哈哈﹗首先各位千祈唔好食飽飯黎睇呢條片﹗如果唔係你會嘔﹗﹗但係，真係機會難逢﹗
小弟一屆宅男，榮升……「鐵男」﹗
yeah!!!
一個發展唔到辦公室戀情既辦公室，
絕對唔係一個好既辦公室﹗
我一度以為，係辦公室搞戀情係正常，唔搞先係唔正常。
一路以來，我地都係「靠山摘野菓、近水食魚生」，就地取材，無理由捨近就遠架。
咁你話啦，大個左做野，點可能唔係辦公室一展拳腳？
不過，抱住呢個心態，通常你第一日返工就已經想轉工。
你會發覺，點解呢間公司會請埋咁多清潔阿嬸既？莫非真係咁污糟？而呢間公司點解對d清潔阿嬸咁好既？俾佢地著哂suit仲可以著高踭鞋黎拖地既……然後你發覺，sorry，原來佢地全部都係，你既同事。
原來OL後面唔一定係跟住「誘惑」兩個字，OL同清潔阿嬸唯一分別，原來就係套製服。
你開始發覺，過往十幾年睇既日劇，都係呃你既，你做左成年都見唔到木村，你等左十年都見唔到松隆子。
甚至我有期待過，有無d好似求婚的惡魔咁，有個Sandra Bullock既女上司都好啊…中女我唔介意，我願意以肉體和權力作交換……可惜，連穿prada的惡魔裏面既熟女梅惡斯翠普都無。
有，都有既，齋惡魔一隻，你要唔要？
於是，大部分既上司好似甘仔咁既樣，而所謂既女同事，可能就係所謂既電視之花咁樣。
我好認真講，公司如果男女質素太過惡劣，做呢份工就屬於厭惡性行業。
所以，一個發展唔到辦公室戀情既辦公室，絕對唔係一個好既辦公室﹗我話既﹗
甘乃威事件真係完全體會到，咩叫傳媒既可怕。
佢可以要捧你上天，亦可以置你於死地。
一念天堂，一念地獄。
你唔好咁天真同我講「你身無屎我想做你都做唔到啦」
你就算無放屁，我係你面前猛咁話「好臭好臭」，你已經水洗都唔清。
傳媒殺人，只在字裏行間。
同樣一件事，甘乃威向黨團表示如果有需要，佢會辭職。
如果你係想幫甘乃威，傳媒會這樣寫「甘乃威﹕我願意辭職」這行字便顯出一力承擔的果敢，是一種正面寫法。
但如果你想抹黑佢，你便會如此下筆「甘乃威作勢辭職」，作勢，即是裝腔作勢，即是扮野，即是告訴大家，佢係度扮辭職，暗指佢無誠信、扮可憐……一個作勢，可以讓讀者有無限聯想。
你看，同樣一個消息，你點寫，效果差好遠。
黃子華在楝篤笑便曾示範文字如何殺人。
「佢扶阿婆過馬路，好正面；佢竟然扶阿婆過馬路，就變得好負面﹗」
文字殺人，無須直接話你係賤人，已經可以殺死你。
你千祈唔好以為，傳媒一定係是其是，非其非。因為傳媒既喜惡愛恨，往往就可以改變一件事情既本質。
甘乃威事件，要發大既，寫到幾差都得；你要救佢要幫佢，又係舉手之勞。
例如你可以寫篇特稿﹕甘乃威身邊人士抱不平，指甘為人勤奮老實，立法會出席會議比率最高，日日開會做野，邊有時間搞婚外情？對於甘遭人指控感到不值。
寫多兩篇呢d特稿，唔可以話令到件事完左，但看在讀者眼裏，自然覺得﹕係喎，甘乃威可能係被人屈呢。
但如果傳媒想你死，出篇特稿係話﹕甘乃政出席次數最多，但論政質素最差。
無端端又插人一刀，又係會被人聯想﹕係喎，佢咁差，一定係用哂d 時間去示愛啦。
傳媒殺人仲要第二招，就係點樣突出民意。
例如烽煙節目一定會討論甘仔事件，仲要係意見紛陳五花八門；你想幫甘仔，你就可以寫個標題係「婦團認為人誰無過，應該還甘乃威一個公道」，件事即刻正面左好多。
但，你亦可以選擇咁樣寫「聽眾怒轟甘乃威無誠信左閃右避」。
兩個標題都係事實，都分別有人講過咁既說話，問題係，你採用邊一個角度，你引用邊一方面既意見黎突出事件啫。
係呢度謠言滿天的情況下，「消息人士」呢四個字更加係殺人利器。其實，有邊個知，係咪真係有呢個消息人士？報紙用消息人士用到好似印銀紙咁好鬼就手，就手可以利用消息人士把口黎將事件升溫「消息人士話件事已經上升到影響民主黨前途既問題」……嘩﹗有無咁大﹗邊個講架？
今次事件令人大開眼界，一份平時同個黨關係幾好既報紙，起勢咁插唔見血唔罷休，最慘係成件事，都令我覺得，甚實關我咩事？傳媒係呢次窮追猛打之下，其實為市民爭取左乜野權益？就係想知道甘乃威有無向佢助理示愛？就係要考究譚香文講既誤會係咪真既？就係想知道甘乃威抄佢助理抄得合唔合理？
我認為，除非事件涉及性騷擾，就可能關公眾利益事，否則，兩個人既示愛…救命﹗加埋百幾歲人，結左婚又如何，同公眾有何關係呢？
有人話呢個係不合理解僱，首先，我都真係唔知道，原來香港炒人要合理解僱？報足糧就可以即刻要你走人啦，有邊間大大細細既公司唔係咁做呢？除非涉及歧視，例如炒一個大肚員工，就可能家庭崗位歧視。
但呢次事件，投訴人係曾經向平機會投訴，然後大家要注意，投訴人自己都話，平機會表現冷淡，好唔積極，無處理跟進。
各位﹗豈不是話，連平機會都唔受理呢單case囉﹗﹗如果呢單野涉及歧視解僱既話，平機會仲唔做野咩﹗﹗
我覺得甘乃威唔肯透露炒人原因，係因為當中涉及好多兩個人之間既一d事情，而呢d 事我覺得係好私隱同埋百分之九百九十九係唔關你我他，即係無關公眾利益事。佢唔爆料，你可以話公關策略有問題，但我覺得有口德既表現。
有d人，表面係幫女性仗義出頭，結果連人地以前同過一個有婦之夫拍拖既陳年舊帳都講埋出黎﹗無啦啦多撻啦﹗
成件事，唔係咩桃色新聞，亦唔係乜野醜聞，更加唔覺涉及乜鬼誠信，只係一宗，政治角力。只係一個犧牲品。只係一個唔知點解得罪人既人板。
記住，傳媒係無冕皇帝，而皇帝，有明君，亦有暴君。伴君如伴虎，自己執生。
我想，我是患了警察恐懼症。
自從我清白之軀多次在街頭被警察攔截開袋驗屍解剖後，我有了警察恐懼症。
街頭看見警察，手腳已有點不聽指揮，眼神遊移，不知應該了無懼色直望、還是顧左右而言他的不屑一看。和警察對望，可能引起懷疑﹕望咩啊靚仔﹗﹗做乜咁留意阿sir啊﹗企響度，個袋收埋d乜？
避開眼神﹕做咩啊靚仔﹗驚啊做左咩事唔敢望阿sir﹗企響度，打開個袋﹗﹗
好了，就在十分鐘前，凌晨十二時三十分，本來好夢正酣，收到「夜尿急call」上廁所，由於小弟的住所離樓下停泊電單車的地方极近，在廁所的窗戶已能窺視愛驅的生存狀態。那時只見愛驅可憐兮兮的停在合法停車位之外，遺世獨立，一副摶抄牌格局，而環顧四周，正好有空置的泊位﹗﹗實在是大好機會不能放過﹗
本人如廁完畢洗洗手，便一身街坊裝束，t-shirt、短褲以及車匙，到樓下兩步之遙的泊位拯救愛驅。上車，開車，亮燈，駛出，向右移動一步，車尾後入，對準泊位，輕鬆倒車泊好，ok﹗歷時不足三十秒﹗完美的泊車教程，當然，在這完全不足三十秒的泊車過程、只是由左邊移到右邊的距離，小弟本人完全不會載頭盔的。
意外發生了﹗
我剛一泊好車，停車熄匙落車，兩個軍裝警察在我身前經過，我取回車匙下車，心裏閃過一絲不祥預感﹕在阿sir的角度看來，似乎是他們一出現，我便落車……似乎是…我…在避開他們…不可能吧…我已經穿著如此街坊裝束……不可能懷疑我吧…我想多了……
「哥仔﹗企響度﹗」
pkpkpk﹗惡夢成真﹗真係叫住我﹗﹗pppk﹗﹗點解？？何必偏偏又選中我﹗﹗
「你係車主啊？」
老天﹗你有眼的﹗﹗你親眼看見我停車熄匙的﹗﹗我難道還能是偷車？偷車還有鎖匙？？
「係，我係車主。」
「你個頭盔呢？」
甚麼？頭盔？
「在車攏。」
「車攏？你做咩唔戴頭盔？」
老天﹗﹗你該不會是要捉我無戴頭盔泊車吧？？別說笑了﹗任何一個鐵騎士都不會戴頭盔去泊車的﹗﹗
「阿sir﹗我架車本來係合法骨位之外，我見到有位，便把車泊入合法位內，只是移一移位，我無戴頭盔。」
「甚麼？你是說你見到有合法位特登來移位的？你在那裏看見？」
老天﹗﹗難道一切聽起來是這麼難以置信嗎？一個可愛盡責的小男孩，因為去廁所時發現自己的電單車泊在非法位，馬上落去移位泊車……然後被警察捉住盤問……
「阿sir﹗我係住樓上架，我見到有位所以落黎泊車囉。」
「樓上？你有無身份證？」
pk﹗全身街坊裝束﹗何來帶銀包？
「阿sir，我係住樓上既，我只係打算下來泊車，所以無載銀包。」
「無戴？你個頭盔係邊？」
點解又要回到頭盔這個話題？難道你是逃學威龍那個曾近榮？？無記性成日問？
「阿sir﹗頭盔在車攏。」
「你打開黎睇睇。」
頂﹗多麼熟悉的一句話﹗打開個袋睇下，現在好了，變成打開個車攏睇下﹗﹗我作了甚麼孽﹗家嫂﹗點解我咁命苦﹗﹗
開車攏、檢查完畢、一身清白、毫無疑點，阿sir再給我溫馨提示﹕下次泊車記得戴頭盔。
唉……經常被警察查截，基本上我已對自己的外形相貎言行舉止失去所有信心，就算昨天在地鐵站有一幫少男少女認出我是做電視那個「乜鬼豪」，也不能令我重新振作……是的﹗我是很受注目的，特別是警察﹗個個都來找我的﹗﹗
我的恐懼症病情加重，無藥可救，難道下次我落街買串魚蛋，也要著西裝著皮鞋gel頭噴香水……
「哥仔企響度﹗夜媽媽著成咁想去邊啊？」
講你都唔會信。
我，彭晴，兩個加埋都攞得生果金既高齡DJ(唔好意思彭小姐)……做新目竟然會…竟然會緊張到……訓唔到覺﹗
千真萬確，小弟已經很久沒有半夜才離開電台﹗﹗過去一星期，重拾香港電台是我家的感覺，為了做宅男，只有宅居在電台﹗﹗而且心理壓力很大，這一個星期我真正茶飯不思期待與中女女神相會。
首集反應暫時尚可，不過我和女神都各有很多檢討，默契需時配合，但 作為兩個「老波骨」，應該很快便能組織悅目的攻勢。
中女女神我口講我心，完全表達中女心聲，無問題；無奈小弟雖然社交生活不活躍，卻實在不是宅男，只是書蟲﹗所以都要快馬加鞭惡補ACG知識，各位宅男同志，有空多多替我補習，我才能更好反映你們宅居的心聲﹗
第一次用「玩電話」的環節，其實我心情更更更緊張﹗因為，我都一把年紀，才玩人家後生仔的玩意，所幸小弟扮驚青的聲音ok神似，我相信售貨員當日應該相信接了一個情深宅男的查詢……不過可以再放開懷抱多一點，我下次會玩得再好d，sales，你等我吧﹗
無錯，說了這許多，其實只有一個目的﹕支持逢星期日下午二時至四時，中女宅男殺很大﹗﹗多謝﹗
完滿結束，九月壓軸好戲，瘋show家族大事kill k﹗﹗
你想像不到有多疲累，就像校了鬧鐘，九點半一完show，就在我們宣布「多謝支持，下次再會」，話音方落，我突然感到眼皮千斤墬，重重拉下，然後眼水長流，難聽的說，簡直像吸了毒一樣﹗﹗
不過真的過了愉快興奮刺激的一晚﹗觀眾千里迢迢的支持、面對爛聲四人組的歌聲仍然可以處變不驚﹗﹗果然受了嚴格訓練﹗
不得不提謝安琪，超專業﹗她和我們四位五音不全、加埋廿音殘缺的主持人，錄音最少五次，一次又一次，真正是屢試屢敗，我們四個臉皮再厚都有點不好意思，好一個阿kay，仍是眨著大眼，面帶笑容「唔緊要，再錄﹗」她對村長非常體胋，創設不少溫馨入key提示，所以我要再次強調，阿kay實在是一位包容性最強、絕無歧視的歌手﹗yeah!!!
當然，deep吳浩康的真情剖白也是博得全場掌聲。錯了便認，認完便改，這是deep對自己人生的交待。
wild time的band sound令人熱情高脹，青欣中心的女dancer，無得嘆……我指舞技。
老黃賣瓜，自賣自誇，目的只有一個﹕下星期留意瘋show，重聽精彩kill k環節﹗﹗
當然，自問忍耐力強的，可以聽我們四個爛聲王配靚聲天后謝安琪的合唱演出。阿門，執生。
國慶前夕送大禮，解凍港台，重新招聘，恭喜恭喜。
你說政府待你不薄，皇恩浩蕩；我說這只是撥亂反正，給回應有之物。
物歸原主，有一種失而復之感。
然而，的士大佬幫你尋回失物也要有薄酬，政府送你一程，自然也要等價交換。
換來一個無端出現的海產「多舊魚」。
「新設的顧問委員會」實在是一塔沙糖之後的產物，食啦你。
為何要有這個政府不斷強調的「無實權」委員會呢？為了給予更多專業意見予香港電台？為了更好的反映民意？為了更完善的節目內容？
就是說，現有的香港電台架構，達不到這些目標？做不了這項工作？
歸根究底，政府看不順眼港台的製作。
就是覺得你的內容反映不了市民口味、政府口味、社會大形勢口味，所以才要找顧問團來問一問你。
這實在好笑。
政府一方面不停強調香港電台的節目公信力第一、欣賞指數也屢獲殊榮，但一方面又成立一個節目顧問委員會來監察你的節目內容。
問題是港台現存已有很多節目顧問團，參與者多為資深傳媒人，業界人士，又有公聽會開放渠道聽取市民恴見。
是否特首認為，這些民間自發的顧問團「做唔到野」？然則，甚麼才叫「做到野」？
為甚麼民間自發的顧問團做唔到野，換了由特首親自欽點委任的成員，就能做到野？兩者除了「來源產地」有不同，究竟有甚麼差別？
說到底，政府還是認為，俾錢你，你就不能咬我﹗不過，換了你港台最高領導層，似乎仍然成效不彰，故此便變換攻勢，創設顧問委員會，務求製造輿論壓力，建立一個類似土耳其球會的「地獄主場」﹗
地獄主場球迷瘋狂吶喊尖叫，雖不會上陣踢球，但卻嚴重擾亂球員心思，影響教練領軍，等於打多一個人﹗
可以預見，顧問團一定會「指手劃腳」，並非要指名道姓叫某個節目收聲，但要求你用更多資源做國際事務、做社區好人好事、做一切平衡之事……十個節目，如果九個都係「大眾熱愛基本法」，或做甚麼「特區領導人系列」……
wow﹗你做唔做？我有錢俾你，你做唔做？唔做？顧問團，做野﹗
體育和音樂各有一個MJ，兩者都是美國人，兩者都是黑人，對，MJ本來是一個黑人。
一個MJ令我們哭了
他說﹕這不代表在籃球界的貢獻蓋棺定論：不認為這是我在籃球場上完成戰鬥的時刻，或許你們會看到 50歲的我在球場上出征；你們不要以為我開玩笑， Never say never（永不說不）！有時候極限、恐懼，都只是幻覺而已！」
一個已經和MVP最有價值球員劃上等號的籃球員，在名成利就身家過億美金的今天，念念不忘的不是如何享受人生如何吃喝玩樂，而是渴望復出再度馳騁沙場。
不要說笑，看到四十六的米高說出這番話時，我想起曹操的詩「烈士暮年，壯心不已」。
然而，四十六是不可能復出的，再壯烈的雄心也不能再在敵人頭上入樽。曹操的詩還有前兩句「老驥伏櫪 志在千里」，你雖然是志在千里，但，你是一匹伏櫪是一匹在馬槽低首吃糟糠的老驥，你只是一匹老馬矣。你的確是壯心不矣，但你已是烈士暮年﹗﹗
我知道，我的負能量又發作了，但有這種想法的不只我一個，古人早就說「夕陽無限好，只是近黃昏」……
我覺得米高在哭，因為他不滿足做球會的班主，不滿足安坐籃球神壇，他只想繼續在球場上跑動。
但，可能嗎？
我們總是有很多借口告訴自己，我老了我病了我累了我夠了……我停了。然後，米高告訴你「Limits like fear is often just an illusion」极限如恐懼，一切都只是幻覺。
我細細嘴嚼這句格言。
你發達國家對運動員保障較大讓他們可以全職專心練水，我運動員無前途純為興趣只能半力練習，這又是公平嗎？
對，就像那個老笑話。
我是青衣南面公屋七樓上格碌架床才子。
