香港新浪網 MySinaBlog

魚皇 | 28th Jun 2007, 23:16 | 創作 | (488 Reads)

憎,樹心邊,加一個曾字,點解,一個姓曾既人,佢有心,就會變成「討厭」「恨」既意思呢?點解咁多個姓唔揀,偏偏要揀姓曾既呢?

 

如果你無心,咁就只係一個姓氏,反而唔會變成「憎」,問題就出係,你多左個心,一個人,多心,就會乞人憎。凡事太多就唔好,多事,唔好,多口,唔好;多心,亦唔好,咁多心,諗壞心腸。

 

仲有,人人都有心,收埋唔駛俾人睇,要特登攞個心出黎俾人睇,即係做show,做show,乞人憎。

 仲有,個心,偏埋一邊,偏向左邊,偏心,搞親疏有別,偏心一定乞人憎。除非你係個曾字既右邊,加多一個心,搞平衡,但世上無一個咁既字,即係寫錯字啦,寫錯字,又係,乞人憎。

魚皇 | 28th Jun 2007, 23:14 | 創作 | (422 Reads)

好耐無update,先整一集,劉蓮太懶未有打稿,遲d補上。

=========================================== 

 劉蓮就介紹好多北京既先進新戲院,其實講黎講去,都係想搵人陪佢,費事孤單隻影去睇電影。有興趣應徵既朋友,識做啦。不過咁喎,如果唔想千里姻緣搭錯線既話,有一樣野要特別留意。

譬如你想約一個漂亮既北京女孩子,係浪漫既二月十四日睇濃情電影,你會點開口呢?你可能會話﹕「美女,今天晚上一起看戲好嗎?」咁呢,你好有可能,會食檸檬,因為佢會以為你想約佢係情人節,睇個吊哂嗓子既京劇。點解? 

因為北京人黎講,戲同電影,係兩個唔同概念既名詞。電影就係銀幕電影一格格,但戲呢?傳統意義,係指﹕京劇,京戲。 所謂看電影聽京戲,叫得戲院,咩長安大戲院,就係以演京戲、或者一d大型歌舞劇為主。 

我有一年去北京,係d長輩引領之下,去左一間大劇院,我記得係人民劇場,好高大的建築物,個場戲目真係忘記左,但觀眾好多,氣氛熱鬧,台上既京腔我真係聽唔明,好彩左右兩邊有電子顯示屏,字幕滾動播放,個場都算係我第一次係現場睇……唔係,係聽既京戲。似懂非懂,只係俾台上華麗既衣飾、鮮艷的化粧所引,就係咚咚聲中,散場。 

但有一點好有趣,台上唱戲,台下唔止聽戲,仲要叫好,喝采。呢d係聽戲既禮貌,就好似睇足球,見到踢得好就要喝采支持。但問題就黎啦,入左波我就識嗌啫,唱京戲……幾時先要嗌好呢?

有時我見佢把聲拖到好長,諗住係咪要拍呢? 又無人嗌,但佢粒聲唔出,整兩下做手,轉個身,無端端身邊d人爆一聲「好」﹗咁啊,唯有「矮人看戲何曾見,都是隨人說短長」,跟大隊囉。 

頭先講既人民劇場,或者長安大戲院,又或者係好有名既天橋劇場,都係一d現代化格局既建築物,如果你想聽京戲,聽得古色古香有韻味d,咁你要去一個地方,北京既湖廣會館。佢係宣武区虎坊桥,小弟有幸,個位前輩亦帶我去過呢度聽戲。 

呢次真係過足戲癮,因為個度係一處古色古香既戲樓,你想像下,古裝電視劇,去到d客棧咁既樣,樓高兩層,底層擺哂一張張既紅木枱椅,前面係一個高兩層既大舞台,天幕为黄色金丝缎绣制的五彩龙凤戏珠、牡丹、蝙蝠、如意吉祥图案。

 頭先個度樓高兩層,二樓就係包厢,设置仿古硬木家具,品茗赏戏。個次我唔知算係有幸定係不幸,坐係二樓包廂,好就係居高臨下, 但無得同群眾接近,有d距離感。

 個齣戲我有印象,係一齣打戲,好精彩,再飲一盅香茶,唔,好﹗好﹗我係亂嗌,不過無所謂﹗好似大陸作家當年既成名之作﹕過把癮就死﹗


魚皇 | 28th Jun 2007, 23:11 | 創作 | (342 Reads)
「莫」,莫須有的意思,當日你一心認為人地存心靠害逼害你,對李局長黎講,簡直係莫須有既指控;同樣今日人地叮走你,一樣都係莫須有。 

「禮」,話明先禮後兵,法庭上再點樣唇槍舌劍都只係口舌之爭,算係禮數周到動口不動手;案都審完,就要動手啦,被人叮走都係意料中事。

  「時」,真係識時務者為俊傑啦,佢唔叮你都應該走。點解?「時」字,左邊係日,右邊係一寺廟個「寺」,寺廟裏面住和尚,合起黎,就係做一日和尚就敲一日鐘,得過且過,莫校長你莫非想咁樣?你都無發揮可言啦。 

更何況,個個寺廟既「寺」字,下面係一個「寸」字,一寸兩寸既「寸」,即係話你肯定成日俾人寸,有咩好呢?


魚皇 | 28th Jun 2007, 23:09 | 創作 | (395 Reads)

今日我地講個「選」字,普選個「選」字。

首先係撐艇仔邊,上面有兩個好似已經既「已」字咁呢,個個就唔係讀「已」,係讀「自」,又係天地地支之一黎架,再下面,就係一個「共」字。 

我地黎睇下呢個「選字」可以透露咩玄機啦。撐艇仔邊,撐艇仔,唔係大飛唔係渡輪,仲係人手撐咋陰功,可以有幾快撐到上岸,大家心照啦。

 

咁個兩個好似已經既已字既物體,個個「自」字,又係咩意思呢?小學都有教,開口己、半口已,開口就係自己既己字、半開口就係「已」,但呢個「自」字呢,唔止埋口,直情係封左口﹗封都實一實﹗想普選,就要封左口先啦,唔好再咁奄尖聲氣、唔好再陰陽怪氣,明未?

至於個共字,嘻嘻,我諗,我都唔駛多講啦,呢個共字,簡直就係全個「選」字既核心重心中心啦﹗

魚皇 | 28th Jun 2007, 23:07 | 創作 | (347 Reads)

駕駛點解咁危險?望望個「駕」字你就知,上面一個加減既加,下面一匹馬既馬,騎係隻馬上面,淨係識加,一就加鞭,一就加油,總之係咁加速,加加加,無話減喎,你話點會唔危險呢?

 

仲有啊,上面個加字呢,係由一個力字加一個口字組合而成,揸車個d,淨係追求力,咩力?馬力啊?唔係坦克碌車靠你個個馬力,真係架車既馬力,係咁追求「隆隆聲」,但最弊就係唔識「量力」而為,個個以為自己係頭文字d,係咁片彎甩尾,其實只係得把口,咁樣加上黎,仲點會唔危險先得架。

 大家千萬要小心,如果唔係,你望下駕駛個駛字,馬字邊一個歷「史」既「史」,你被人吊銷牌照兼坐埋監,你係馬路飛馳既日子,就真係變成歷史,不能重現啦老友。

魚皇 | 21st Jun 2007, 12:43 | 創作 | (616 Reads)
一葉而知秋,又要睇下係咩葉,係黃葉既,根據自然定律,枯榮有序,葉黃便要落,秋至係自然不過之事。相反,如果葉色翠綠,仍是生機勃勃之時,竟然隨風而落,此乃畸型的生態,可能係風聲太緊所致。 咁究竟,呢次羅太口中既「一葉而知秋」,講緊邊種葉呢?佢一定認為自己係「綠葉」,夾生被人吹左落黎,兼且自己話明只係綠葉,綠葉雖好,都只係扶持牡丹的,要採就採花,點解要摘葉呢?

羅太一向被認為係仆心仆命盡心盡責,但坐官既要求可能要更多,一葉知秋,你睇個葉字,草花行頭,就係勸你要尊重大自然生態,有花亦會有草,唔好下下都剪花除草咁大動作。

葉字中間係個世,世界既世,直情勸你要世故d好似孫公咁,面面俱圓,下面個木字,就係話獨木難支,做官既都要廣結盟友先得架。


魚皇 | 20th Jun 2007, 14:37 | 創作 | (479 Reads)

新,新聞的新,拆起黎,就係立、木、斤,左邊係站立個立,下面一個木頭既木,右手面,係一個斤,斤斤計較既斤。

 立字,中國話有云,人無信而不立,新聞既新,重點唔單止係新,仲要係「信」。 

立,下面係一個木字,一木即獨木,在獨木橋站立,最考平衡,偶一不慎,直墮深淵。 

右面一個斤,說明新聞一定要斤斤計較,不能草率輕信,仲有,就算新聞已經無乜人會信,但做呢行既都一樣要信,要相信新聞係有份量係有斤量,字字千斤,唔好呃秤啊。


魚皇 | 19th Jun 2007, 14:38 | 創作 | (390 Reads)

炒字,左火,右少,多少個少,證明左,炒野當然要有火,但火既野,少少地好啦,太多火,會燶。你睇,淨係睇個字形,已經道出了炒的要訣。 

仲有,所謂火光紅紅,又講中左目前既股市形勢,紅色資金主導大市,真係紅色獨大。 再睇下個炒字,火來自左邊,果然應驗,火來自我地中國大陸,係呢方面,買股真係寧左勿右,你唔見好多傳統藍籌都相形失色咩。 

炒既右邊係多少個少,少字又可以再分拆,上面一個大小既小,下面一撇,成個一剔牌個個標誌咁樣,呢個係咩意思呢?小,就緊係小股民啦,股市興旺好多小股民受惠,仲有啊,早個排,好多細價股瘋狂咁升,以小勝大,所以千祈唔好睇小呢d小股同小股民。  

但又要認清形勢,小字下面踩住塊滑板,可升可跌,左邊如果唔係出火,而係出手干預調控,即係變左剔手邊,就係一個抄字,抄家個抄,個時走唔切,各位小股民,同被人抄家無分別,切記切記。


魚皇 | 19th Jun 2007, 13:45 | 創作 | (445 Reads)

Next