香港新浪網 MySinaBlog
魚皇 | 31st Jan 2005, 15:14 | 一般 | (388 Reads)

一月三十一日

天時地利人和 
 

呢排,紅色,對特區政府不利。或者咁講,一樣原來係大吉大利的賀年喜慶顏色,對特區黎講都會變成唔多吉利。紅蟲、紅灣、紅火蟻,同埋曾慶紅。 

國家副主席去到委內瑞拉無雷功咁遠既地方,都要記掛住我地豆腐潤咁大既香港特區的一份已經發表左既施政報告,都仲要引黎一番風波爭議,都仲要搞到特區有半日既監介﹕查找不足既力度仍然不夠喎董生。即使後來新聞署出黎澄清,但今日既好多報紙當你無到,連香港商報呢類友善報章都仲係話「施政報告仍有不足之處」。你話係咪「人衰行路打倒「騰」,食舊豆腐都鯁親。」 

俗語話有咩傾唔掂,就一五一十講掂佢;有句就粗俗少少,叫四四六六拆掂佢。但原來呢句稍嫌粗俗既說話係大有深意既,你諗下,胡錦濤主席先俾左四個字「查找不足」特區政府,曾慶紅後俾六字真言「天時地利人和」,呢次真係有咩唔掂,都有呢兩句「四六真言」可以依持啦。 

呢句六字真言,人人都有不同解讀。首先特區積弱七年,最近有番少少起色,大病初癒,一定會特別小心身體,而且會好認真咁總結經驗,咩中西藥啊咩瑜伽健體班都會好有興趣想學,呢段係黃金時期,再過多一頭個半月,身體好哂忘記病既痛楚時,就會無恒心同逼切性去運動啦。所以把握天時,絕對係特區改革既好時機。 

地利方面,曾慶紅講得好,地利是將香港最自由及最活力的一面表現出來,首先活力先生一定場場頭馬啦呢輪,得到副主席既祝福;其次就係各大民主派同街頭示威客,肯定會施展渾身解數迎接各大小政官員,最好阿曾慶紅可以探下阿盧婆婆啊、長毛啊,一定對香港既自由活力有更深既理解。以後如果再有咩批評特區政府施政的言論被人話「反中亂港」,大可抬出曾慶紅既說話作擋箭牌啦。 

人和仲好笑,講緊和而不同,以和為貴,但轉頭阿曾生又話民主派日日話平反六四係阻礙溝通,若做甚麼事情都是以顛覆性態度,就不好辦咁話。咁點樣體現和而不同呢?唔講平反六四專講三個代表,咁就梗係「以和為貴」包無拗。


魚皇 | 28th Jan 2005, 14:46 | 一般 | (397 Reads)

一月二十八日 

錦繡拼盤

男士們最希望就係紅火蟻既疑雲可以續持多兩個禮拜,唔使多,啱啱去到214日就夠啦,到時一句「慎防交叉感染螞蟻過花」,就真係慳番一千幾百情人節花錢。不過到時花店老細就會流下情人的眼淚,各位亦要慎防情人堅持你去購買鮮花以證明「愛情好硬淨、唔怕螞蟻叮」。有報紙話元朗既花農,叫記者唔好再講咁多紅火蟻新聞,愈講愈多邊個做黎買花,真係愈描愈黑。

講開愈描愈黑,一定唔及數碼港的謬誤呢單野黑啦。七年前的舊帳,雖然日日都被人掀一次,但畢竟事過境遷,除左成為大眾既口頭襌或者為牛頭角順嫂唱衰政府提供一個堅實理據之外,都唔會有人仲想叫董生點負責啦。誰不知曾局長咁勇主動出擊主動講番呢單野,點知主動出擊都仲要出閘脫腳,連立法會有無否決分拆地皮咁既簡單事實都要記錯,d議員真係多謝哂老細,估唔到主動提供埋彈藥俾大家。報紙呢幾日又開始熱烈討論「地皮補貼」形式究竟啱唔啱,你話係咪「自己攞黎衰」?如果政府咁鐘意為自己翻舊帳做平反既話,我諗大家最有興趣想聽下董生點為「八萬五已經唔存在」啦,同埋「唔告胡仙」呢兩單大事解畫囉。多一事不如小一事啦,連咁多人支持既趙紫陽,都要等十幾廿年先有機會翻案,特區政府……唔……太心急。

有關翻案,今日都有一個人想翻案,佢就係何偉途。佢今日返港,相信所有記者都目標明確,主要想知「你究竟有無做過」?呢件事翻案難度极大,首先除非何偉途竟然認自己有嫖妓啦,好啦佢唔認啦,咁即係公安屈佢啦,香港媒體實大做特做公安屈人,但上次話完公安屈人後,大陸馬上出示左更多既證據,今次如果再講屈佢,真係估唔到上面會出示d囉。而且呢d嘢講個信字既啫,你點樣證明你無嫖妓呢?證明你有就好易,唔理真定假,出示一堆床上照就得;但點話自己無呢?有咩證據呢?點樣可以話俾人知個個避孕套唔係自己既呢?真係口同鼻拗。


魚皇 | 27th Jan 2005, 14:45 | 一般 | (349 Reads)

一月二十七日

紅禍

以前我地既蒙古鉄騎橫掃歐亞,所向披靡,被外國人稱之為「黃禍」。今時今日,紅禍出垷,由美國澳1洲台灣大陸直殺香港,其間通行無阻,快過一地兩檢智能身份證。

香港同「紅」直係太有緣份,上年小小一條無乜大殺傷力既泳池紅蟲事件搞到要驚動到申訴專員黎訓斥官員收場,今次黎既係窮兇极惡生命力超級頑強既紅火蟻…特區官員究竟有無辦法應付呢?

其實呢次真係香港官員最佳最佳最佳既表現機會,零五年第一個月都未過,已經傳出六天部門都晾唔掂衫事件,真係顏面何存??就好似足球比賽一樣,開波十分鐘先失一粒,如果唔快d追番一球,真係成場都被人㩒住黎打唔慌好過。依家,又有一個強大攻勢黎緊,紅火蟻攻到黎禁區,雖然仲未有跡象起腳射門,但俾佢起到腳真係唔得掂,特區一眾高官應該快快齊手切斷攻勢。如果俾d螞蟻爬下爬下爬到大球場度,仲要爬到去黎踢賀歲波既巴西球星個度…仲要咬左一啖…哈哈﹗邊個賠錢??

梗係問大陸攞番錢啦﹗﹗今次件事真係「證據尚未十足、結論呼之欲出」,個頭大陸吳川話有紅火蟻,呢頭天水圍就現蟻丘,你話係一種咩關係呢?最慘就係劇情超級老土,又係大陸有事發生但就唔講唔講仲要淨係唔講俾香港听,然後一個唔該,螞蟻唔識一國兩制,照爬過深圳河登陸香港。應該問下陳洱,今次紅螞蟻既事,又係咪份屬共產黨既事呢?係咪香港又唔駛理唔准討論呢?大陸d官好似d阿婆咁,成日將d野收埋落個餅乾盒度,你收埋你d衰野唔緊,但你d衰野原來關我事喎﹗所以香港其實都好想落實一國兩制,你既你既我既我既,但依家變成「一國兩制、大家弊翳」。


魚皇 | 26th Jan 2005, 14:44 | 一般 | (386 Reads)

一月二十六日  

創地標獻新猷

呢一日,被稱之為「死亡十字路口」既旺角砵蘭街山東街豉油街一帶既黃色行業從業員,聚首開會。為首既係骨精強攤開報紙同大家講,董生尋日落區,不過唔係聽民意見市民,而係去朗豪坊做開幕嘉賓。我地,混左幾個兄弟入去,本來諗住向董生直接反映意見。肥豪即刻問﹕成唔成功?我見今日無乜報紙報話有色情行業既從業員同董生會面既消息喎。骨精強話,我地呢d係高危行業,點會咁易曝光?我地尋日已經同董生取得初步聯絡,問左佢,朗豪坊開幕後,會唔會可以繼續俾啖飯細佬食、唔好趕盡殺絕呢?

肥豪話,阿強哥,我好想知你用d乜理由要求董生咁做呢?呢輪風頭火勢,我懷疑個d咩紅火蟻,其實都係一個掃黃既行動代號呢架,你點開口叫人唔掃黃呢?

骨精強話,哈哈,呢個董生最鐘意就係乜鬼「創地標」,最為d外星人著想,驚佢地降落地球個陣唔認得東南西北旺角中環,做提示符號。我話俾佢知,朗豪坊依家係旺角地標,我地既黃色招牌幫到唔少手。試諗下,高雅既朗豪隔離竟然係大眾化既燈紅酒綠煙花之地,仲要近到好似係吉隆坡雙子塔既距離,形影不離,連設計師都話係朗豪同黃色招牌簡直係一個奇妙既組合,無左我地,邊有咁神奇,咪同普通商場一樣。所謂男人不壞,女人不愛;商場不黃,掃貨不狂。

肥豪話,你呢個都係歪理,我做呢行都唔幫你;但阿董生點答啊?董生話,好啊,我會係七年之後,叫局長係報紙上話俾你聽我地既決策過程。


魚皇 | 25th Jan 2005, 14:43 | 一般 | (397 Reads)

一月二十五日 

為伯伯開運動醫生處方 

陳醫生臉對眼前的病人,神色凝重,心事重重。眼前病人雖未至病入膏肓,但都真係久病纏身,好難斷尾。最重要係,呢輪上頭有指示,要求私家醫生開運動處方,唔係唔開得傳統的藥單,但唔開運動處方顯得自己功力唔夠咁,絕不能掉呢個架。但呢位病人……開咩運動處方呢?

病人好有耐性,等陳醫生開口問症。陳醫生話,唔…你有d手腳唔協調,即係有時左手想攞水飲、右手會整瀉杯水,更莫講話你斟水個陣隻腳會跳跳下搞亂檔…唔,你明唔明?病人點頭話明,但補充一句﹕我相信我d手腳係屬於同一個身體,佢地係有著同一個目標。陳醫生暗暗嘆氣,病人最大問題係唔認自己有問題,佢唯有逐樣講啦﹕啊病人,你隻腳就步速過慢,咁啊關節呢講疏於鍛鍊就有點僵硬……而且你起步速度過慢,由零至一百米既起動速度係正常人既十倍,即係等你郁就不如自己行好過…所以我建議既處方係﹕每日係街做小販擺賣,我地會不定期通知食環署黎捉你。呢個係絕佳訓練,首先啱哂你「居安思危」既處世思想,所有小販係街尾就已經實街頭既情況,街頭揚起多粒塵、街尾都會發「t騰」,而且你成日街頭望到街尾,有助你更加「高瞻遠足」。仲有啊,謀定後路啊,你要諗定逃生策略,有咩食環風暴黎度都可以走定先。

仲可以提升你既危機處理能力,真係有小販殺到你,你點做呢?係做埋個單百幾蚊既生意?定係拔足布魯逃呢?係扮阿伯求情啊?定係發惡攞架車撞人再鬆人呢?病人,只要你跟足我既運動處方,一日扮足七日小販,包你講野快d行動快d望得遠d…大大有益處。

病人猶疑﹕咁如果我都係快唔到呢?醫生話﹕仲好啦,日日俾人拉一次,日日罰款進貢庫房,香港經濟自然好,總之百利無一害啦。


魚皇 | 24th Jan 2005, 14:42 | 一般 | (346 Reads)

一月二十四日

求神變害神

呢一日,黃大仙廟外,馬婆婆滿目含淚,望住高高在上但又親切近人既各路神像佛像,佢地慈祥既臉目被煙薰到黑媽媽,仍然無怨無悔;但馬婆婆就好後悔,好後悔自己點解會攞d含致癌物質既香向菩薩焚燒呢?點解自己會攞d有毒物質供奉俾菩薩呢?咁咪特於新年送禮送毒瓜子?馬婆婆好後悔,佢年年都送頭柱香,仲要大到成碌木咁粗,菩薩年年都見到自己第一個好積极咁送毒靠害,唉…佢明白點解自己咁多年既誠心許愿都落空無得實現……

呢一日,黃大仙廟外,廟祝黃伯滿目含淚,望住高高在上但又親切近人既各路神像佛像,佢地慈祥既臉目被煙薰到黑媽媽,仍然無怨無悔無出過聲,廟祝黃本來一直都好滿意各路神佛既沉默,佢地既沉默造就佢解籤、就好似神佛既代言人角色,負責幫神同人溝通聯絡,可以話係客戶服務員。但係,依家佢就怪神佛點解咁沉默,菩薩啊,你地明知日日黎燒既香有致癌物質,你地金剛不壞身就話唔怕有害啫,我小小一個代言人,邊受得起啊?你點解唔出聲提提我地呢d做細既呢?睇怕咁落去我好快就會係上邊服侍各位囉……

美國波士頓既華僑,佢地正議論緊有幾個偷渡中國人蛇被美國聯邦調查局懷疑佢諗住用咩「骯髒彈」美國發動恐怖襲擊。鄉親夫老都唔明,呢幾個鄉里個身可能偷渡個幾日無沖涼,係有少少骯髒,但應該唔會係殺得死人既骯髒彈啩?點解會懷欵佢地呢?我地美國一向講求自由民主法治人權公義,一定唔會亂噏廿四唔會係人地講乜佢就信乜既,然後鄉親們晃然大悟,一定係呢批中國人蛇安全到埗後燒香還神慶祝,被科技先進既美國情報人員偵查到佢地焚燒緊一D會釋放致癌物質既東西,以為零五年最新的長條型隨身帶既骯髒彈,因此將佢地通緝。


魚皇 | 21st Jan 2005, 14:41 | 一般 | (334 Reads)

一月二十一日 

太陽底下原形畢露

在此,我莊嚴聲明,太陽底下曬衣,是每個公民基本權力,也是基本責任。原因詳述如下。

先說責任,施政報告大談環保,甚至連阿爺年代的海水化淡廠也再搬出來說,可見政府的環保之心;而利用天然太陽熱力曬衣,簡直就是最環保不過的行為。科學雜誌數據顯示, 每四十分鐘得到的太陽能能源,遠超過燃燒一年的石油。這是每個地球村的子民,每個現代文明城市的居民,最基本的責任。節省能源、落實環保的責任。我敦促環境運輸及工務局局長廖秀冬馬上發言支持居民在戶外利用太陽曬衣服的行為,甚至要立法予以鼓勵。

這是公民的基本權力。太陽不為誰人而照,乃為光照萬物,人人都可享用;沙灘上肉體橫陳赤身祼體曬太陽曬肉體,何曾惹來有礙市容的投訴指控?莫非人人身材都是362436?為甚麼居民利用太陽曬衣服,便要惹來指控?有說,此乃公眾場合不可曬衣,那只能說明,香港欠缺曬衣場。香港有沙灘供人曬身,比堅尼t-back當然不會橫臥在金融中心頂樓曬太陽啦;香港卻沒有曬衣場供人曬衣,唔通叫人用風筒吹乾哂衫?

公民有公民抗命的權力。在公眾曬衫便是公民抗命的表現。有牛頭角順嫂為證,現時的居住環境根本唔鼓勵你用景衫竹曬衫,樓與樓之間接觸親密,幾乎伸手可及,一陣收錯對面陳師奶條底橫入屋釀成家庭悲劇,社署又一身蟻。屋內合法地方不能曬,但衫又不能不洗不能不乾不能不著,只能延續七一精神,就係走上街頭,不過人地曬馬我地曬衫,曬衫公民抗命有理﹗﹗

本人亦對「有礙市容」四字相傕。一本介紹新加坡的旅遊雜誌,特意闢出一頁,介紹新加坡公民「萬國旗」飄揚的人文風景線,詳細解說如何利用晾衫竹晾衫,step by step,我看不到一種連旅遊雜誌都會介紹推薦的行為如何是「有礙市容」呢?那些樣樣唔關我事的官員嘴面,才叫醜。


魚皇 | 20th Jan 2005, 14:39 | 一般 | (284 Reads)

一月二十日

中港一家親 

係未實施cepa之前,內地已經悄悄崛起一批自由行來港的熱潮,呢批人士三五成群,個個好人,最緊要同梁錦松前財政司一樣,公事私事分唔開,休假期間一樣係醉心工作之中,隨時處於作戰狀態。佢地人數唔夠自由行旅客多,亦唔見會買金買手機刺激消費,但勝在幫到手,幫到邊個手?香港特區的警察囉。呢批自由行咪就係來港懷疑執法既民警囉。

公安來港未經許可執法拉人監視人甚至連搵食架生個幅手銬都帶埋黎香港旅遊,吃喝玩樂之餘不忘除暴安良警惡懲奸,大大節省香港警力。早排有放風消息話,諗住將抄牌工作外判,以騰出更多前線人手執法;唔駛咁麻煩,大量引入國內公安在港執法,真係一個抵十個,個d諗住十二點就唔駛理香港警察既惡人,突然就會聽到另一把聲話「對不起,十二點後我們話事」。

其實大陸跨境執法真係歷史悠久規模龐大信譽好字號老,上海首富周正毅被捲入既金融腐敗案,當時有一批上海居民因為家園被非法清拆,集體上訪北京告狀,上海公安竟然跨境走去北京拉人,跨境執法,中央震怒北京公安也是敢怒不敢言,無見到上海有咩官員受罰,北京亦跟進唔到咩野行動。所以,你叫一國兩制下、經濟實力超群、政治力量全無既香港特區政府,有咩資格嘈嘈閉得罪呢批自由行公安民警大佬呢?

愈黎愈多事話俾大家聽,一國兩制之下,特區政府的能力,其實好渺少。我地為特區既無力,默哀一分鐘,當然,在心中。


魚皇 | 18th Jan 2005, 14:38 | 一般 | (274 Reads)

一月十八日 

紫陽無限好,只是到黃昏

開始質疑古人個句說話「唔怕生壞命,最怕改壞名」,照計改左個好名,紫陽紫陽,紫氣東來,貴人出現,應該可以大吉大利,點解趙紫陽到最後,連死都不得自由,或者好似佢個女咁講,只有死先可以自由。

封建時代,官員被稱為「父母官」, 強調咩愛民如子,做唔到都起碼強調下;依家我地進步左啦,用現代化觀念管理,我地話官員係CEO,不能為地方賺錢營利係最大既罪惡,結果,官員真係連愛民既心都無埋。每次諗番起趙紫陽走落天安門廣場度,講個番說話,真係名副其實既遺言,遺既唔單止係趙紫陽最後一番公開說話,我相信打從之後,都唔會再聽到官員講D咁有人性既說話。趙紫陽個番說話,第一句人盡皆知,「我來遲了」,仲有句仲激動人心,就係「我們老了,無所謂;……你们还年轻,来日方长」。呢句已經官員同人民既對話,反而好似係阿爸勸個仔要保重身體一樣。依家既官員,有可能講得出呢種人話嗎?

不過令人唏噓既係,當日學運既點火大學,北大同清華,據記者訪問所得,呢兩間大學既學生好多都唔認為趙紫陽係何許人,畢竟呢批大學生,十五年前仲細,懂事既時候趙紫陽已經去左打golf。不過,根據大陸學者,余杰既形容,佢覺得現在北大清華,已經無左個種政治革命熱情,係官方既刻意縱容之下,大家沉醉係金錢女人之間,忘記左過問政治,唔知當日趙紫陽講「你們還年輕,來日方長」,有無諗到呢個來日原來係咁既呢?

見到有趙紫陽網上靈壇,好多人留言,有人話,係中國做官難,做好官更難,想人地好似你咁一樣做好官仲難…想人地好似你咁一樣做好官仲要可以保全自身,仲難。


魚皇 | 14th Jan 2005, 14:37 | 一般 | (273 Reads)

一月十四日 

又變香港乜乜乜

今年絕對係最多談論話題既施政報告,淨係講下呢個「官商勾結」下詔罪己已經有排八卦,董生成為警訊最新的發言人,頻頻呼籲公眾舉報罪案,舉報官商勾結,爭在講唔出廉署的舉報熱線咋。唔知呢兩日會唔會真係有好多人走去廉署度揭發舉報呢?廉署咖啡短缺,急需入貨。

對傳媒黎講,呢份施政報告簡直係一個好消息,因為董生已經三番四次講,我們無官商勾結,如果有,香港有一個咁活躍既傳媒,歡迎你地監察舉報。傳媒突然間又再次被董生肯定左社會監察既功能,唔係以前傳媒亂港啦喎。董生咁講,唔驚更加刺激左各位狗仔隊既腎上腺激素上升咩?以後真係三司十一局,每人後面各有三枝長鏡頭監察跟縱。記者人手短缺,急聘人手。

施政報告答問會亦成為左推銷自薦既地方,陳偉業公然要求政府俾番一個半個調查委員會既職位佢撈,話要同阿長毛李卓人組隊調查官商勾結,不過董生拒絕左,陳偉業憤而離席抗議,同施政報告發報當日,長毛既離席可謂如出一轍,首尾呼應,伏線明顯,好橋。計我話,佢地諗左條咁好既橋出黎,自編自導自演自薦不過衰左,老細唔肯投資,唔緊要,呢種創意唔好徒,轉去做咩文化產業研究,一定可以幫助到香港既創意工業。香港缺少食腦既人。


Next