢抽獎禮品?即係一間電力公司既緊急服務,如果唔係提供維修電力服務既話,仲有d乜野呢??

但結果,私人住宅既電力供應並非佢地服務範圍?咁你寄俾我呢個私人住宅既帳單,就唔好印有呢個緊急維修既電話啦?即係你明唔明,我覺得佢好似玩緊我呢d用戶咁樣。個一刻,我諗通左,如果成幢大廈都停電,咁就唔係我私人住宅既問題,而係一個地區供應既問題,佢地就要出手啦?

 

由我黑媽媽既單位外望,走廊係一片空明,隔籬單位既冷氣係門縫都漏出黎,仲要傳來一陣陣炸機音樂,我內心充滿嫉妒……點解我無電你地有??如果你地都無電,就會有多d人黎理我﹗﹗

 

正如一個楝篤笑笑話所講﹕你爭銀行十萬,你會好唔掂;你爭銀行十億,間銀行就會好唔掂。你爭十萬無人會幫你,你死你事;你爭十億就大把人出黎救你,因為你死銀行都死,齊齊死﹗﹗啍﹗我覺得傳統智慧﹕大事化小、小事化無係正確既,因為當你只係小事既時候,你就真係乜都無啦。

 

唔怪之得我地話有難同當,呢d 唔係義氣既表現,而係拉人落水引起注意既縮數咋。停電既一晚,我對唔住燈火,跌入黑暗深淵,愈夜愈美麗,讓我們一同失眠吧﹗


魚皇 | 4th Jul 2008, 16:14 | 政治 | (485 Reads)
大部分人之所以要反,都係因為要食飯。反完之後都係無得食飯,吓?咪反啦。根據我地偉大祖國既講法,係我地神州大地,就有大批天生為反對而反對既反骨刁民,佢地黎自貴州,一處被喻為「天無三日晴、地無三里平」既地方。

呢單新聞都已經炒得鬧哄哄啦,話說貴州有個女中學生,手僅十五,被發現棄屍河邊,家屬同目擊證人都話,佢係被人姦殺而死。於是死者家屬就去報公安,點知五個鐘頭之後,公安就話「查清楚左啦,呢單只係自殺案,你個女啊,自己睇唔開自殺死鬼左,唔係姦殺啊,你走啦」。

然後又要咁啱得咁橋,懷欵姦殺女仔既疑犯,竟然係高幹子弟,當地一個副縣長既仔。呢鋪真係火到黎埋,啱啱遇著剛剛,加上我地祖國公安局既底向來乾淨,你話佢有無包庇啊?仲有仲有,根據劇情發展,遇害家屬梗係不服氣去公安局投訴,結果,就係離開公安局之後,被人毒打入醫院。然後,我地貴州一批鄉親父老,火冒三千丈,萬人聚集當地公安局,火燒大樓﹗仲有人自發,保護遇害女子既屍體,因為真係有人黎搶屍體,毁屍滅跡。早兩日,事情有突破性發展,當地公安局聯同著名法醫小組係死者家屬陪同之下,一齊驗屍,結果發現「屍體絕對係死於溺水,絕非他殺,死者生者絕對無被人性侵犯」即係話,你個女真係自殺架﹗

且慢落判斷,精彩案情陸續有來。咁點解,好人好姐,一個十五歲既少女會跳河自殺呢?佢身邊好似有朋友陪同喎。呵呵,群眾智慧係無窮無盡既,公安局話喎,死者曾經同朋友閒談話﹕「跳河死了算了,若死不成就好好活下去」,但受到疑凶既勸阻。

10分鐘後,呢位疑凶突然係橋上做左三個俯臥撑,即係(掌上壓)時,女死者就跳河﹗﹗呢位無厘頭做掌上壓既欵凶即刻跳河營救,無奈咁短時間內,女死者竟然都救唔返﹗而最離奇就係,佢地唔係第一時間報警,反而係打俾女死者既男朋友,通知佢「你條女跳河死鬼左﹗」

問題就黎啦,點解無端端,會做俯臥撐啦?內地有句說話,叫「吃飽了撐的」,即係「食懵左你啊」既意思,點解無端端而做府臥撐啦?或者,心水清既你,已經估到咩一回事,正發出陰側側既笑容,但其實,真係好難笑得出,因為背後真係好邪惡既一件事。係咪因為有目擊證人見到疑凶強奸受害人,疑凶唯有作個咁既借口,話自己唔係犯罪,只係做緊俯臥撐﹗你當全世界係傻,定係當自己係傻呢?

個個咩專家小組驗屍團,對唔住,我一d都唔夠胆相信。因為八個月前,一樣有專家拍哂心口話自己人頭駁竽頭,陝西省個隻華南老虎照片係百分之一百既真﹗﹗

結果呢,呢d所謂既專家驗證,全部錯哂,華南虎照片證實係流料。呢d專家係邊個請番黎既,又係聽命於邊個?大家心照。以往發生好多冤案,處女被屈係妓女,遭非法扣留,你唔會第一次聽啩?莫講話要驗屍驗到個女死者無被人性侵犯,就算你要佢驗到原來個女死者係男人黎架,都一樣無難度。

點解,山高皇帝遠,社會要和諧。呢宗如果係自殺案,唯咪好啦,無人包庇無人犯罪該幹嘛的幹嘛,問題就係,點解會有成萬個平民百姓,食飽飯無野做干冒奇險同一個純未謀面既女死者出頭討公道而同有槍有炮既公安犯生爭執先?

正如開頭所講,民之所以反,都係為左食飯,你如果搞到飯到無命享﹗我唔同你搏命?所以,今次民怨咁大,係因為呢d百姓平日已經受埋唔少冤屈氣,平日已經見盡官官包庇既惡劣情況,所以今次絕對係身同感受,今日就係呢個少女被殺不了了之,聽日,會唔會到我?我今日再忍,聽日邊個同我出頭?

中國有句說話叫「仗義每多屠狗輩」,愈係受教育既人士,有時反而愈縮骨,知多太多利害輕重,反而唔知義為何事。中產成日話自己係「沉默的大多數」,咁邊個做嗌口號的少數呢?

官逼民反,民不能不


魚皇 | 2nd Jul 2008, 17:17 | 創作 | (435 Reads)

上個禮拜講左男人,今個禮拜想講女人。

係,我知,未夠三十學人講女人經,根據調查顯示,將會有逾一成既十幾歲靚仔叉哂腰排定隊同我講﹕阿叔﹗講女人經?係都我地講啦﹗咩啊﹗我地呢d有成十個性伴侶,仲要唔介意群交喎﹗你有無啊?」佩服佩服,再次證明人類果然係群居動物。

 我認為d 父母唔夠胆同仔女講性教育,其中一個原因,係,跟唔到。 即係你仲準備緊「我係邊度黎生出黎架」既標準答案點樣可以避開「做愛」同男女性器官名稱既時候,個仔已經打哂呵露同你講﹕「老豆你仲係用緊傳教士式體位?outout d 啊?」跟手可能佢已經將一系列成語動畫廊裏面既四字成語,咩老漢啊觀音啊,如數家珍咁樣係你面前演練一次……家長唯有講一句﹕「阿仔﹗係時候教你老豆做人既道理啦」。 

唔好意思,一講女人就講埋左一邊,話說經典電影《秋天的童話》周潤發第一次形容女人係茶煲,令世人捧腹讚嘆形容精妙,點知廿年後無記有套電視劇再炒一次冷飯,又話d女人係茶煲……唔好笑佢老土,你應該咁諗﹕廿幾年,女人都無進步過,仲係咁老土,仲係咁茶煲。對唔住,講完呢句茶煲,我自己都覺得,真係好老土。莫非d編劇唔知道,呢個年代有個詞語,叫「港女」? 

有人話呢個世界第一場戰爭,就係由男人同女人進行。我信。唔係吹水,有歷史考據。打開古今中外好多既創世神話,即係個d天地點樣初開、萬物點樣誕生、男女點樣結合個d 神話呢,我研究過,洪水災禍係鐵胆背景,無論係諾亞方舟定女媧煉石補天,都有呢堂景。但最震憾既,就係洪水之後,只係淨番一對男女,而呢對男女,唔知點解,係各地神話裏面,都定左佢地既角色,係兄妹關係﹗

即係話,呢d兄妹,要係洪荒時代,被逼亂倫﹗ 劇情發展亦是如此,上天叫兄妹結合,而吊詭就係,男人一口就答應左,諗起都噁心,個個你阿妹黎架,莫非男人真係咁咸濕? 相反,阿妹就好有原則,死都唔肯,最後唯有上天下旨意,如果男既做到以下幾樣項目,就證明天意要安排你地結合啦。個d項目簡直就同現代人追女仔要過五關一樣﹕ 係山既一面拋一枝針,係山既另一面拋一條線,如果針穿得過條線,就可以係埋一齊。

你終於明白,咩叫做「男追女隔重山」,原來係神話時代已經有伏線。 仲有啊,女人最鐘意考驗男士去完成高難度動作,你以為「我的野蠻女友」叫男人高踭鞋已經係好可怕?錯啦,創世神話仲有以下呢一段﹕ 

不如先用面前这盘磨来试试。你背着上边那片从对面山上滚下来。我背着下边那片从这边山上滚下来。如果磨心插在磨眼上就成亲。” 

各位,只有女人先會諗得出咁絕核既測試﹕呢兩個測試說明左,女人既不安全感覺,係與生俱來,要用好多唔同既方法,天意啦奇跡啦去說服自己,好啦,眼前呢位雄性動物可以同我結合啦。

 你會問啦,照計,男女原來經過左咁多苦難先可以係埋一齊,雖然亂倫真係令人倒哂胃口,但都算係久經考驗既戰士,點解呢個年頭,會咁易離離合合?

  首先,你要睇清楚,神話裏面,阿哥要求既,唔係同阿妹相愛,而係做愛,即係話,個男人又穿針又係個山度碌落黎,其實目的只有一個﹕就係要結合。

 由兄妺之愛一跳就變成夫妻之愛,你睇下,男既係一d難度都無,一d猶疑都無,咁你就明白,點解男人咁容易接受一次性交易啦。 而女既,其實都已經係戴眼識人架啦,都唔信男人既甜言蜜語,係要逼佢做一場大龍鳯先得,不過,各位姐妹,呢d任務,其實證明唔到乜野,因為,係神話裏面,天生一對既係條線同枝針,係個磨盤同磨心,男女係咪匹配相襯,神話無講到。 

性教育都唔駛外求,睇返老祖宗既創世神話,已經有好多教訓。仲有啊,下次個仔再係你面前耀武揚威佢既性經驗,你可以同佢講﹕阿仔﹗你d小兒科﹗幾千年前,我地祖先啊,啍啍﹗試過咁啊﹗