香港新浪網 MySinaBlog
魚皇 | 30th Nov 2004, 12:30 | 一般 | (244 Reads)

十一月三十日 

得天下,天下同哭﹗ 
 

正所謂花無百日紅,紅顏亦會衰老,紅灣真係錯在改壞命,改左一個不堪時光流逝的名。依家新創建話你知,呢幢私樓已經紅完啦,要拆啦。 

再諗下發展商個名,你就知道佢話考慮左三個發展方案,其實只係做場戲,答案一早就有。點解?發展商個名叫新創建喎,又要新又要創造又要建設,有乜可能會挑選個d內部改建啊,梗係一下推倒再重新創造建立一個豪宅啦。 

仲以為金融風暴之後,大家會對地產泡沬醒覺,仲以為地產商既影響力會大減,點知地產王國愈黎愈興盛,個單乜鬼得西九得天下,講得清楚d咪即係得西九既地產商得天下囉,陰功﹗點解地產商會做左天下霸主既? 

西九文化項目由地商主導,開頭地產商信誓旦旦講蝕錢都會發展文化,大家實在相當欣慰我地既地產商既藝術熱情,咁啱哂啦。既然話紅灣塊地咁靚,唔應該淨係發展居屋既話,你對文化發展咁有熱誠囉,咁不如你係紅灣半島起文化中心囉,唔一定要起豪宅架,蝕d錢唔緊要啦。不過大家見到你衡量個三個改建方案既時候,淨係睇個錢字囉,經濟效益囉,唔多見你衡量其他價值理念呢?第時西九文化中心起好,會唔會d地產商轉個頭話,個塊地起博物館都係陡左料,不如拆哂好過啦。 

你又話紅灣半島竟然可以提高下一代既環保意識﹗大佬﹗你真係當人地痴既咩?你用咁浪費咁唔環保既方法去灌輸環保意識?係咪諗住用反面教材呢?即係你無端端殺左個人,將佢屍體好好保存風光大歛,然後同人講我咁做可以教人珍惜生命,係咪咁呢? 

記唔記得雍正皇朝主題曲,叫做得民心者得天下,而唔係西九,天下亦唔會係地產商可以得到。


魚皇 | 29th Nov 2004, 12:30 | 一般 | (280 Reads)

十一月二十九日

愈描愈黑 

我魚王雖然份人厘厘菲菲,有鬍唔剃有頭唔洗,但都好明白一個道理﹕錯,就要認;打就要企定。所以,當我千難萬難,約左阿samsam同我去睇戲,而小弟竟然…又遲到既時候,我二話不說,立正企好準備被罵,samsam臉色一沉,我最憎人遲到。我話,我都係喎,所以我最憎自己。哈哈。 

Samsam話,對唔住,一d唔好笑。我個心怦左一下,點解佢會咁介意呢?即係…雖然話一般女仔都唔鐘意人遲到…但係…我覺得有d唔同。我笑一笑話,不如我請你食餐勁呢?好唔好﹗呢幢新開既豪豪坊阿拉登面館唔錯架,我請你﹗佢話,sorry,你黎遲一步啦,啱啱有食環署既人黎左,封左鋪話食物中毒。 

我話,係咪遲到大話夾好彩先,避過一劫,samsam唔受我既嬉皮笑臉添,話﹕都係你遲到,鐘好意思﹗你細個讀書先生唔教你咩?嘩﹗英雄莫問出處,唔駛巢番我既光輝歷史啩﹗我同佢講,阿samsam,我讀書個陣唯一既污點,就係經常遲到,仲搞到被人記小過,無陰功,人地打架都係記小過,我…遲到都要記小過。 

Samsam話你都知自己幾唔掂呢?我即刻話,但我認喎,我絕對唔會好似個個名校女生咁,竟然諗到偷學校既遲到簿,以為可以一筆勾銷咁著數。呢d就係唔肯承擔責任既表現囉,等於你犯左法,你被人拉左,你循正途咪搵律師保釋你打官司,但斷唔能夠逃獄架係咪。 

Samsam話,你講到好似自己無偷到份簿就好光榮咁喎,我話係啊,有咩錯得過用一個錯誤去掩蓋另一個錯誤啊。我呢d光啞呢既,唔怕多條裂紋係身度,佢名校生係磁器黎既,見到條裂痕咪緊張諗住用沙紙去磨,結果花得仲大撻。


魚皇 | 26th Nov 2004, 12:29 | 一般 | (284 Reads)

十一月二十六日

可否不死? 

為左充滿生命活力既黃霑既死,我同塔塔米唏噓左一輪,最唏噓既係,人真係好鬼易就死,真係好易。 

你話係咪唔好食咁多煙飲咁多酒就可以唔駛死?又唔係話,今日報紙先賣,一個二十歲既青年,喜宴上豪飲,跟住就紅事變左白事……呢d事經常發生,有時係紀律部隊訓練緊跑緊圈既時候,總係係你最唔為意既時候撲出黎,死神探你唔襟門鐘。 

塔塔米話,就算你聽到門鐘聲咁又點啊?你可以栓住到門唔俾佢入黎咩?好似世衛發出警告,話會有一種全新既流感殺到,咩可殺七百萬人,即係一次過無左成個香港都得,好似好恐怖,咁又如何呢?可以點樣防範呢?應該點樣防範呢?做d乜野可以避得開唔駛死呢?有咩疫苗可以叫死神行錯路呢?而且呢隻死神好狡猾,每年既流感大爆發既犧牲對象都唔同,有時係後生仔多,有時又係老人家多,點避呢? 

我話不如每日都食多個橙囉,黎緊健康產品生意應該火紅火熱,而我認為佢地應該重點向青衣區既居民做推廣添。塔塔米話,點解呢?個d咩二噁英嘛,致癌物質,會運去青衣度焚燒,但綠色和平就話,(二噁英)不溶於水,只溶於脂肪,所以很容易在食物鏈,再累積到人體……只要很小量積存在人體內,已有機會令人患癌。我就住係青衣既,我就好驚,勁驚,尋日早知唔爛街,一齊去瞓街阻住d運貨車好過啦。 

塔塔米話,d致癌物質係建興迪士尼樂園而挖出黎既,不如以後青衣既居民去迪士尼樂園都唔駛錢,而且如果青衣居民有咩頭暈身慶,迪士尼或者政府都要賠醫藥費。反正個個土木工程拓展署高級工程師講到明話,二噁英會被分解為無毒無害物質,寫左包單唔會有事,咁有事咪佢負責囉。 

我諗緊,馮小剛既新片《天下無賊》就快上映,我唔想天下無賊,我只係想《天下無死》啫。


魚皇 | 25th Nov 2004, 12:28 | 一般 | (280 Reads)

十一月二十五日

從此滄海無笑聲 

尋日心情幾沉重,無心機寫日記。因為知道黃霑死左。 

坐係的士度聽電台讀新聞既時候,聽到報導員話「著名作曲、填詞人音樂人……」

淨係聽到呢幾句咁長既稱銜我己經個心打左個冷震,通常得兩種情況會將一個人既職銜講得咁詳細,一就係獲得甚麼成就獎,一就係……死左。

我諗緊,邊個又死左呢?然後淨係聽到兩個字﹕黃霑。

老實講,有一剎那我以為自己聽錯左係王晶,但好快知道真係黃霑。 

當我話俾塔塔米知呢個惡耗既時候,佢嘆左口氣,話﹕如果唔係阿霑叔都已經成六十幾歲人,我可能會講一句天妒英才。我話咩意思呢?塔塔米話,你唔覺得霑叔叻得太過份咩?你作曲有佢咁叻,填詞又得唔得呢?你詞又填到啦,你又可唔可以唱埋先?當你唱到得啦,佢仲識做戲喎?當你又可以演戲啦,踱橋諗廣告又得唔得呢?叫你出書寫文章你又得唔得呢? 

我唔識評論佢每樣既技能係咪去到最高峰最頂點,但起碼佢有呢份才情。以前有句話叫做才高八斗,係形容曹植,話天下既才總共先得一石,一石即係有十斗,但曹植一個已經攞獨占八斗咁多。你數下霑叔樣樣都得,都可以稱為才高五六斗。個天又點會唔妒忌佢呢? 

我擰頭,我唔鐘意呢種宿命既睇法,但,你不能不感嘆,黃霑真係太過份,點解樣樣佢都得?連女人佢都要多過人,三個咁多。不過我諗佢依家去左都有好處,佢既博士論文都話香港樂壇愈來愈死,毫無創新活力,如果佢然在生,望住樂壇咁樣死落去,仲係咪可以滄海一聲笑呢?


魚皇 | 23rd Nov 2004, 12:27 | 一般 | (298 Reads)

十一月二十三日

悲傷之城

今日唔想同人傾計,但一個人唔代表孤單,英語所謂,alonebutnotlonely。哈哈。 

尋日令人諷刺既一日,呢邊廂迪士尼樂園公布票價,意味快將投入市場娛樂大眾,但個邊廂,天水圍倫常慘案的三人專家小組,就公布調查布告,話天水圍係一個被遺忘的城市,社區娛樂設施嚴重不足,係一個病態市區。當我地討論緊迪士尼既票價同海洋公園既吸引力既時候,有無方法,可以將迪士尼既歡樂,帶d,哪怕係少少,分d俾天水圍既居民呢? 

或者,係咪索性就係天水圍起番個主題樂園呢?如果我係迪士尼或者海洋公園,應該拿拿淋推出優惠計劃,凡天水圍居民可獲優待,起碼玩機動遊器唔駛排隊。再唔係,房署既公屋租金官司判左,房委會勝訴,無得減租。但為左照顧呢一個被遺忘既社區,係咪孫明揚應該出黎講下,話免天水圍既租金一年呢? 

你睇下歷史教科書,邊個朝代唔會免天下農民幾年租稅先得架。 

不過以上所言,我都只能夠講,唔到point。因為有迪士尼樂園唔代表唔會有倫常慘劇發生,即使天水圍既規劃按照專家建議,起幾百個游泳池圖書館,都唔會令到個丈夫唔虐打個老婆架?亦唔會阻止度燒炭跳樓既事發生。我覺得好多天水圍既居民其實搬入黎之前已經係有事、有唔開心,有問題,並唔係話搬左入天水圍,個度風水唔好先搞到家嘈屋閉。所以話天水圍係一個病態城市,係咪真係可以醫度個病呢?


魚皇 | 19th Nov 2004, 12:26 | 一般 | (264 Reads)

十一月十九日

天無絕人之路 

尋日講到我同samsam係警署度落口供,仲同d警察叔叔討論中港大戰個場波,我提議應該向前看算啦,學董生所話,唔好孭住歷史包袱,寄望2010世界盃算啦。點知差人叔叔唔肯善罷,口水戰欲罷不能,係要繼續討論。 

佢拎起份報紙,同我講,你睇,馬來西亞個教練都出黎講野,大鬧d球員唔知做乜,上下半場判若兩人,上半場打和,下半場竟然輸夠五球,佢仲透露下半場既指揮權已經唔係屬於佢架啦。 

佢愈講愈激動,我忍唔住拍拍佢背,話﹕波都踢完啦,拗唔番啦,亞洲足協韋立本都話,唔會再調查呢件事啦,仲嘈咩呢? 

sir話,唔得,呢個係原則問題黎架嘛,老老實實,對中國我就唔黎得佢咁多,國內足壇一向黑球充斥,佢地想做假唔出奇;但我地一國兩制下既香港,應該有番d道德架嘛,如果香港足球又無球技,連球品都無既,搵鬼睇﹗所以我唔係想還國家隊清白,係想還我地香港人清白咋﹗﹗ 

我話阿sir,死無對證,點還清白呢?我話一係咁囉,立法會議員咁多議員足球隊,個個都球技精湛,叫阿陳偉業同陳智思兩個運動健將,成立一個足球獨立調查委員會,傳召證人,包括五一九既舊兵,再搵番前國家隊教練米路天奴域,問下佢地覺得國家隊最大既潛能可以發揮到去邊,有無可能係一分鐘內連入兩球。

跟住動議辯論,應該可以為香港足球挽回聲譽。橫掂阿霍震霆平時係立法會都少講野啦,今次俾個機會佢發圍啦。 

madam插嘴話﹕我寧願諗下有無可能上訴令國家隊出局好過。我話有計,只要你叫個堆係九鐵個度嘈住哂要用人地既禁區通道出入既水貨客幫手就得。佢地擅改遊戲規則,自己錯左都可以要人就佢,最啱打死狗講價,代國足出頭爭出線。而且阿sir,你仲唔放我地走既話,我就叫水貨客先黎呢度救我地架啦﹗


魚皇 | 18th Nov 2004, 12:25 | 一般 | (250 Reads)

十一月十八日

死死死,生生生,先死後生 

我同samsam對兩位樹枝大賊曉以大義,但仍然被佢大劫三方。不過佢睇在samsam咁深厚既環保知識,竟然唔將我兩位綑綁,淨係叫我地扮兔仔跳直至佢地離開……多謝哂啦,竟然剥奪左我唯一同samsam親近既機會﹗ 

依家,我已經同samsam係警署度落緊口供,但你會發覺,d差人精神唔多集中,同我寫名,突然會擰頭嘆氣,或者咬牙切齒。口中喃喃自語﹕一球,就差一球。

Samsam問我咩事,我話唔使問阿貴,講緊尋日場波囉,中國香港同根相煎,中國已經用猛火煎魚甚至係炸魚,無奈科威特即情成桶石油做油浸馬來雞,就咁將中國踢左出局。唉,天何殘忍﹗﹗ 

個阿sir聽我講番場波,精神為之一振,話﹕你講,最衰係咪個個鄭智,咁好機會成個十二碼都要射唔入,你話係咪自己雙手送個出線權俾人﹗掛靴啦叫佢﹗﹗ 

我諗緊點樣奉承佢會有機會快d走人,隔離個老差骨搭口﹕你賴地硬啦﹗咁你不如鬧港隊個龍門范俊業﹗有獎咩﹗撲咁多球做咩啫﹗球十二碼救唔到無人會怪龍門,你唔可以特登捉錯路既咩﹗ 

有個madam話,全靠范俊業係咪救波,大家先唔可以話尋日打假波咋。你試下連個龍門都有球必應,輸十比零出線肯定俾人鬧死啦﹗所以隔離科威特都特登俾馬來亞入一球,製造險情,你都唔可以話人地做馬啦。 

我點頭,有個便衣話﹕怪就怪中國人啦。邊有人請個教練番黎,對佢諸多制肘,成日提意見連出咩人都要干涉佢,正所謂用人不疑,疑人不用,你都唔信個教頭,點教到好波。一早就輸啦。 

我見所有都望住我,我咳咳一聲,話﹕哀其不幸,怒其不爭。如果每踢一場波都可以踢出尋日個種渴望求胜既心態,中國必勝。所以,Ihaveadream

我想將自己同中國隊既命運緊綁一起﹕阿sir,中國都出左局,我地幾時可以出局,出黎個警局呢?


魚皇 | 17th Nov 2004, 12:24 | 一般 | (292 Reads)

十一月十七日

本是同根生相煎何太急 

尋日講到阿samsam同兩位綁樹黨大講綠化環保問題,諗住博好感避過一劫,點知都係賊性難改,開口要攞錢。呢刻到我挺身而出啦,我沉聲問道﹕兄弟﹗何苦呢?本是同根生,搶銀何太急呢?山不轉地轉,山水有相逢,何不俾個薄面,就咁算呢?哎喲,哎喲,唔好打臉,唔好打臉…… 

d既樹枝賊先吐左一口標準既痰,然後大喝一聲﹕咄﹗邊個同你同根生﹗我地黎到香港咩福利都無架﹗又話咩新移民住夠七年先有綜援啊盛咁,又歧視我地d自由行,以前我地無錢又笑我地無錢,係窮親戚,依家有錢啦,又笑我地係暴發戶啦,笑我地黎香港瘋狂買金買名牌,你地香港人去巴黎唔買lv既?人地當你係賊咁要哂證件一人限買兩件都仲要犯賤排隊隌笑,咪一模一樣﹗又咩好笑呢?

正一係腸粉燒賣又燒包黎架﹗﹗哦,依家有事,有話本是同根生啦,又係同胞啦﹗你地都好無恥喎﹗ 

我無諗過我引述三國詩人曹植既一首詩都有咁大既反應,天啊﹗早知同佢講曹敏俐算啦。我即刻妥協,我話你地都係求財啫,唔好勞氣唔好勞氣,俾哂你俾哂你。

點知另一個樹枝賊圓瞪雙目,大喝一聲﹕咄﹗你當我們兄弟是甚麼人﹗乞兒嗎?我告訴你,我們攞錢係為左國家大事﹗ 

吓﹗革命黨興中同盟會重現香江?失覺哂喎。點知佢話﹕我地係大連足球俱樂部支援國足既成員,而家流落異鄉籌款去廣州睇世界盃外圍賽亞洲區賽事。我話原來如此,同道中人同道中人。小弟都係國足支持者,不如你放左我地,一齊去廣州睇波仲好啦。 

樹枝二號賊又講佢既口頭襌﹕咄﹗我係唔會同敵人講話既﹗樹枝一號話﹕小兄弟,我驚你上到廣州,俾人溶左你都似。我地謀財不害命既。

我哈哈一笑,你兩位有所不知啦,呢場波國足係許敗不許勝既﹗國內媒體做左調查,超過一半市民認為國足係無可能出到線,有人認為出到線就一定係打假波,係恥辱。仲有啊,中國足球超級聯賽既大老細,個個都希望中國出唔到線,咁就可以借機推翻中國足協,重新建構中國足球皇朝,實行置諸死地而後生。所以中國贏波出線肯定俾人嘈到拆天,輸左反而摶得陣陣掌聲,點計都唔關香港事,你話係咪好放心先?


魚皇 | 16th Nov 2004, 12:23 | 一般 | (280 Reads)

十一月十六日

人無錢、天無眼 

尋日同塔塔米傾完呢個日皇長女清子既婚事,走個陣佢同我講﹕你,面色又紅又黑,係黑桃花劫,小心﹗唔係啩﹗你玩塔羅既連黑桃花都算到??咩係黑桃花係咩? 
 

好快我就知咩係桃花,samsam竟然約我去行山,港島行山熱點大潭郊野公園﹗﹗我又驚又喜,因為表面上我睇唔到今次要執行咩野環保任務囉,照計都係,一場純粹既兒女私情啩?但對於呢個行山地點…我覺得好似好眼熟咁。 

唔理咁多啦,難得佳人有約,我會記住呢一刻既時光,下午二時半,我同samsam係綠樹林中漫步…無其他人。佢突然問我﹕覺唔覺我成日都約你行山考察?我話,差唔多啦,唔算好多啊。點啊,今日又有咩環保任務呢? 

佢擰頭,話今日休息,無任務在身,我個心一熱,桃花之兆非虛;但黑色點解呢?

好快我就知,係芳草叢生既路旁,突然跳出兩個身形都好似兩截枯枝既男人出黎,不過呢兩截樹枝拎住把刀仔囉﹗天啊﹗名聞中外既綠樹行山打劫黨竟然出現左﹗﹗我第一時間企係samsam面前,好快攞個銀包出黎,話﹕大佬﹗你有福啦。啱啱出糧,八達通都啱啱增左值,仲有兩張十送一車票,攞佢黎過海去金紫荊認真超值。再送你一張六串一波飛,中左五十幾倍唔駛再做賊……喂有事慢慢講﹗ 

兩條樹枝大盜話﹕見你咁識做,我俾幾個plan你啦。自己選棵樹啦。

灌木喬木有花樹無花樹長葉形針葉形任你選。

samsam話你咁熟既?兩條樹枝佬話﹕無計啦,日日係度等你地既遊客上黎,我對d花草樹木都熟哂啦,你隔籬呢棵最近生得唔錯架,不過d葉就枯黃d囉。Samsam話無事既,正常既落葉現象,就係咁兩個人係度交換樹木心得,實在好投契。另一條樹枝話香港人既環保意識算幾好啦,行山客都真係欣賞d樹木,大陸個d就猛咁摘花劃樹,係咁在此一遊。Samsam話不過都係大陸既自然風光好睇d,樹枝客話千祈唔好妄自菲薄,你地既風景都唔錯,好似呢個公園咁,我帶你行行個邊,d景超靚……samsam話你d廣東話咁好既,樹枝客話咁樣先唔會俾人歧視嘛,搵工又易d自食其力唔做負擔,samsam話咁咪幾好囉,依家搵到野做未呢?樹枝客話未啊,暫時都係打下劫問下人攞錢咁啦。係喎,

樹枝客突然記番自己既本行﹕喂﹗攞錢黎啦﹗


魚皇 | 15th Nov 2004, 12:21 | 一般 | (300 Reads)

十一月十五日

紅鸞星動,恭喜恭喜 

塔塔米話俾我知,佢上星期占星占到東方有紅鷥星動,不過唔知係邊度既邊位顯赫人物結婚,依家終於揭曉啦﹕原來就係日本明仁天皇的獨生女紀宮清子公主,終於嫁得出。 

由於佢係塔塔米,所以我一d都唔覺得佢係馬後炮扮事後孔明,我信佢真係占卜過。我相信日本好多占卜師一直都好想預測究竟阿清子幾時嫁得出,呢個盤口相信都幾多人想捧場。 

塔塔米突然問我﹕你覺得清子佢靚唔靚?我諗都無諗就答佢﹕唔靚﹗

佢哦左一聲,話﹕俾你會唔會娶佢?我呆左一呆,話﹕娶佢?唔係卦?做女友都要諗過先。佢又哦左一聲,話﹕乜個樣真係咁緊要?我發覺好似有少少中左招,講錯野,即刻詳加解釋﹕佢個樣其實係…普通無乜特別唔算好靚,但鬼怪佢既身份係公主咩?你幾時有見過公主係唔靚女先得架。全部都係李嘉欣咁先得架嘛,咁對佢有太大期望,自然會…失望囉。 

塔塔米玩住手上的牌,話﹕但係報紙話佢好賢淑,識野又多,鐘意研究雀仔,又識日本國粹能劇。幾好啊。我搔頭,話﹕佢咁好,點解又會咁耐都嫁唔出呢? 

塔塔米話﹕我覺得,佢係被人逼架,唔係話佢唔鐘意佢呢位公務員男友,但可能未有咁快想成家立室,點知傳媒皇室係咁日日疲勞轟炸,日日話佢嫁唔出,其實,女人唔一定要結婚啫,係嘛?我唔識答,我覺得女人唔一定要咁早結婚,但似乎係一定要結婚,男人都係架,點可能唔結婚? 

塔塔米話,好奇怪,大家審視一對戀人既道路,都自自然然用同一套標準去度﹕相戀一定要結婚,結左婚大家覺得就了件心事,如果唔係一定有d問題發生。 

我笑住話﹕係啊,所以聽講日本政府曾經諗住修憲,容許嫁左出去既皇室成員,仍然可以領取皇室生活費,即係名副其實娶個金枝玉葉夫憑妻貴個種……增加公主出嫁機會……真係好折墮。 

塔塔米話﹕我幫佢地占卜過,佢地婚姻一定會幸福美滿。我話點解呢?佢話,呢位公務員,娶左一個無皇室身份既皇女,錢又無,學你話齋,樣又無,但壓力一定有,傳媒肯定會無時無刻留恴,佢百害而無一利,都肯娶佢,證明佢真係鐘意清子。


Next