香港新浪網 MySinaBlog
魚皇 | 30th Dec 2004, 12:56 | 一般 | (284 Reads)

十二月三十日 

你還遊行嗎? 

元旦日,有節目嗎?你還遊行嗎?我同塔塔米講,駛唔駛用塔羅牌占卜下,個日會有幾多人去呢?塔塔米話,我諗都唔駛占卜啦,你覺得會有好多人出黎咩?我話都係,首先,一向都好鼓勵教徒遊行既陳日君主教,都少有地,叫教徒唔好去,話咩主題混亂唔得統一,想當日既七一遊行,訴求一樣咁多元化主題一咁唔統一,唔知點解個時又去,真係唔明。而次今次元旦前夕,竟然發生慘絕人寰既海嘯大悲劇,大家都忙於尋親救援,收拾心情,點會去遊行呢? 

塔塔米話,民主黨已經率先話退出唔搞遊行,但職工盟個d仲去,點解佢地又唔肯休息下呢?我話,可能係,災難發生,但地球仍然轉動緊,無可能咩都唔做架,況且佢地就算唔去遊行,又可以為災民做d咩事呢? 

塔塔米話,如果真係要搞遊行,我反而諗到個主題,一定好多人響應?就係元旦萬人祈福,為海嘯災民失蹤人民送上問候祝福,再搞d義演義唱籌款,肯定多人參與啦。我話唔得,人地元旦遊行係要抗議鬥爭架嘛,你太溫情啦;計我話,應該搞番個「反政府救援後知後覺」大遊行,肯定仲多人參與。呢幾日睇報章既社論,我一心諗住,呢單世紀災難都好難有好多評論啦,最多咪講下預警機制,照計政府應該無乜壓力既,點知一個屈尾十,已經被人炮轟政府反應遲鈍……估唔到,特區政府真係可以將咩事都變成關佢事,點都俾到位人地入,本來係攞分既行動,都要變成係亡羊補牢被人拖住個鼻……真係好難明﹗好難明﹗作為小市民,我永遠都唔明,派出救援隊伍…真係咁難既咩?


魚皇 | 29th Dec 2004, 12:56 | 一般 | (305 Reads)

十二月二十九日 

不要貧窮 
 
脫貧,國之大事,男兒首要任務。話說董生尋日召開記者會商討扶貧委員會事宜,而我地江南四大才子,超市佳、民工懷、損山窿同我,釣魚王,亦同時召開左一次民間脫貧會議。 

會議召開之初,小弟杞人憂天咁話﹕老實講,以我地四個人既經濟狀況,都學人講脫貧……會唔會俾人話折墮㗎?畢竟聯合國既貧窮定義,係每人每日一蚊美金喎?超市佳話,你都傻架,有人窮過你唔代表你係唔窮喎﹗咁依家你真係月底得番幾百蚊係袋都可能無喎,咁你窮唔窮呢?唔通下下諗住印度個d赤貧饑民,唔通你又可以過度日子咩?你就折墮啦﹗快d諗下點脫貧啦﹗ 

損山窿語重心長咁話,唔好生仔,千祈唔生仔。嘩,聽佢口氣以為佢係過來人經驗之談咁款,我話點解,佢話你無听特首講咩,今次係要消除隔代貧窮,即係父母窮,佢既下一代仔女都會窮,我認為最斬草除根既方法就係﹕唔好鬼生啦﹗無下一代,就無隔代貧窮啦﹗﹗我地就脫貧啦﹗

我話得啦得啦,拉呢個無後不孝既友仔出去行刑﹗斬腳趾避沙蟲。民工懷話,有d道理架佢,好多人都係無錢亦覺得俾唔到幸福d仔女,寧願唔生架。我話咁依家生左個d,都要脫貧架;同埋我係講緊我地幾個點脫貧喎﹗損山窿話,咪啦,一於長捧阿仙奴,包脫貧﹗我地無人理會佢呢個爛賭二既無聊提案,我話不如咁啦,調低d條貧窮線,月入一百蚊先叫窮,咁我地咪好富有囉﹗我呢個笑話得到得到佢地盛大既粗口歡迎……唉,毫無教養。 

其實香港既貧窮問題,都係離唔開過幾範,教育做好d,確保有一定學歷,然後人為製造一d就業機會,等佢地可以得到實戰經驗,然後放佢出番黎社會度,真刀真槍咁博命就業……博到就脫貧,博唔到呢?其實會唔會博唔到呢?讀哂咁多書其實都可能搵唔到工做的……點算?係咪又係要投身綜援保障網呢?如果將來既趨勢真係只得番高技術工種既話,有無可能令全部學童都晉身成高級知識份子呢?無可能,點都有d人讀唔成書,咁點算呢?再培訓都要培訓完有個d工先得,d工點黎呢?扶貧容易,就業困難。


魚皇 | 28th Dec 2004, 12:54 | 一般 | (524 Reads)

十二月二十八日 

海嘯 

錢鋼係唐山大地震度,寫過以下既句子﹕這是一個注定要用黑色筆填寫的日子。我諗,呢枝黑色筆又要再次拎起,寫下另一個日子﹕十二月二十六日。印尼地震引發既海嘯,造成超過二萬人死亡,三萬幾人失蹤。當中災區包括好多香港人既渡假勝地泰國布吉,我有個老友py最近新婚諗住去布吉度蜜月,我第一時間打俾佢,叫佢千祈咪去。 

佢有d猶疑,佢話乜都plan好哂,佢真係唔想中途放棄,佢驚影響哂成個新婚行程。我話痴左咩,個度死人塌樓,你放假幾時唔去得啊,命得一條。佢話唔係喎,睇報紙話有個香港勇消防,一家三口勇闖布吉繼續假期喎。我話你好學唔學,學個個做乜呢?個位消防員哥哥,我真係覺得何勇之有呢?頂攏係用個「莽」字形容。如果你係為左救人,履行你消防救人既職責,我一定讚你「明知山有虎偏向虎山行」,但如果只係為左行山,而其實根本可行可唔行,你仲要去,咁就係不智到极點。災後餘震頻仍,誰人可保安全? 

Py見我咁激動,都唔敢點再堅持,但佢就嘆左口氣,話,我地成日講,死左咩人都無事,地球咪一樣係咁轉,估唔到呢次既地震,竟然有科學家話,影響到地球既轉動……咁,真係好大件事。我話咁咪係囉,你仲去黎做乜呢?佢話,我覺得生死真係有定㗎,天災邊個避到啊。我話唔係喎,今次咪好多人話呢幾個國家,無加入到國際海嘯預警制度協調小組,所以搞到咁大件事。有美國科學家話,呢次慘劇俾到一個好大既教 訓呢d國家。我覺得簡直係講風涼話囉,呢幾個泰國印度斯里蘭卡全部都都係發展中國家,財力技術各樣都有限,據講佢地所處既位置都唔係地震活躍地段,本身危機意識係不足。咁你外國專家,有財有技術又有意識,點解唔協助教育佢地成立既個預警小組呢?我真係唔知佢地有無力邀呢d第三世界國家加入呢?曾經點幫佢地呢?覺唔覺得有責任要教佢地呢?事後孔明當然有佢必要既作用,但聽落有d刺耳,好似講風涼話咁。 

Py唔敢再講野,急急同愛妻商量取消行程的安排,啱啦,幫唔到手,都唔應該將自己置身潛在危險,變成人地救援既負擔啊。


魚皇 | 24th Dec 2004, 12:52 | 一般 | (275 Reads)

十二月二十四日 

平平安安過一夜 

佳節當前,想同咩人渡過呢?我諗過啦,千祈唔好同samsam過,唔係話唔想見到佢,但係佢係一個堅定不移五十年不變的環保死硬派,佢已經去到一個程度係,見到商場d人買花紙包禮物佢會走上去喝止…個年既中秋節我已經同左佢去阻止人地買月餅啦……佢仲會見到成條街都係聖誕消費氣氛既時候,會搖頭嘆息﹕消費文化腐蝕哂聖誕佳節既人心,忘記哂節日意義之類……救命救命﹗不過佢提議個個行山賀聖誕都幾好提議,如果呢度係北歐…行雪山就真係唔錯啦…哈哈。 

同塔塔米過會係幾有趣既一件事,不過佢係平安夜會好唔得閒,因為有無數既單身男女會聚集係佢度問愛情幾時黎,邊個先係真命天子咁樣,塔塔米話佢係呢個時候出黎既男女真係如狼似虎,好想係呢一兩日內擺脫單身宿命咁款,因為聖誕歌聲總係特別令人寂寞……每逢佳節倍思親,聖誕佳節就諗愛人……其實,你只要諗下,係西藏,邊有咩聖誕節啊,咩2425日咪又係普通日子,眨下眼過左啦,諗咁多甚麼佳節無佳人做咩呢?

調查機構話甚麼單身人士最易感有危機云云,唉,諗下西藏人民就無事架啦。 
 

平安夜真係要平平安安啦,一個人去睇戲就最安全啦,無論係幾逼爆幾人氣既電影,絕對唔駛提前訂位,到時到候行入場即可﹗一個人一張飛仲可以坐到中間靚靚座位……我認為個d乜心理輔導機構,如果想解人心結既話,唔係話叫d人唔一定要同佳人過可以陪阿爸咁老套,應該大力宣揚一個人的好處,一個人又會係幾咁方便,用正面價值貫輸咁先啱既。 

不過睇戲還睇戲,一定要入戲院睇啦,如果又諗住係屋企非法下載,咁今年你的聖誕一定大把人陪你啦,監倉見啦老友﹗﹗


魚皇 | 23rd Dec 2004, 12:51 | 一般 | (438 Reads)

十二月二十三日 

做個賺錢中國人 

就到聖誕,同超市佳民工懷佢地成班討論來年發達大計,個個都話要向民工懷學習,番大陸搵真銀,皆因大陸處處商機無限。民工懷好冷靜咁我地講,根據毛主席既辯證法,有得必有失,中國可以話係最易搵錢的地方,但亦係最難搵女人既地方…… 

我話唔係啩,中國係黃色大國…民工懷話,咄﹗我講既係正經既女人,搵個伴侶個種女人,中國地大物博,但其實資源緊張,舉個好好笑既例子你聽,中國每人平均可以使用既鐵路長度,唔夠一枝煙咁長……哈哈﹗最匱乏既資源就係女人,男女比例嚴重失衡。中國既男人比女人多……多九千萬﹗哈哈﹗如果d女人全部從一而終絕不改嫁…亦唔一腳踏兩船,咁就慘啦,又成億人,一個億既人,成兩個香港咁多既男人…係搵唔到女人架﹗﹗幾恐怖﹗你仲話上去做事﹗ 

我話,咁多女人去哂邊呢?民工懷話,有句順口溜係咁樣形容,為左傳神請准許我用普通話朗讀﹕一級美女,飄洋過海;二級美女,深圳珠海;三級美女,北京上海;四級美女,回家喂奶;五級美女,等待下海。 

超市佳哈哈大笑,拍桌而起﹕男兒志在四方,大丈夫何患無妻﹗﹗我補充﹕係有錢既大丈夫何患無妻,呢點好重要。超市佳話﹕所以更加應該上大陸發展啦。你睇睇呢個李鐵,中國踢波既國腳,掃到成個冬菰頭咁,驚咩?怕甚麼?一年賺成七百五十萬,中國零四年最富有球員﹗﹗我唔信無女朋友啦佢﹗ 

損山窿話,唉﹗我地祖國真係太富有啦,成班軟腳蟹咁世界盃外圍賽都入唔到既球員,竟然搵成百萬一年,真係派錢啦我地。反而中國最有實力最值錢既國寶級球員孫繼海,竟然都唔夠幾個國內搵食實力平平既金錢之下,國內既賺錢門檻真係低得不能再低啦… 

民工懷話,你知唔知大陸既網民對呢個排行榜有咩睇法?好好笑,就係「中国人养了这么多饭桶.」,仲有就係「錢搵夠了,架都丟哂了」。


魚皇 | 22nd Dec 2004, 12:51 | 一般 | (247 Reads)

十二月二十二日 

第一 

記唔記得自己既第一次呢?例如第一次踏電梯,第一次搭火車……呢幾日我都好努力諗緊,第一次搭火車既感覺係點架呢?一定係好刺激好新鮮俾到好多幻想自己……雖然我已經忘記左個種感覺。睇番新聞,馬鐵通車,好多市民蜂擁坐第一班車,個種歡呼雀躍期待既神情…對住鏡頭舉起v字勝利手勢……我忍唔住問﹕搭鐵路火車真係咁興奮既咩?第一次坐既感覺,真係咁好?坐馬鐵同坐九鐵坐地鐵有咩唔同?其實重要既係個種心情,就好似大家睇首映一樣,聽日睇唔係唔得,但無左個種比你優先優勝第一既感覺。 

塔塔米話,可以第一有邊個想第二呢?正如d退休高官咁,可以第一時間就去私機構度做野搵真銀,有邊個想等到第二年呢?第二年可能已經變左第二個人選啦,馬鐵過後無站搭啦。 

我話香港成日都話要爭第一,乜都係世界第一流既中心第一流既文化第一流既區域,唔止第一仲要係世界第一,但好笑既係,我地連隔鄰一個彈丸之地、同我地屯門元朗差唔多人口既澳門我地都比唔上呢?阿爺寧願讚人地都唔讚我地,澳門無定d乜野世界第一既定位喎,但係呢場港澳爭霸戰就攞左第一啦。 

塔塔米話,知唔知劉翔入奧運決賽既時候,點樣為自己定位﹕就係入到最後八強、爭取攞到名次就okay,唔係話唔諗住做第一,但戰術上並非以第一為目標,結果,佢係第一。 

我諗到既係美國既夢幻籃球隊,以前既夢幻隊真係名副其實只有夢中才可有此實力,所以每年美國夢幻組合都係以金牌為目標,但實力一蟹不如一蟹,但目標從不肯調整,仲係死口話要金牌仲係話要每場大數對方十零廿分先收貨仲係要世界第一,結果……四強不入。香港,以前都好夢幻,但…依家係咪都要認清番自己既現實,米高佐敦退哂休啦,我地未有超班球星,唔好再以第一為目標啦。


魚皇 | 21st Dec 2004, 12:50 | 一般 | (290 Reads)

十二月二十一日 

冬大過年 

今日過冬,雖然無利是錢收,但冬都係大過年,放工唔駛諗梗要番屋企食飯,最多係食完飯再出黎蒲既啫。馬上同超市佳、捐山窿同阿葉約時間,點知個個同我講,唔駛等佢地番屋企啦,直畢九點零出到黎啦;我話點解呢?唔駛做節?

佢地話,過節咪係公司過囉,爭在無湯圓之嘛,我話過冬都俾你地走?超市佳話,你無睇新聞咩?最新既打仔番工時間, 2001 41 43 42 45 ,過冬又點呢?日短夜長,工時一樣咁長無分別。 

超市佳話,一早準備左去公司樓下既超市度買微波爐湯圓過冬,不過諗起要同老細一齊團圓,真係一觳眼淚。損山窿話,睇下你老細好唔好啦,好人既話同佢食餐都無壞既;我話有邊個老細係好既呢?佢話唔係喎,大連實德既老細就相當唔錯。 

佢為左實現佢地既老臣子老隊員郝海東踢歐洲賽既心願,竟然以一蚊英鎊象徵式既轉會費,幫佢轉會去到英格蘭踢波。老老實實,郝海東對大連既重要性仍然係唔細架,表面睇真係賠了夫人又折兵,但大連既老細都仲肯做呢個順水人情,真係相當唔話得。郝海東收到最好既過冬禮物啦。 

超市佳話呢挺老細世間難求,一個好既老細係要激發員工既積极性,令佢可以產生人工薪酬以外既工作動力,我係大連既球員,都會甘心命抵囉,因為知道老細真係會睇自己嘛。 

我諗起民工懷講過,大陸有企業連員工去廁所既時間都限制埋,美其名係增加效率,但…哈哈﹗令員工方便都變得唔方便,真係自便啦。 

大陸依家有個新講法,就係地方領導好似ceo一樣,唔能夠令到地方發財就係罪惡,每個長官就等於係老板一樣,同呢個邏輯推論,我地香港人既大老板係咪好老板呢?


魚皇 | 20th Dec 2004, 12:49 | 一般 | (291 Reads)

十二月二十日 

甚麼才是終審? 
 
我當然知道終審法院判了便是終審,除非你認為人大真係咁鐘意釋法剪髪,但唔係樣樣野都會放係公堂上面審判架,咁幾時先知咩係結局終點呢? 

有好多本來講到明係非你莫屬、非此不可、死路一條既唯一結論,突然間都可以變的。例如紅灣,由大肚婆過唔到,都改裝都救唔番,羅列哂一系列證據直情係唯一選擇……點知一個屈尾十,係無大科學工程技術突破既情況之下,突然又話可以改裝,突然大肚婆又可以入屋。大家當然會讚你從善如流,但大家更懷疑,你之前講既理據其實係幾咁薄弱,幾咁唔可信,以後無論你再講咩,都唔會信你,起碼唔會信你住。例如話約食飯,你一直講話未收工一定唔可以出席,死都唔得,突然唔知咩事,可能你知道有個靚女都會食飯,你突然又話可以出現,因為你提前做完d工作,你估得到既印象,係話你重視朋友,定係你之前講大話呢? 

同樣,西九龍既單一招標方案被人質欵已久,但司長一直話呢個係唯一方法,無單一招標無巨型天幕,無巨型天幕無地標式建築,無地標式建築無西九文娛藝術區……佢反覆左好多似呢個道理。但突然,佢又話,唔鐘意單一招標咪諗第二個方法囉。


魚皇 | 17th Dec 2004, 12:48 | 一般 | (278 Reads)

十二月十七日  

天下大亂 

好夢一場,夢見九龍皇帝曾灶財重出江湖,龍行虎步,以九五至尊既身份,控告房委會欺壓佢既公屋子民、剥奪佢地上訴既權利……財叔甚至祭出佢既尚方寶劍,即係個把可以上斬昏君下斬奸臣既寶劍呢……但係法院要求財叔要係五分鐘之內入到法院門口先至受理,而財叔既輪椅推极都推唔到上法院既樓梯……於

是就錯過左財叔大戰周華健…啊唔係,馮華健既精彩一幕…… 

經過呢一幕,大家先知咩叫擺你上枱,就算係戴假髪既法官,當佢被人擺上枱既時候,一樣都係咁好笑。你幾時見過高高在上的法官會激到自稱咩奴隸啊,有把槍指住自己個頭啊咁樣啊?最慘就係,明知似奴隸明知有把槍指住,明知與訟雙方都係搵你法庭過橋,都係要做架啦,同旺角金毛強一樣,受人二分四,唔駛做啊,開工啦﹗﹗ 

大家亦明白咩叫心手又係肉、手背又係肉……都係爛肉喎,兩邊都爭唔落。首先個個華建哥,上訴期限,無理由係用對被控告一方影響的大小來衡量吧,而是以原訴人有否有足夠時間充分衝量自己上訴勝算、以體現上訴的權利吧?

家陣華健哥係咁「除」係咁「除」,同大陸的法院有得揮。最高紀錄試過一宗涉及廿多位民工追討欠薪打鬥的案件,法院用左唔駛半日時間就審理完成,平均每個工人的發言時間都無半個鐘頭,現今我地香港法院亦向大陸睇齊,效率迅速不理死活。 

最大鑊就係原訴一方真係爭唔落,唔係質疑佢既理據,而係佢既行動同態度,擺明不顧一切就係想阻你上市,而唔係針酌有無違反條例,故意埋門一腳先入禀、特登失蹤拖到無得拖先出現表明上訴立場,種種證據都令市民覺得原訴人都係利用緊司法程序去阻攔領匯上市。唔係法院判決,要留意既係,我相信佢地既目的唔係唔准房委會分拆資產,而只係唔想領匯可以如期上市,就係咁簡單。換言之只要領匯上唔到市,就算房委會分皮拆骨佢都話知理……真係擺明搞破壞…… 


魚皇 | 15th Dec 2004, 12:47 | 一般 | (247 Reads)

十二月十五日 

你走得也太遠了吧? 

以下係我同超市佳既一段對話﹕ 

「女人真係煩」「女人真係擰」「究竟佢想點呢?佢想走去邊呢?」

「遲遲唔肯講,索快d俾個了斷啦﹗想拖到幾時﹗想拖到幾時?好辛苦好辛苦﹗」「佢仲想玩幾耐?粒聲唔出,人影唔見,只係留俾我地無窮既掛」

「你唔諗下人家既感受,人心肉做…真金白銀架﹗﹗」盧少蘭,你快d番黎啦﹗ 

一個67歲既婆婆,竟然做出一d反叛少女既行為,離家出走咁無交帶,發生咩事呢?超市佳話,以我對女人既敏銳,一定係跟佬走﹗我話你亂講乜野呢?幾十歲跟咩佬走呢?超市佳話哈哈哈,咩人帶佢黎,咪咩人帶佢走囉﹗

我話有樣野真係好奇怪,個阿婆幾十歲失左踪,佢個d乜鬼社工朋友全部唔擔心,唔駛尋人唔駛報警唔駛搵個喎,由佢囉,由佢去囉,一就係佢d朋友真係鉄石心腸毫不動情,二就係一切在掌握之中,因此唔會擔心。 

超市佳話呢招都算犀利啦,佢玩一輪失踪,拖到你有咁遲上市得咁遲上市,但你又唔可以再話佢乜鬼與民為敵,一個阿婆失左踪,幾咁嚴重,搵番應該慶祝添啦,你仲怪佢與民為敵你就真係與民為敵。同埋佢係一個幾拾歲既阿婆,失踪有咩咁出奇呢?你唔係懷疑佢特登啩? 

超市佳話,有人認為我地應該多謝呢次既領匯官司,因為雖然打官司既聲音好刺耳,但可能係警告我地有火燭既狗吠聲黎架;我話首先消防員都講左個d係燭光就唔係火光,唔會燒死人,第二,你隻狗唔係晨早發現有火就吠喎,你係要等到全屋都瞓哂衫都除埋牙都刷哂,先突然大叫火燭喎,係咪存心要屋主難堪呢?仲要吠吠下突然又話唔吠啦,雖然我認定仲有火燭,不過我喉嚨痛,唔吠啦,你地自求多福啦?

超市佳話,講多無謂,唱歌最實際﹕尋人,尋人,誠心禮佛來尋人,同盧少蘭你三生有幸,你…你快回家﹗


Next